އިޓަލީގެ ރައީސް ކަމަށް އެ ގައުމުގެ ދުސްތޫރީ ކޯޓުގެ ފަނޑިޔާރަކު މިއަދު އިންތިޚާބުކޮށްފި އެވެ.
އުމުރުން 73 އަހަރުގެ ސާގިއޯ މަޓަރެއްލާ އެ މަގާމަށް އިންތިޚާބުކޮށްފައިވަނީ އިޓަލީގެ ގާނޫނު ހަދާ މަޖިލީހުގައި އެކަމަށް ނެގި ވޯޓުގެ ހަތަރު ވަނަ ބުރުންނެވެ. އޭނާގެ ނަން މަޖިލީހަށް ހުށަހެޅުއްވީ ބޮޑުވަޒީރު މަޓޭއޯ ރެންޒީ އެވެ.
ކުރިން އިޓަލީގެ ޑިފެންސް މިނިސްޓަރު ކަން ވެސް ކުރެއްވި ސާގިއޯ އެ ގައުމުގެ ދުސްތޫރީ ކޯޓުގެ ފަނޑިޔާރުގެ މަގާމަށް ވަޑައިގަތީ 2011 ގަ އެވެ. އަންނަ ހަފުތާގެ ތެރޭގައި ރައީސްކަމުގެ ހުވާ އޭނާ ކުރައްވާނެ ކަމަށް ރިޕޯޓްތައް ބުނެއެވެ.
އިޓަލީގެ ގާނޫނު އޮންނަ ގޮތުން އެ ގައުމުގެ ރައީސްކަމުގެ މަގާމަކީ ރަމްޒީ މަގާމެކެވެ. ނަމަވެސް ބޮޑުވަޒީރުގެ މަގާމަށް ބޭފުޅުންގެ އައްޔަން ކުރުމާއި މަޖިލިސް އުވާލުމުގެ އިތުރުން އިންތިޚާބު އިއުލާން ކުރުމުގެ ބާރު އެ ގައުމުގެ ރައީސަށް އޮވެއެވެ.
ކުރިއަށް އޮތް ހަތް އަހަރު ދުވަހަށް އިޓަލީގެ ރައީސް ކަމަށް ސާގިއޯ އިންތިޚާބު ކުރީ ކުރިން ރައީސަކަށް ހުންނެވި ޖިއޯޖޯ ނަޕޮލިޓާނޯ މިމަހުގެ ކުރީކޮޅު އެ މަގާމުން އިސްތިއުފާ ދެއްވުމުންނެވެ. އޭނާ އިސްތިއުފާ ދެއްވީ ސިއްހީ ހާލަތު ހުރިގޮތުން ކަމަށް ބުނެއެވެ.