މިއަހަރަކީ އެމަނިކުފާނު ވެވަޑައިގެންފައިވާ ވައުދުތައް ތަރުތީބު ކުރެވިގެން ފުއްދުމުގެ މަސައްކަތް ކުރާނެ އަހަރަކަށް ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ހޯޑެއްދޫއަށް މިއަދު ވަޑައިގެން އެ ރަށު ރައްޔިތުންނާ ބައްދަލުކުރައްވާ ރައީސް މުއިއްޒު ވިދާޅުވީ ރިޔާސީ ކެމްޕޭންގައި ރަށްރަށަށް ވަޑައިގެން ކަންތައްތަކެއް ކޮށްދިނުމަށް އެމަނިކުފާނު ވައުދުވެވަޑައިގެންފައިވާނެ ކަމަށާއި އެ ވައުދުތައް ފުއްދައިދޭނެ ކަމަށެވެ.
"މެނިފެސްޓޯގައި ހިމަނުއްވާފައި ހުރި ވައުދުތައް، ތަރުތީބު ކުރެވިގެން ފުއްދުމުގެ އަމަލީ މަސައްކަތް ކުރާނެ އަހަރަކަށް މިއަހަރު ވާނެ،" ރައީސް ވިދާޅުވި އެވެ.
އެމަނިކުފާނު ވިދާޅުވީ ލޯކަލް ކައުންސިލްތަކަށް އާމްދަނީ ލިބޭނެ މަގު ފަހިކޮށްދީގެން އަދި ކައުންސިލްތައް ބާރުވެރިކޮށްގެން ރަށްތައް ތަރައްގީކުރުމަށް ސަރުކާރުން މަސައްކަތް ކުރަމުންދާ ކަމަށެވެ. ކައުންސިލްތަކަށް އާމްދަނީ ހޯދައިދިނުމަށް ރަށާ ކައިރި ފަޅުރަށްތަކުގައި އިންޓަ ގްރޭޓެޑް ޓޫރިޒަމް ހިންގޭނެ ގޮތަށް ހަމަޖެއްސީ އެފަދަ ބޭނުމެއްގައި ކަމުގައިވެސް ވިދާޅުވި އެވެ.
ރައީސް ވިދާޅުވީ މިއަހަރުގެ ބަޖެޓަކީ ގެދޮރުވެރިކަމާއި ހައުސިން މަޝްރޫއުތައް ފެށުމުގެ ބަޖެޓް ކަމަށެވެ. ގެދޮރުވެރިކަމުގެ މަޝްރޫއުތައް މާލެ ސަރަހައްދާ އެއްގޮތަށް ރަށްރަށުގައިވެސް މިއަހަރު ކުރިއަށްދާނެ ކަމަށާއި ހޯނޑެއްދޫގައިވެސް ހައުސިން މަޝްރޫއެއް ކުރިއަށްދާނެ ކަމުގައި ވިދާޅުވި އެވެ.
"އަޅުގަނޑުވީ ހުރިހާ ވައުދަކީވެސް ފުއްދުމަށް ވީވައުދުތަކެއް. އިރާދަކުރެއްވިއްޔާ އެކަން ކުރާނަން،" ރައީސް ވިދާޅުވި އެވެ.
އެމަނިކުފާނު ވިދާޅުވީ ހޯނޑެއްދޫއަށް ދިމާވެފައިވާ ރަށްގިރުމުގެ މައްސަލައަށާއި، އުދައެރުމުގެ މައްސަލައަށް މި އަހަރުގެ ބަޖެޓުގެ ތެރެއިން ދާއިމީ ގޮތަކަށް ހައްލު ހޯދައިދޭނެ ކަމަށެވެ. އަދި ތައުލީމާއި ސިއްހީ ދާއިރާ ކުރިއެރުވުމަށާއި، ކުޅިވަރުގެ އެކި ވަސީލަތްތައް ގާއިމުކުރުމަށް މަސައްކަތް ކުރައްވާނެ ކަމުގައި ވިދާޅުވި އެވެ.
ރައީސްގެ ވާހަކަފުޅުގައި ވަނީ ހޯނޑެއްދޫގެ އެކި ކަންކަމަށް ހައްލު ގެނެސްދެއްވޭނެ ގޮތަށް، ފުރިހަމަ ސަމާލުކަން ދެއްވައިގެން އެކަންކަން ކޮށްދެއްވުމަށް މަސައްކަތްޕުޅު ކުރައްވާނެކަމުގެ ޔަގީންކަންވެސް ދެއްވާފަ އެވެ. އެގޮތުން މިއަހަރު ޕީއެސްއައިޕީ މަޝްރޫއުތަކުގެ ތެރެއިން ގެދޮރުވެރިކަން އަދި ތައުލީމަށްފަހު މަގުހެދުމަށް އިސްކަންދެވާނެ ކަން ފާހަގަކުރައްވަމުން ރައީސް ވިދާޅުވީ ހޯނޑެއްދޫ މަޝްރޫއު އެންމެ ލަސްވެގެން އަންނަ އަހަރު ނިމިގެންދާނެ ކަމަށެވެ.