މާލޭގެ ބޮޑު ސަރަހައްދެއްގައި ފެންބޮޑުވެފައިވާތީ މިވަގުތު ބަރު އުޅަނދު މާލޭގައި ނުދުއްވުމަށް އިލްތިމާސްކޮށްފި އެވެ.
ފުލުހުން މިރޭ ނެރުނު ބަޔާނެއްގައި ބުނީ މާލޭގެ ފެންބޮޑުވެ ގޭގެއަށް ފެން ވަންނަމުންދާތީ މަގުތަކުން ފެން ހިނދި އާންމު ހާލަތަކަށް އަންނަންދެން ބަރުއުޅަނދު ނުދުއްވުމަށް އިލްތިމާސް ކުރާ ކަމަށެވެ.
މީގެއިތުރުން ހަތަރުފުރޮޅުލީ އުޅަނދުތައް ޒަރޫރީ ބޭނުމެއްގައި ނޫނީ ނުދުއްވުމަށް ފުލުހުން އިލްތިމާސްކޮށްފައިވެ އެވެ.
މާލޭގައި ފެން ބޮޑުވުމާ ގުޅިގެން ސިފައިން ދަނީ މާލޭގެ އެކި ސަރަހައްދުތަކުގައި ޕަންޕް ބަހައްޓައިގެން ފެން ހިންދުމުގެ މަސައްކަތް ކުރަމުންނެވެ. އަދި ބައެއް ގެތަކާއި ފިހާރަތަކުގެ ކުރިމަތީގައި ވަނީ ވެލިބަސްތާވެސް ޖަހާފަ އެވެ.
މާލެއަށް ފާއިތުވި 26 ގަޑިއިރު ތެރޭގައި 163 މިލިމީޓަރުގެ ވާރޭ ވެހުނުއިރު މިއަދު ހަވީރު 5:00 އިން 6:00 އަށް 60 މިލިމީޓަރުގެ ވާރޭ މާލެއަށް ވެހިފައިވެ އެވެ.
މެޓް އޮފީހުން ވަނީ ހއ. އަތޮޅުން ފެށިގެން ރ. އަތޮޅަށް ހުދު އެލާޓް އަދި ބ. އަތޮޅުން ފެށިގެން ތ. އަތޮޅުގެ ރަށްތަކަށް މިރޭ 11:00 ޖަހަންދެން ރީނދޫ އެލާޓް ނެރެފަ އެވެ.