އެެމެރިކާ އިން ރާއްޖޭގައި ހުޅުވާފައިވާ އެމްބަސީ ބަންދުކުރުމުގެ މަސައްކަތް ފަށައިފި އެވެ.
މިއީ އެމެރިކާގެ ރައީސްގެ މަގާމާ ޑޮނަލްޑް ޓްރަމްޕް ހަވާލުވެވަޑައިގަތުމަށްފަހު ހަރަދު ކުޑަކުރުމަށް އަޅުއްވާ ފިޔަވަޅުތަކުގެ ދަށުން ކުރައްވާ ކަމެކެވެ.
ޓްރަމްޕް ނިންމަވާފައިވަނީ އެމްބަސީތަކުގެ މަސައްކަތްތައް ބަލަހައްޓަމުންދާ އެމެރިކާގެ ސްޓޭޓް ޑިޕާޓްމަންޓްގެ ހަރަދުތައް 50 ޕަސަންޓް ކުޑަކުރާށެވެ. އެހެންވެ ސްޓޭޓް ޑިޕާޓްމަންޓުން ބަންދުކުރަން ނިންމާފައިވާ މިޝަންތަކާއި އެމްބަސީތަކުގެ ތެރޭގައި ރާއްޖެ ހިމެނޭ ގޮތަށް ޖުމްލަ 30 ތަނެއް ހިމެނެ އެވެ.
ރާއްޖޭގައި ހުރި އެމްބަސީ ބަންދުކުރަން ނިންމާފައިވާއިރު އެމެރިކާ އިން ރާއްޖެއަށް ހާއްސަކޮށްގެން ފުރަތަމަ ފަހަރަށ ްސަފީރެއް ކަނޑައަޅަން ނިންމީ 2022 ވަނަ އަހަަރުގެ ތެރޭގައި ޖޯ ބައިޑަންގެ ވެރިކަމުގައެވެ. އެމެރިކާ އިން ރާއްޖެއަށް ހާއްސަކޮށްގެން ކަނޑައެޅި ފުރަތަމަ ސަފީރު -- ހޫގޯ ޔޫ-ހޯ ޔޮން އޭނާގެ ސަފީރު ކަމުގެ ލިޔުން ކުރީގެ ރައީސް އިބްރާހީމް މުހައްމަދު ސޯލިހް އަތްޕުޅަށް އެރުއްވީ ސެޕްޓެމްބަރު 6، 2023 ގައެވެ.
ރާއްޖޭގައި ހުރި އެމްބަސީ ބަންދުކުރަން އެމެރިކާ އިން ނިންމިއިރު އެމެރިކާ އެމްބަސީ އެޅުމަށް ހުޅުމާލެ އިން ބިމެއްވެސް ދީފައިވެ އެވެ. ރާއްޖޭގައި ހުރި އެމެރިކާގެ އެމްބަސީ މިވަގުތު ހިންގަނީ ހުޅުމާލެ އިން އިމާރާތެއް ކުއްޔަށް ނަގައިގެންނެެވެ.
ރާއްޖޭގައި އެމެރިކާގެ އެމްބަސީ ހުޅުވުމާ ހަމައަށް ރާއްޖެއާ ގުޅޭ ކަންކަން ކުރަމުން ދިޔައީ ސްރީލަންކާގައި ހުރި އެމެރިކާގެ އެމްބަސީ ގައެވެ.
ބައިނަލްއަގްވާމީ ނޫސް އެޖެންސީތަކުން ރިޕޯޓް ކުރާ ގޮތުގައި ޓްރަމްޕް ބޭނުންވަނީ ސްޓޭޓް ޑިޕާޓްމަންޓްގެ އަންނަ އަހަރުގެ ބަޖެޓް 28.4 ބިލިއަން ޑޮލަރަށް ކުޑަކުރާށެވެ. ސްޓޭޓް ޑިޕާޓްމަންޓްގެ މިއަހަރުގެ ބަޖެޓަކީ 54.4 ބިލިއަން ޑޮލަރެވެ.
