ށ. އަތޮޅު ފީވަކުގެ ގޮނޑުދޮށްތަކަށް ގިނަ އަދަދެއްގެ މަސް މަރުވެގެން ލައްގާތީ މަސްތައް ނަގައި ސާފުކުރުމުގެ މަސައްކަތް އެރަށުގެ ރައްޔިތުންނާއި ފުލުހުން ގުޅިގެން ފަށައިފި އެވެ.
ފީވަކަށް މަރުވެފައިވާ މަސްތައް ކުނިވެގެން ލައްގަން ފަށާފައިވާއިރު އެ އަތޮޅު މިލަންދޫއަށްވެސް މި ދުވަސްވަރު ދަނީ މަރުވެފައިވާ މަސްތައް ގިނަ އަދަދަކަށް ލައްގަމުންނެވެ.
ފުލުހުން ބުނީ ފީވަކުގެ ގޮނޑުދޮށަށް މަރުވެފައިވާ މަސް ލައްގަން ފެށިތާ ހަފުތާއަކަށްވުރެ ގިނަ ދުވަސް ވެފައިވާ ކަމަށެވެ. ގިނަ އަދަދެއްގެ މަސް ކުނިވެ ލައްގަމުންދާތީ މަސްތައް ނެގުމުގެ މަސައްކަތް އިއްޔެ އެރަށުގައި ކުރިއަށްގެންދިޔަ ކަމަށެވެ.
"ވާލަން މަހާއި ދަންފައްޗާއި ރޮނޑާއި ލަނޑާ އަދި ބުރުޅިޔާ މަސް ހޮވައި ރައްކާތެރިކަމާއެކު އިއްޔެ ވަނީ ނައްތާލާފަ،" ފުލުހުން ބުންޏެވެ.
ދެރަށަކަށް ގިނަ އަދަދެއްގެ މަސް މަރުވެގެން ލައްގާ ސީދާ ސަބަބު އަދި ދެނެގަނެވިފައިނުވާއިރު، މި ދުވަސްވަރު މަސްތައް އެހާ ގިނަ އަދަދަކަށް މަރުވަނީ މާބޮޑަށް ހޫނު ގަދަވުމުގެ ސަބަބުން ކަމަށް ގަބޫލުކުރާ ކަމަށް އެ މައްސަލަ ދިމާވެފައިވާ މިލަންދޫގެ ކައުންސިލުން ވަނީ ބުނެފައެވެ.
