މަސްތުވާ ބާވަތެއް ގޭ ތެރެއަށާއި އޮފީހާއި ކާރުގެ ތެރެއަށްލައި ތުހުމަތުތަކެއް އަޅުވަން ރާވަމުން އަންނަ ކަމަށް ރައްޔިތުންގެ މަޖިލީހުގެ ކިނިބިދޫ ދާއިރާގެ މެންބަރު އަބްދުﷲ ރިޔާޒު ތުހުމަތު ކުރައްވައިފި އެވެ.
ރޭ ވީޓީވީގެ ޕްރޮގްރާމެއްގައި ވާހަކަފުޅު ދައްކަވަމުން ކުރީގެ ޕޮލިސް ކޮމިޝަނާ ވިދާޅުވީ އޭނާ ދިރިއުޅުއްވާ ގެއަށާއި މަސައްކަތް ކުރައްވާ އޮފީސް ނޫނީ ދުއްވާ ކާރުގެ ތެރެއަށް މަސްތުވާތަކެތި ލުމަށް ފަހު، އެތަކެތި ހޯދައި ތުހުމަތުތަކެއް އަޅުވަން ބަޔަކު މީހުން ހީލަތްތެރި ރޭވުންތަކެއް ރާވަމުން ގެންދާ ކަމުގެ މައުލޫމާތު އޭނާއަށް ލިބި ވަޑައިގެންފައިވާ ކަމަށާއި އެކަން ހޯމް މިނިސްޓަރު އުމަރު ނަސީރުގެ ސަމާލުކަމަށް ވެސް ގެންގޮސްފައިވާނެ ކަމަށެވެ.
އޭގެ ތަފުސީލަށް ރޭ ވަޑައި ނުގެންނެވި ނަމަވެސް މިއަދުގެ ވަގުތެއްގައި މީޑީއާއާ އެކަން ހިއްސާ ކުރައްވާނެ ކަށް ވެސް ރިޔާޒް ވިދާޅުވި އެވެ.
މިފަދަ ވާހަކަފުޅެއް ރިޔާޒް ކުރެއްވި އިރު ކުރީގެ ޑިފެންސް މިނިސްޓަރު މުހައްމަދު ނާޒިމާ ގުޅިވަޑައިގެން ހަތިޔާރުގެ ބޭނުން ކޮށް ސަރުކާރު ވައްޓާލަން ރޭވި ކަމުގެ ތުމަތުތަކެއް އޭނާގެ މައްޗަށް ވަނީ ސަރުކާރުން ކޮށްފައެވެ. ރޭގެ ޕްރޮގްރާމްގައި ވެސް ރިޔާޒް ވަނީ ނާޒިމް ދިފާއު ކުރައްވާ ވާހަކަފުޅު ދައްކަވާފައެވެ. އޭނާ ވިދާޅުވީ ނާޒިމަށް ކުރާ ތުހުމަތުތަކުން ނާޒިމް ސަލާމަތްވެ ވަޑައިގަންނަވާނެ ކަމަށާއި ނާޒިމަކީ އިހުލާސްތެރި ސާފު ބޭފުޅެއް ކަމަށެވެ.