ރާއްޖޭގެ ބޮޑު ބަޔަކަށް މޫސުން ގޯސްވާނެ ކަމަށް ލަފާކޮށްފައިވާތީ ރައްޔިތުންނަށް އެހީވުމަށާއި ލިބިދާނެ ގެއްލުންތައް ކުޑަކުރުމަށް އެހީވުމުގެ ގޮތުން ހާއްސަ ޓާސްކްފޯސްއެއް އުފައްދައިފި އެވެ.
ޓާސްކްފޯސްގައި ހިމެނޭ އިދާރާތަކަކީ އެމްއެންޑީއެފް، ޕޮލިސް އަދި ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އެވެ.
ޓާސްކްފޯސްގެ ބޭފުޅުން މަސައްކަތް ކުރުމަށްޓަކައި އެމްއެންޑީއެފްގެ މައި އިދާރާ -- ބަންޑާރަކޮށީގައި ވަނީ ޖޮއިންޓް އޮޕަރޭޝަން ސެންޓަރެއްވެސް ގާއިމުކޮށްފަ އެވެ.
ނޫސްވެރިންނަށް މިއަދު މައުލޫމާތު ދެއްވަމުން ޗީފް އޮފް ޑިފެންސް ފޯސް މޭޖަ ޖެނަރަލް އިބްރާހީމް ހިލްމީ ވިދާޅުވީ މިމަހުގެ 18 ވަނަ ދުވަހުގެ ނިޔަލަށް މޫސުން ގޯސްވާނެ ކަމަށް ލަފާކޮށްފައިވާތީ އެ މުއްދަތަށް ޖޮއިންޓް އޮޕަރޭޝަން ސެންޓަރު 24 ގަޑިއިރު ހިންގަމުން ގެންދާނެ ކަމަށެވެ. އަދި ސިފައިން ގާއިމުވެ ތިބޭ ރާއްޖޭގެ ހަތަރު އޭރިއާ ކޮމާންޑް ސެންޓަރުތަކުގައިވެސް ސިފައިން ތައްޔާރީ ހާލަތުގައި ތިބޭނެ ކަމަށެވެ.
ހިލްމީ ވިދާޅުވީ ބޯކޮށް ވާރޭވެހިއްޖެނަމަ މާލޭގައި ފެން ބޮޑުވާނެތީވެ މާލޭގެ ތިން ސަރަހައްދަކުން ވެލި ބަސްތާ ލިބޭނެ އިންތިޒާމު މިހާރުވެސް ހަމަޖައްސާފައިވާ ކަމަށެވެ. އެގޮތުން އެ އިންތިޒާމު ހަމަޖައްސާފައިވަނީ ރަސްފަންނު، ހެންވޭރު ކުޑަކުދިންގެ ބަގީޗާ އަދި ސަލްމާން މިސްކިތް ކައިރީގައެވެ.
"ރައީސުލްޖުމްހޫރިއްޔާ ގެންދަވަނީ މިކަންކަން ވަރަށް ގާތުން ބައްލަވައި އިރުޝާދުތައް ދެއްވަމުން. އަދި ރައްޔިތުންނަށް ވީހާވެސް ގެއްލުން ކުޑަވާނެ ގޮތަކަށް އަމަލުކުރުމަށް ވަނީ އެދިވަޑައިގެންފައި،" ހިލްމީ ވިދާޅުވި އެވެ.
ޗީފް އޮފް ޑިފެންސް ފޯސް ވިދާޅުވީ މާލޭގައި ވެލި ބަސްތާ ޖަހަންޖެހޭ ތަންތަނުގައި ވެލިބަސްތާ ޖަހައި އަދި ޕަމްޕް ސްޓޭޝަންތައް ބޭނުންކުރަންޖެހޭ ހާލަތުގައި ބޭނުންކުރުމަށް ތައްޔާރީ ހާލަތަށް ގެނެވިފައިވާ ކަމަށެވެ.
ނޫސްވެރިންގެ މިބައްދަލުވުމުގައި ކޮމިޝަނާ އޮފް ޕޮލިސް އަލީ ޝުޖާއު ވިދާޅުވީ ރައްޔިތުންނަށް އެހީވުމަށް މުޅި ރާއްޖޭގައިވެސް ފުލުހުން ތިބީ ތައްޔާރީ ހާލަތުގައި ކަމަށެވެ. ފުލުހުން ނެތް ރަށް ރަށުގައިވެސް ކައުންސިލްތަކަށް ދޭންޖެހޭ އިރުޝާދު ދީ އެހީތެރިކަން ފޯރުކޮށްދެމުންދާ ކަމަށްވެސް ވިދާޅުވި އެވެ.
ސީޕީ ވިދާޅުވީ މޫސުން ގޯސްވާއިރު ލިބޭ ގެއްލުންތައް ކުޑަކުރެވޭނީ އިދާރާތަކުން އަޅާ ފިޔަވަޅުތަކާއި ދޭ އިރުޝާދުތަކަށް ރައްޔިތުން އެއްބާރުލުން ދީގެން ކަމަށެވެ. އެގޮތުން ސީޕީ އެންމެ ބޮޑަށް ފާހަގަކުރެއްވީ މާލޭގައި ފެން ބޮޑުވުމުން ބައެއް މަގުތަކަށް ބަރު އުޅަނދުތައް ވަނުން މަނާކުރުމުން އެކަމަށް އެއްބާރުލުން ދިނުމަށެވެ.
"އަޅުގަނޑުމެންނަށްވެސް އެނގޭ އެފަދަ ވަގުތުތަކުގައި ރައްޔިތުންނަށް ދަތިތަކެއްވެސް ވާނެކަން. އެކަމަކު އެފަދަ ފިޔަވަޅުތައް އެ އަޅަނީ ގެއްލުންތައް ކުޑަކުރުމަށް،" ސީޕީ ވިދާޅުވި އެވެ.
ޗީފް އެގްޒެކްޓިވް ހިސާން ހުސައިން ވިދާޅުވީ އެންޑީއެމްއޭ އިން ކަމާ ގުޅޭ އިދާރާތަކާ ގުޅިގެން މޫސުމީ މައްސަލަތަކަށް ތައްޔާރުވެފައިވާ ކަމަށެވެ. އެގޮތުން ރައްޔިތުންނަށް އެހީވުމަށް ކަމާ ގުޅޭ ޕްލޭންތައް ހަދައި ކައުންސިލްތަކަށް ދޭންޖެހޭ އިރުޝާދުތައް ދެމުންދާ ކަމަށް ވިދާޅުވި އެވެ.
ހިސާންވެސް އެންމެ ބޮޑަށް އެދިވަޑައިގަތީ ކަމާ ގުޅޭ އިދާރާތަކުން ދޭ އިރުޝާދުތަކަށް ތަބާވެ އަދި ލިބޭ ގެއްލުން ކުޑަކުރުމަށްޓަކައި ފަރުދީ ޒިންމާވެސް އަދާކުރެއްވުމަށެވެ.