ކެނެޑާގެ އަލްބާޓާ ޕްރޮވިންސްގެ މެކްމުރޭ އަވަށުގެ ޖަންގަލީގައި ރޯވި އަލިފާންގަނޑު ފެތުރި ބޮޑުވަމުންދާތީ އެ ސަރަހައްދުގެ ހުރިހާ އޮއިލް ކޭމްޕެއް ބަންދުކޮށްފި އެވެ. އަދި އެކޭމްޕުތަކުގައި މަސައްކަތް ކުރަމުންދިޔަ އެތައް 100 މީހުން ވަނީ ރައްކާތެރި ހިސާބުތަކަށް ބަދަލުކޮށްފަ އެވެ. އެއަވަށުގައި 12 އޮއިލް ކޭމްޕް ހުރެ އެވެ.
ރިޕޯޓުތައް ބުނާގޮތުގައި މިހާތަނަށް 600 އެއްހާ މަސައްކަތު މީހުން އަލްބާޓާގެ އެހެން އަވަށްތަކަށް ވަނީ ފޮނުވާލާފަ އެވެ. އަދި 4،000 އެއްހާ މަސައްކަތު މީހުން ސްޓޭންޑް ބައި ގައި ތިބި ކަމަށެވެ. މީގެ ދެހަފްތާއެއްހާ ދުވަސް ކުރިން ރޯވި މި އަލިފާންގަނޑުގެ ސަބަބުން 80،000 އަށްވުރެ ގިނަ މީހުންވަނީ ރައްކާތެރި ހިސާބުތަކަށް ބަދަލުކޮށްފަ އެވެ.
މި އަލިފާންގަނޑު މިދިޔަ ހަފްތާގެ ތެރޭގައި ފެތުރޭ މިންވަރު ދަށްވި ނަމަވެސް އަނެއްކާވެސް ވަނީ ބާރު ސްޕީޑެއްގައި ފެތުރެން ފަށާފަ އެވެ. މި އަލިފާންގަނޑު ފެތުރުނަ ނުދިނުމަށް ކެނެޑާގެ ފަޔާ އެންޑް ރެސްކިއުން މަސައްކަތް ކުރަމުން ދިޔަ ނަމަވެސް މިހާތަނަށް 2،400 އަށްވުރެ ގިނަ ގެ ވަނީ އަނދައި ހުލިވެފަ އެވެ.
މެކްމުރޭގެ ބޮޑު ސަރަހައްދެއް އަނދާފައިވާއިރު ކުރިއަށް އޮތް ހަފްތާތަކުގައިވެސް އިތުރު ބައިތަކެއް އަނދާނެ ކަމަށް ލަފާކުރެވޭ ކަމަށް ރިޕޯޓުތައް ބުނެ އެވެ.
މި އަލިފާންގަނޑުގައި އަނދާފައިވާ މެކްމުރޭގެ ސަރަހައްދެއް. --