މަޖީދީމަގުގައި ހުންނަ ކޯސްޓްލައިން ހާޑްވެއާ ފިހާރާގައި މިދިޔަ ހޯމަދުވަހު ހިނގި އަލިފާނުގެ ހާދިސާގައި ހާލުގައި ޖެހުނު މީހުންގެ ތެރެއިން މިވަގުތު ވަގުތީ ބޯހިޔާވަހިކަމުގައި ތިބީ 85 މީހުން ކަމަށް ޑިސާސްޓާ މެނޭޖްމަންޓް ސެންޓަރުން ބުނެފި އެވެ. އެހާދިސާގައި ޖުމްލަ 136 މީހުން ހާލުގައި ޖެހުނެވެ.
ޑިޒާސްޓާ މެނޭޖްމަންޓް ސެންޓަރު ހިންގުމާއި ހަވާލުވެވަޑައިގެން ހުންނެވި ޑިފެންސް މިނިސްޓްރީގެ ޑެޕިއުޓީ މިނިސްޓަރު ފާތިމަތު ތަސްނީމް މިއަދު އަވަސް އަށް ވިދާޅުވީ، މިހާތަނަށް 51 މީހުން އަމިއްލަ ގެތަކަށް ގޮސްފައިވާ ކަމަށެވެ. އެ މީހުންގެ ތެރޭގައި ހިމެނެނީ އަލިފާނުގެ ހާދިސާގެ ސަބަބުން ކުޑަ މަރާމާތަކާއެކު ގޭގައި ދިރިއުޅެވޭނެ ގޮތް ހުރި މީހުންނާއި އާއިލާގެ ފަރާތުން ބޯހިޔާވަހިކަން ލިބުނު މީހުން ކަމަށެވެ.
ކުޑަ މަރާމާތަކާއެކު ގޭގައި ދިރިއުޅެވޭނެ ފަދަ ހުރި މީހުންވެސް އެ ގެތަކަށް ފޮނުވާފައިވަނީ އެ ސެންޓަރުން ހަދަންޖެހޭ އެސެސްމަންޓްތަކާއި ބަލަންޖެހޭ ބެލުންތައް ބަލައި އެ ތަނުގެ ރައްކާތެރިކަން ހުރި މިންވަރު ވަޒަންކުރުމަށްފަހު ކަމަށް ތަސްނީމް ވިދާޅުވި އެވެ. ވަގުތީ ބޯހިޔާވެހިކަމުން ގެތަކަށް ބައެއް މީހުން ބަދަލުވީ އިއްޔެ އެވެ.
"85 މީހުން މިހާރު ވަގުތީ ބޯހިޔާވަހިކަމުގައި ތިބީ. އެއީ މިކޮޅުން އަޅުގަނޑުމެން ހަމަޖައްސައިދިން ގެސްޓްހައުސްތަކުގަ. ދެން ބާކީ އެހެންމީހުން މިވަނީ ގެތަކަށް ބަދަލުވެފައި. އޭގެތެރޭގައި އެބަ އުޅޭ އާއިލާގެ ބޭފުޅުން ކައިރިއަށް ބަދަލުވި މީހުންނާއި ކުޑަ މަރާމާތުތަކެއް ކުރަން ޖެހުނު ނަމަވެސް ގެއްލުންވި ގެތަކަށް ބަދަލުވި މީހުން. އެކަމަކު އެފަދަ ގެތަކަށް އެމީހުން ވެއްދި އިރުގަ އެތަންތަނުގެ ރައްކާތެރިކަން ހުރި މިންވަރު އަޅުގަނޑުމެން ބެލިން،" ތަސްނީމް ވިދާޅުވިއެވެ.
ތަސްނީމް ވިދާޅުވީ މަރާމާތު ބޭނުންވާ ގެތަކަށް ބައެއް މީހުން މިހާރު ބަދަލުވި ނަމަވެސް އެމީހުންނަށްވެސް ދަތިތަކެއް އެބަހުރި ކަމަށެވެ. އިއްޔެ ވާރޭވެހުނު ގަޑީގައި އެއިން ބައެއް ގެތަކުގެ އެތެރެއަށް ފެން ވަންނަ ކަމުގެ ޝަކުވާވެސް ލިބުނު ކަމަށެވެ.
އަލިފާނުގެ ހާދިސާގައި ބުރިބުރިއަށް ނަގާފައިހުރި ފަސް ގެއަކަށް ގެއްލުންވި އިރު، އެމީހުންނަށް ރައީސް ދެއްވާ ރަމްޒީ ބަދަލު ދިނުމަށް ފަށާފައިވާ އެސެސްމަންޓް ހެދުމުގެ މަސައްކަތް ވެސް ވަރަށް ބާރަށް ކުރިއަށްދާކަމަށް ތަސްނީމް ވިދާޅުވި އެވެ. އެގޮތުން މިހާތަނަށް ދެ ގެއެއް ފިޔަވާ އެހެން ހުރިހާ ގެއެއް ބަލައި ލިބުނު ގެއްލުން ހިސާބުކޮށްފައިވާ ކަމަށް ވިދާޅުވިއެވެ.
"އެތެރެއަށް ވަދެވޭނެ ގޮތެއް ނުވެގެން ދެ ގެއެއްގެ އެސެސްމަންޓް އަދިވެސް ނުހެދޭ. އެސެސްމަންޓް މި ހަދަނީ ހާލުގައި ޖެހުނު މީހުންނަށް އަލުން ދިރިއުޅުން އާބާދު ކުރުމަށް ކޮންމެވެސް ވަރެއްގެ އެހީއެއް ދޭން ސަރުކާރުން ނިންމާފައިވާތީ، އެހެންވީމަ އެކަން އަޅުގަނޑުމެން ވަރަށް ފަރުވާތެރިކަމާއެކު އެބަ ކުރަން،" ތަސްނީމް ވިދާޅުވިއެވެ.
އޭނާ ވިދާޅުވީ ހުރިހާ ގެއެއްގެ އެސެސްމަންޓް މިއަދަށް ނިންމާނެ ކަމަށެވެ. އޭރުން އެހީގެ ގޮތުގައި އެކި ފަރާތްތަކަށް ދޭންޖެހޭ އަދަދުތައް ކަނޑައެޅޭނެ ކަމަށާއި އެހީތެރިކަން ބޭނުންވާ ފަރާތްތަކަށް އެހީތެރިކަން ފޯރުކޮށްދޭންޖެހޭ މިންވަރު ހިސާބުކުރެވޭނެ ކަމަށެވެ.
"މީހުންނަށް ލިބުނު ގެއްލުން ސީދާ ބުނަން އެނގޭނީ މުޅި އެސެސްމަންޓް ނިމުނީމަ. ބައެއް ގެތައް އެބަހުރި އެއްކޮށް އަނދާފައި. ގެތަކޭ ބުންޏަސް ކޮންމެ ގެއެއްގައި އެތައް ފްލޯއެއް އެބަހުރޭ. އެއިން ކޮންމެ ފްލޯއެއްގައި ދެ އާއިލާ ނޫނީ ތިން އާއިލާވެސް އެބަ އުޅޭ. އެހެންވީމަ ގޭ ބިސީތަކަށް ބަލާއިރު ވަރަށް ގިނަ ގޭބިސީ އެބަހިމެނޭ މި ފަސް ގޭގަ. އަނެއްބައި ގެތައް ބައެއް މަރާމާތު ބޭނުންވޭ. އެހެންވީމަ ސަރުކާރުން މިހާރު މިދެނީކީ އެހީއެއް ނޫން. މިހާރު މި ފޯރުކޮށްދެނީ އެހީތެރިކަން. އެހީ ވެސް ދޭނެ. އެކަމަކު އެހީ ދޭން އެނގޭނީ ލިބިފައިހުރި ގެއްލުންތައް ހިސާބުކުރުމަށްފަހު. ދޭ އަދަދުތައް ކަނޑައެޅޭނީ އެސެސްމަންޓް ނިމުނީމަ،" ތަސްނީމް ވިދާޅުވި އެވެ.
ކޯސްޓްލައިން ހާޑްވެއާ އަނދައި ހުލިވަމުން ދިޔަ އިރު ނަގާފައިވާ ފޮޓޯއެއް: އެ ހާދިސާގައި ހާލުގައިޖެހުނު 136 މީހުންގެ ތެރެއިން ވަގުތީ ހިޔާވަހިތަކުގައި ތިބީ 85 މީހުން ކަމަށް ޑިސާސްޓަސް އިން ވަނީ ބުނެފަ -- އަވަސް ފޮޓޯ