އެމްޓީސީސީގެ ޔަންމާ ކަސްޓަމަރުން އިންޖީނު ލިބުމަށް ކުރާ ދިގު އިންތިޒާރަށް ނިމުމެއް

ޔަންމާ އިން ރާއްޖޭގައި ހަރަކާތްތެރިވާތާ 50 އަހަރު ފުރުން ފާހަގަކޮށްފި އެވެ.

މިކަން ފާހަގަކުރުމަށް މިމަހުގެ އަށްވަނަ ދުވަހުގެ ރޭ ހޮޓެލް ޖެންގައި ބޭއްވި ހަފްލާ ޝަރަފްވެރިކޮށްދެއްވީ ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޓަކެއޫޗީ މިދޯރީ އެވެ. މި ހަފްލާގައި ޔަންމާ ޓެކްނޮލޮޖީސްގެ ޑައިރެކްޓަރު މަސާރޫ ހިރޮސޭ އާއި ޔަންމާ އޭޝިއާގެ މެނޭޖިން ޑިރެކްޓަރޔ ޖެކްސަން ޓާން އަދި ޔަންމާގެ އިސް އޮފިޝަލުންވެސް ބައިވެރިވި އެވެ.

މި ހަފްލާގައި އާރްއެސްޑަބްލިއު ނުވަތަ އޮޑިފަހަރުގައި މަސް ފިނިކޮށް ތާޒާކޮށް ބަހައްޓައިދޭ ނިޒާމު ވަނީ ތައާރަފްކޮށްފަ އެވެ. މި ނިޒާމު ރާއްޖެއަށް ތައާރަފް ކުރަން އިސްނެގީ ދިވެހި ސަރުކާރެވެ. މިކަންކުރަން މަސްވެރިންނަށް ފައިސާ ދިނުމުގެ އިންތިޒާމު ހަމަޖެހިފައިވަނީ ފިޝަރީޒް މިނިސްޓްރީގެ ގްރާންޓް ޕްރޮގްރާމުގެ ދަށުންނެވެ. އޮޑިފަހަރުގައި މަސް ފިނިކޮށް ތާޒާކޮށް ބަހައްޓައިދޭ ނިޒާމުގެ ސަބަބުން ބާނާ މަސް ތާޒާކޮށް އޭގެ ފެންވަރު ދަށްނުވާނެހެން ބެހެއްޓުމަށް މަގުފަހިކޮށްދެ އެވެ. މިކަމުގެ ސަބަބުން މަސްވެރިންނަށް މަހުގެ ހަމަ އަގު ލިބި އާމްދަނީ އިތުރުކުރުމަށް މަގުފަހިވެ އެވެ. މީގެއިތުރުން މިއަދު ފާހަގަކުރާ މަސްވެރިންގެ ދުވަހާ ގުޅުވައިގެން "އޮޑިވެރިޔާ ފޯރަމް"ގެ ނަމުގައި މިއަދު ހާއްސަ ފޯރަމެއްވެސް ބޭއްވުމަށް ހަމަޖެހިފައިވެ އެވެ.

މި ހަފްލާގައި ވާހަކަދައްކަވަމުން އެމްޓީސީސީގެ މެނޭޖިން ޑިރެކްޓަރު ޑެޕިއުޓީ ކޮމިޝަނާ އޮފް ޕޮލިސް ރިޓަޔާޑް އަހްމަދު ސައުދީ ވަނީ ދިވެހި މަސްވެރިންނާއި އޮޑިވެރިންގެ ވަރަށް ބޮޑު އެދުމެއް ހިއްސާކޮށްފަ އެވެ. އެގޮތުން ކަސްޓަމަރަށް އިންޖީނު ލިބުމާ ދޭތެރޭގައި ހޭދަވާ ހަމަހާއި ހަތް މަހުގެ މުއްދަތު އެއަށްވުރެ ކުޑަވާނެ ގޮތެއް ހަދައިދިނުމަށް ޔަންމާގެ އިސްވެރިންގެ އަރިހުގައި އެދިފަ އެވެ.

ޔަންމާގެ މެނޭޖިން ޑިރެކްޓަރު ޖެކްސަންގެ ވާހަކަފުޅުގައި ވަނީ ސައުދުގެ ހުށަހެޅުމަށް ޖަވާބެއްވެސް ދެއްވާފަ އެވެ. އެގޮތުން ދިވެހި މަސްވެރިންގެ އެދުމާ އެއްގޮތަށް މުއްދަތު ކުޑަކޮށްދިނުމަށް ޔަންމާ އިން ކުރެވެން ހުރި ކަންކަން ބަލާނެ ކަމުގައި ވިދާޅުވި އެވެ.

ޔަންމާ އަކީ ޒަމާނުއްސުރެ ރާއްޖޭގައި މަޝްހޫރު ނަމެކެވެ. އަދި ހާއްސަކޮށް މަސްވެރިންނާއި އޮޑިވެރިންގެ ތެރޭގައި ފަރިތަ ނަމެކެވެ. ރާއްޖޭގެ މަސްކަނޑުތަކަށް ޔަންމާ އިންޖީނު އެޅި ދޯންޏެއް އެންމެ ފުރަތަމަ ބޭލީ 1974 ވަނަ އަހަރު އެވެ. އެއީ "އުއްމީދު" ދޯނި ނަގިލި ނަގައި ދަތުރަށް ފެށި ދުވަހެވެ.

އުއްމީދު ދޯނީގެ އުއްމީދީ މިދަތުރު ވެގެން ދިޔައީ ރާއްޖެއާއި ޔަންމާ ކުރިއަށް އޮތް ފަސް ދަހަރަށް ގުޅުވާލަދިން ދަތުރަކަށެވެ. މިއަދު އަޅުގަނޑުމެން މި ފާހަގަކުރަނީ ޔަންމާ އިންޖީނު ރާއްޖެއަށް ތައާރަފްކޮށް ހަރަކާތްތެރިވާ 50 އަހަރު ފުރޭ ހާއްސަ މުނާސަބަތެވެ.

1970ގެ އަހަރު ތަކަކީ ދވެހިން އިންޖީނުލީ އޮޑިފަހަރާއި އެހާ ފަރިތަ ދުވަސްކޮޅަކަށް ނުވުމާ އެކު ޔަންމާ އިންޖީނަށް ދިވެހި މަސްވެރިންގެ ފަރާތުން އެންމެ އެދެވޭ ތަރުހީބެއް އެންމެ ފުރަތަމަކޮޅު ލިބިފައެއް ނުވެ އެވެ. ނަމަވެސް ޔަންމާ އިންޖީނުގެ އަވަސްކަމާއި ކުޅަދާނަކަމާއި އެ އިންޖީނުން ލިބިދޭ ގިނަގުނަ ލުއި ފަސޭހަތައް ވިސްނުނު ހިސާބުން، ޔަންމާ އިންޖީނުގެ ތަރުހީބު މަސްވެރިންނާއި އޮޑިވެރިންގެ ތެރޭގައި ބޮޑުވެގެން ދިޔައީ ފަތުއަޑުކިޔާފަ އެވެ.

ހާއްސަ ގޮތެއްގައި 1977 އާއި 1978 ވަނަ އަހަރާ ދޭތެރޭ ޔަންމާ އިންޖީނު އަޅައިދިނުމަށް އެދޭ އޮޑިވެރިންނާއި މަސްވެރިން ގިނަ ކަމާއެކު އެ އެންމެންނަށް އިޖާބަ ދިނުން އޭރުގެ ސަރުކާރަށް އެކަން ވެގެން ދިޔައީ ދަތި ކަމަކަށެވެ. އަދި 1979 ވަނަ އަހަރު 500 ދޯނީގައި އިންޖީނު އަޅައި، އިންޖީނު މަރާމާތު ކުރާ ފަސް ސެންޓަރު ގާއިމުކޮށް ފަންނީ އެހީތެރިކަން ފޯރުކޮށްދިނުމަށްޓަކައި ވޯލްޑް ބޭންކްގެ މާލީ އެހީތެރިކަމަށް ދިވެހި ސަރުކާރުން އެދިގެން އެ އެހީތެރިކަންވެސް ލިބިފައިވެ އެވެ.

ކާމިޔާބު މިމަޝްރޫއުގެ ދަށުން އޮގަސްޓް 31، 1981 ވަނަ ދުވަހުގެ ނިޔަލަށް 903 ދޯނީގައި ޔަންމާ އިންޖީނު އަޅާ ނިންމާފައިވެ އެވެ.

1980 ވަނަ އަހަރަކީ ރައްޔިތުންގެ ކުންފުނި -- މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އުފަންވެ ވުޖޫދަށް ގެނެވުނު އަހަރެވެ. އެ ހިސާބުން އޮޑިދޯނި ފަހަރުގައި ޔަންމާ އިންޖީނު އެޅުމުގެ މަސައްކަތް ދިވެހި ސަރުކާރުން އެމްޓީސީސީއާއި ހަވާލުކޮށްފައިވެ އެވެ. މިކަން ވެގެން ދިޔައީ ދިވެހިންގެ ލޭނާރު ކަމަށްވާ މަސްވެރިކަމުގެ ސިނާއަތަށް އިންގިލާބީ ބަދަލެއް ގެނުވި ކަމަކަށެވެ.

އޮޑިވެރިންނަށް ފަސޭހައިން އިންޖީނު ލިބޭނެ އިންތިޒާމު ހަމަޖެއްސުމާއި އިންޖީނު މަރާމާތުކޮށް ބެލެހެެއްޓުމަށް ބޭނުންވާ ވަސީލަތްތައް އެއްފުރާޅެއްގެ ދަށުން ލިބޭނެ އިންތިޒާމު ހަމަޖެއްސުމުގެ މަސައްކަތްތައް މިއާއެކު ފެށިގެން ދިޔަ އެވެ. މިގޮތުން ޔަންމާ އިންޖީނު މަރާމާތުކޮށް ބެލެހެއްޓުމުގެ މަސައްކަތް ކުރާ ސެންޓަރުތައް ގާއިމުކުރުމަށްޓަކައި ފަންނީ މީހުން ރާއްޖެއާއި ޖަޕާނުން ތަމްރީން ކުރެވުނެވެ.

މީގެއިތުރުން ޔަންމާ އިންޖީނުތަކަށް ބޭނުންވާ ސްޕެއާ ޕާޓްސް އާއި ކަނޑުގައި ދުއްވާ އުޅަނދުތަކަށް ބޭނުންވާ އަޑީތެލާއި އެފަދަ އެހެން ތަކެތި ރާއްޖެއިން ފަސޭހައިން ލިބެން ހުރުމުގެ މުހިއްމުކަން ފާހަގަކޮށް އެމްޓީސީސީއިން އެފަދަ ތަކެތި ލިބޭނޭ އިންތިޒާމު ހަމަޖެއްސުނެވެ. ހެޔޮއަގުގައި މިފަދަ ތަކެތި ފޯރުކޮށްދިނުމަށް ކުރެވުނު މަސައްކަތްތަކުގެ ނަތީޖާއެއްގެ ގޮތުން އެމްޓީސީސީއަކީ ރާއްޖޭގެ ޔަންމާ އިންޖީނުގެ ޑިސްޓްރިބިއުޓަރުގެ ގޮތުގައި 1987 ވަނަ އަހަރު ކަނޑައެޅުނެވެ.

ވޭތުވެދިޔަ ފަސް ދަހަރު ތެރޭ ޔަންމާ އިންޖީނުގެ އެކި މޮޑެލްތަކާއި ގުޅޭގޮތުން އާންމުން ހޭލުންތެރި ކުރުމަށް އެމްޓީސީސީ އިން ގިނަގުނަ މަސައްކަތްތަކެއްކޮށް ހަރަކާތްތަކެއް ވަނީ ހިންގާފަ އެވެ. އެމްޓީސީސީ "ކަށަވަރު ޝޯރޫމް" އިން ޔަންމާ އިންޖީނު އަބަދުވެސް ހެޔޮ އަގެއްގައި އާންމުންނަށް ލިބެން ހުރެ އެވެ.

ރާއްޖޭގެ މަސްވެރި އުޅަނދުތަކުގެ ސައިޒު 50 ފޫޓުން 120 ފޫޓަށް ބޮޑުވުމުގެ ނަތީޖާއެއްގެ ގޮތުން ޔަންމާ އިންޖީނުގެ ޑިމާންޑް ރާއްޖޭގެ ބާޒާރުގައި އުތުރިގެން ދިޔަ އެވެ. ޔަންމާ އިންޖީނަށް އޮތް ތަރުހީބު ކިތަންމެ ބޮޑުވެގެން ދިޔަ ނަމަވެސް އެމްޓީސީސީ އިން ދިޔައީ އަބަދުވެސް މި ތަރުހީބާއި އެއްވަރަށް އިންޖީނު އޮޑިވެރިންނަށް ފޯރުކޮށްދެމުންނެވެ.

ނަތީޖާއެއްގެ ގޮތުން މިހާރު ރާއްޖޭގެ މަސްވެރި އުޅަނދުތަކުގެ 80 ޕަސެންޓަކީ ޔަންމާ އިންޖީނު އަޅާފައިވާ އުޅަނދުތައްކަން އެ ކުންފުނިން ފަޙުރުވެރިކަމާއެކު ފާހަގަކުރެ އެވެ. ހަމައެހެންމެ ރާއްޖޭގެ ބާޒާރުގައި އިންބޯޑު އިންޖީނުގެ 74 ޕަސެންޓަކީ މިހާރުވެސް ޔަންމާ އެވެ. އެގޮތުން މިވަގުތުވެސް އެމްޓީސީސީ އިން އަންނަނީ އެއްވަގުތެއްގައި 20 އަށް ވުރެ ގިނަ މޮޑެލްގެ ޔަންމާ އިންޖީނަށް ހިދުމަތް ދެމުންނެވެ. އަދި އެމްޓީސީސީ އިން ވަނީ މިހާތަނަށް ތަފާތު މޮޑެލްތަކާއި ސައިޒްތަކުގެ +7000 އަށް ވުރެ ގިނަ ޔަންމާ އިންޖީނާއި +800 އަށް ވުރެ ގިނަ ޖެނެރޭޓަރު ބާޒާރުގައި ވިއްކާ ހިދުމަތް ދީފަ އެވެ. ޝައްކެތްވެސް ނެތެވެ. ޔަންމާ އިންޖީނަކީ އަވަސް ދުވެލީގައި އިތުބާރާއެކު ކަސްޓަމަރުންނަށް ހިދުމަތް ދެމުންދާ އިންޖީނެކެވެ.

އެމްޓީސީސީގެ އަމާޒަކީ ހިކުމަތްތެރިކަމާއެކު ޔަންމާ ވިޔަފާރި އިތުރަށް ފުޅާކޮށް، ދެމެހެއްޓެނިވި ގޮތެއްގައި ވިޔަފާރި ކުރިއަށް ގެންދިޔުމެވެ. ކަސްޓަމަރުންނާއި ހިއްސާދާރުންނާއި ވިޔަފާރީގެ ބައިވެރިންނާއި އާއްމު ރައްޔިތުން، ވޭތުވެދިޔަ 50 އަހަރު ދެގޮތެއް ނުވެ ޔަންމާ އިންޖީނަށް ކުރަމުން އައި އިތުބާރު ދެމެހެއްޓުމެވެ. ހަމަގައިމުވެސް އެމްޓީސީސީގެ އިހްލާސްތެރި ވެރީންނާއި ހީވާގި މުވައްޒަފުން ތިބީ މި އަޒުމުގެ މަތީގައިކަން އެ ކުންފުނިން ކަށަވަރުކޮށްދެ އެވެ. މީގެ އިތުރުން ޖަޕާނު ސަރުކާރާއި ޔަންމާ އޭޝިއާއިން ވޭތުވެދިޔަ 50 އަހަރު ރާއްޖޭގައި ޔަންމާ ވިޔަފާރި ފުޅާކުރުމަށް ކުރި ބުރަ މަސައްކަތަށާއި ދެއްވި ނުގުޑާފަދަ އެއްބާރުލުން ރައްޔިތުންގެ ކުންފުންޏާއި، ދިވެހި މަސްވެރީންނާއި، އޮޑިވެރިން އަދި ހުރިހާ ރައްޔިތުން ފާހަގަކުރަނީ ނުހަނު ޝުކުރުވެރިކަމާއެކުއެވެ. މަސްވެރިންނާއި އޮޑިވެރިން އެދެނީ ޔަންމާ އިންޖީނު ބާރު ދުވެލީގައި ދިވެހި ކަނޑުތަކުގައި އަބަދުމެ ޖީލުތަކަކަށް ދުވެލަ ދުވެލާ އޮތުމެވެ.