ސްރީލަންކާގެ ކަނޑުގެ ސިފައިން މިދިޔަ ބުރާސްފަތި ދުވަހު އެ ގައުމުގެ އުތުރު ސަރަހައްދުގެ ކަނޑުން ބެހިފައިވާ 102 ރޮހިންޔާ މުސްލިމް ރެފިއުޖީން ސަލާމަތްކޮށްފި އެވެ.
ރެފިއުޖީންގެ ތެރޭގައި 25 ކުޑަކުދިންނާއި 30 އަންހެނުން ހިމެނެ އެވެ.
ލަންކާ ނޭވީގެ ތަރުޖަމާނު ގަޔާން ވިކްރަމަސޫރިޔާ ވިދާޅުވި ގޮތުގައި މަސްވެރިންނަށް ފެނުނު މި ރެފިއުޖީން އުޅަނދާއި ކައިރިކޮށް، އެ އުޅަނދު އިރުމަތީ ސަރަހައްދުގައި ހުރި ނޭވީ ބޭސްއަކަށް ގެންގޮސް، އެމީހުންނަށް ސިއްހީ އެހީތެރިކަމާއި، ކާނާއާއި ބޯފެން ފޯރުކޮށްދީފައިވެ އެވެ.
މިއީ ލަންކާގެ ކަނޑުން ރޮހިންޔާ ރެފިއުޖީން ސަލާމަތްކުރެވުނު ފުރަތަމަ ފަހަރެއް ނޫނެވެ. 2022 ވަނަ އަހަރުވެސް ސްރީލަންކާގެ ކަނޑުން 100 ރޮހިންޔާ މުސްލިމް ރެފިއުޖީން ސަލާމަތްކޮށްފައިވެ އެވެ.
އަނިޔާވެރިކަމާއި ދާހިލީ ހަނގުރާމައިގެ ސަބަބުން މިޔަންމާ އިން 100,000 އަށް ވުރެ ގިނަ ރޮހިންޔާ މުސްލިމުން ވަނީ ފުރާނަ ސަލާމަތް ކުރުމަށްޓަކައި ގައުމު ދޫކޮށް ފިލައިގެން ގޮސްފަ އެވެ. އެގޮތުން ކުދިކުދި އުޅަނދުފަހަރުގައި ދަތުރުކުރާއިރު، ގިނަ އަދަދެއްގެ މީހުން ވަނީ ކަނޑުމަތީގައި ގެއްލިފަ އެވެ.
ބަންގްލަދޭޝްގައިވެސް ގާތްގަނޑަކަށް އެއް މިލިއަން ރޮހިންޔާ ރެފިއުޖީން ދިރިއުޅެމުންދެ އެވެ. މީގެތެރެއިން ގިނަ މީހުން އެ ގައުމަށް ގޮސްފައިވަނީ 2017 ވަނަ އަހަރު މިޔަންމާގެ ސަލާމަތީ ބާރުތަކުން ހިންގި އަނިޔާވެރި އަމަލުތަކުން ސަލާމަތްވުމަށެވެ.
ބަންގްލަދޭޝްގެ ރެފިއުޖީ ކޭމްޕްތަކުގައި ދިރިއުޅުން އުނދަގޫވުމާ ގުޅިގެން، އެތައް ހާސް ރެފިއުޖީންނެއް އަވަށްޓެރި ގައުމުތަކަށް ދިއުމަށްވެސް މަސައްކަތްކުރަމުންދެ އެވެ. އަދި ނޮވެމްބަރު މަހުން ފެށިގެން އިންޑޮނޭޝިއާއަށް އަންނަ ރެފިއުޖީންގެ އަދަދު އިތުރުވެފައިވާތީ، އެ ގައުމުން ވަނީ ބައިނަލްއަގްވާމީ މުޖުތަމައުގެ އެހީތެރިކަމަށް އެދިފަ އެވެ.
ދެހާސް އެކާވީސް ވަނަ އަހަރު މިޔަންމާގެ ސިފައިން، އެ ގައުމުގެ ޑިމޮކްރެޓިކް ސަރުކާރު ވައްޓާލުމާ ގުޅިގެން، މި ވަގުތު ރޮހިންޔާ ރެފިއުޖީންނަށް އެ ގައުމަށް އަނބުރާ ދިއުމުގެ ފުރުސަތު ނެތްކަން ފާހަގަކުރަން ޖެހެ އެވެ.