ކުރީގެ ޑިފެންސް މިނިސްޓަރު މުހައްމަދު ނާޒިމްގެ ގެއިން ހަތިޔާރު ފެނުނު ނަމަ އެ ތަކެއްޗަކީ ނާޒިމަށް އަދި އޭނާގެ އާއިލާގެ އެއްވެސް ބޭފުޅަކަށް އެނގިގެން އެތަނުގައި ހުރި އެއްޗެއް ނޫން ކަމަށް ނާޒިމްގެ ވަކީލް މައުމޫން ހަމީދު ވިދާޅުވެއްޖެ އެވެ.
ނާޒިމްގެ ގެއިން ފެނުނު ކަމަށް ބުނާ ހަތިޔާރުގެ ފޮޓޯތަކާއި މައުލޫމާތުތައް ފުލުހުން މިއަދު އާންމުކޮށްފައި ވަނިކޮށް ނާޒިމްގެ ވަކީލްގެ ހައިސިއްޔަތުން މައުމޫން މިރޭ ނެރުއްވި ބަޔާނެއްގައިވަނީ އެ ތަކެއްޗަކީ ނާޒިމާ އަދި ނާޒިމްގެ އާއިލާގެ އެއްވެސް ބޭފުޅަކާ ގުޅުންހުރި އެއްޗެއް ނޫން ކަމަށެވެ. އަދި އެފަދަ އެއްޗެއް ހުރި ނަމަ އެ އެއްޗެއް އެތަނުގައި ހުރީ ނާޒިމާއި ނާޒިމްގެ އާއިލާއަށް އެނގުމެއް ނެތި ކަމަށް ވެސް އެ ބަޔާނުގައިވެ އެވެ.
މީގެ އިތުރުން ތަހުގީގަށް ދޭންޖެހޭ އެއްބާރުލުމާއި އެހީތެރިކަން ނާޒިމްގެ ފަރާތުން ދޭނެކަމުގެ ޔަގީން ކަން ވެސް އެ ބަޔާނުގައި ދީފައިވެ އެވެ. ރައީސް އަބްދުﷲ ޔާމީނަށް ބޮޑުބޭބެ ވިދާޅުވާ މައުމޫން ހަމީދު އެ މައްސަލައިގެ ނާޒިމްގެ ވަކީލަކަށް ހަމަޖެއްސީ އޭނާގެ ވަކީލަކަށް ކުރިން ހުންނެވި ކުރީގެ ބަންޑާރަ ނައިބު އައިޝަތު އާޒިމާ ޝަކޫރު ނާޒިމްގެ ވަކީލުކަމުން ވަކިވުމުންނެވެ.