ވ. ކެޔޮދޫގައި ދެ ކުއްޖަކަށް އެ ކުދިންގެ މައިންބަފައިން އަނިޔާކުރާ ކަމަށް ތުހުމަތު ކުރެވޭތީ އެ ދެ ކުދިން ދައުލަތުގެ ބެލުމުގެ ދަށަށް ގެންގޮސްފި އެވެ.
ފުލުހުން ބުނީ އުމުރުން އަށް އަހަރުގެ ކުއްޖަކާއި ހަތަރު އަހަރުގެ ކުއްޖަކު ބެލުމުގައި އެ ކުދިންނަށް އަނިޔާކުރާ ކަމަށް ތުހުމަތު ކުރެވޭތީ މިއަދު މެންދުރުފަހު އެ ދެ ކުދިން ޖެންޑާ މިނިސްޓްރީގެ ބެލުމުގެ ދަށަށް ގެންގޮސްފައިވާ ކަމަށެވެ. އަދި އެ ކުދިންނަށް އަނިޔާކުރާ މައްސަލަ ތަހުގީގު ކުރަމުންދާ ކަމަށް ވެސް ފުލުހުން ބުންޏެވެ.
އެ މައްސަލަ ފުލުހުންނަށް ހުށަހަޅާފައިވަނީ ޖެންޑާ މިނިސްޓްރީންނެވެ. ވ. ރަކީދޫގައި ތިން އަހަރުގެ ކުއްޖަކަށް އަނިޔާކޮށް، އެ ކުއްޖާ މަރާލި މައްސަލަ ފެންމަތިވުމާ އެކު ކުޑަކުދިންނަށް އަނިޔާކޮށް، އަދި އެ ކުދިންނާ މެދު އިހުމާލުވާ ކަމަށް ތުހުމަތު ކުރެވޭ ގިނަ މައްސަލަތަކެއް ފުލުހުންނަށް މިހާރު ދަނީ ހުށަހަޅަމުންނެވެ.