އެމެރިކާގެ ކުރީގެ ރައީސް އަދި އިންތިހާބީ ރައީސް ޑޮނަލްޑް ޓްރަމްޕަށް ކުރާ ދައުވާތަކާ ގުޅޭ ހުކުމް އިއްވުން ފަސްކުރުމަށް ނިއު ޔޯކް ކޯޓުން މިއަދު އިންކާރުކޮށްފި އެވެ.
މި މައްސަލައިގައި ޓްރަމްޕްގެ މައްޗަށް ރިޝްވަތު ދިނުމާއި ވިޔަފާރީގެ ލިޔެކިޔުންތައް ފޮރުވުމުގެ ދައުވާ ސާބިތުވެފައިވަނީ މިދިޔަ އަހަރު މެއި މަހުގެ ތެރޭގަ އެވެ.
ކޯޓުން މިހާރު ވަނީ ހުކުމް އިއްވުމަށް އަންނަ ހުކުރު ދުވަހަށް ތާވަލުކޮށްފަ އެވެ. މިއީ ޓްރަމްޕްގެ ރައީސްކަމުގެ ހުވާކުރުމުގެ ރަސްމިއްޔާތު ބޭއްވުމަށް ހަމަޖެހިފައިވާ ދުވަހުގެ 10 ދުވަސް ކުރި އެވެ.
މި މައްސަލައިގައި ޓްރަމްޕްގެ ވަކީލުން ވަނީ ހުކުމް އިއްވުން ރައީސްކަމުގެ ހުވާކުރެއްވުމުގެ ފަހަށް ފަސްކޮށްދިނުމަށް އެދިފަ އެވެ. ނަމަވެސް މައްސަލަ ބެއްލެވި ފަނޑިޔާރު ވިދާޅުވެފައިވަނީ ހުކުމް ފަސްކުރުމަށް އެދުމުގައި އެކަށީގެންވާ ސަބަބެއް ހުށަހަޅާފައި ނުވާ ކަމަށެވެ.
މި މައްސަލަ އުފެދިގެން އައީ އޮރިޔާންކާޑު އުފައްދާ ތަރިއެއް ކަމަށްވާ ސްޓޯމީ ޑެނިޔެލްސްއާ އެކު ބޭއްވި ގުޅުމެއް ފޮރުވުމަށް ރިޝްވަތު ދިނުމާ ހިސާބުންނެވެ. މި މުއާމަލާތްތައް ހިންގާފައިވަނީ 2016 ވަނަ އަހަރުގެ ރިޔާސީ އިންތިހާބުގެ ކުރިންނެވެ.
ޖޫރީން ވަނީ ޓްރަމްޕްގެ މައްޗަށް ކުރެވުނު 34 ދައުވާ ސާބިތުވާ ކަމަށް ނިންމާފަ އެވެ. ނަމަވެސް ޓްރަމްޕްގެ މައްޗަށް ޖަލު ހުކުމެއް އިއްވުމުގެ ފުރުސަތު ކުޑަކަމަށް ގާނޫނީ މާހިރުން ލަފާކުރެ އެވެ.
މި މައްސަލައާ ގުޅިގެން ޖިނާއީ ކުށެއް ސާބިތުވެފައިވާ ފުރަތަމަ އެމެރިކާ ރައީސްގެ ގޮތުގައި ޓްރަމްޕް ވަނީ ރެކޯޑު ފޮތްތަކަށް ވަދެފަ އެވެ.