ވައްކަމުގެ މައްސަލައެއްގައި ކުށް ސާބިތުވެ ގޭބަންދަށް ހުކުމްކޮށްފައި ހުރި މީހަކު ފިހާރައެއް ފަޅާލައި ފޯނުތަކެއް ވަގަށް ނަގައިގެން ހައްޔަރުކޮށްފި އެވެ.
ފުލުހުން ބުނި ގޮތުގައި މިމަހުގެ 26 ވަނަ ދުވަހުގެ ފަތިހު 4:00 ހާއިރު މާފަންނުގައި ހުންނަ "ސްޕައި އެންޑް ޓެކް" ފިހާރަ ދޮރު ހަލާކުކޮށްލައިގެން ވައްކަންކުރިކަމުގެ ތުހުމަތުގައި ހައްޔަރުކޮށްފައިވަނީ ރ. މިދޫ، ބުލްބުލް، އަޒްމަލް މުހައްމަދު (40އ) އެވެ.
އޭނާ ހައްޔަރުކޮށް ބަލައިފާސްކުރިއިރު އެފިހާރައިން ވަގަށް ނަގާފައިވާކަމަށް ބެލެވޭ ފަސް ފޯނު ފެނިފައިވާ ކަމަށްވެސް ފުލުހުން ބުންޏެވެ.
ފުލުހުން ބުނި ގޮތުގައި މި މައްސަލައިގައި ހައްޔަރުކޮށްފައިވާ އަޒްމީލް އަކީ މި އަހަރުގެ އޮކްޓޫބަރު ހަވަނަ ދުވަހު "ކްރޭވެސް ޓޭކްއަވޭ" ރެސްޓޯރަންޓޫން ވައްކަންކޮށްފައިވާ މައްސަލައާ ގުޅިގެން ކުށް ސާބިތުވެ ފަސް މަހާއި 22 ދުވަހަށް ގޭބަންދުކުރުމަށް މިދިޔަ ނޮވެމްބަރު މަހުގެ ހަ ވަނަ ދުވަހު ކްރިމިނަލް ކޯޓުން ހުކުމްކޮށްފައިވާ މީހެކެވެ.
މީގެ އިތުރުން އޭނާއަކީ މީގެކުރިން އެކި މައްސަލަތަކާ ގުޅިގެން 59 ފަހަރެއްގެ މަތިން ހައްޔަރުކޮށްފައިވާ މީހެއް ކަމަށާއި މަސްތުވާތަކެތި ބޭނުންކުރުމާއި ވައްކަމާއި ފޭރުމުގެ ކުށުގެ ރެކޯޑްސް އޮންނަ މީހެއް ކަމަށްވެސް ފުލުހުން ވަނީ ބުނެފަ އެވެ.
ފުލުހުން ބުނި ގޮތުގައި މޯބައިލް ފިހާރައިން ވައްކަންކުރި މައްސަލައިގައި އޭނާ ހައްޔަރުކޮށް ބަންދާމެދު ގޮތެއް ނިންމުމަށް ކްރިމިނަލް ކޯޓަން ހާޒިރުކުރުމުން ވަނީ 15 ދުވަހުގެ ބަންދުގެ މުއްދަތެއް ދީފަ އެވެ.