ތެހެރާން (31 މެއި) - އީރާނާއި ސައޫދީި އަރަބިއްޔާއާ ދެމެދު އުފެދިފައިވާ ސިޔާސީ މައްސަލަ އަށް ސުލްހަވެރި ހައްލެއް ނުހޯދި ދެ ގައުމުގެ ގުޅުން އިތުރަށް ގޯސްވެއްޖެ އެވެ. މައްސަލަ ހޫނުވެފައިވާއިރު އީރާނުން މިހާރު ބުނަނީ މި އަހަރު އެގައުމުން އެއްވެސް ބަޔަކު ހައްޖުގެ އަޅުކަމަށް މައްކާ އަށް ނޮފުވާނެ ކަމަށެވެ.
އީރާނުން މިއަދު މިގޮތަށް އިއުލާނުކޮށްފައި ވަނީ، އެގައުމުގެ ހައްޖުވެރިންނަށް މައްކާގައި ރައްކާތެރިކަމެއް ނެތް ކަމަށާއި އެ ރައްކާތެރިކަން ފޯރުކޮށްދޭން ސައޫދީ ސަރުކާރުން އެއްބަސްނުވާ ކަމަށް ބުނެ ސައުދީ ކުށްވެރިކޮށެވެ.
ސައޫދީ އާއި އީރާނާ ދެމެދު މިފަހުން މައްސަލަ ހޫނުވެ ސިޔާސީ ގުޅުން ކެނޑިފައި ވަނީ ސައޫދީ އިން ޝިއައީންގެ މަޝްހޫރު ދީނީ އިލްމުވެރިއެއްގެ މައްޗަށް މިފަހުން މަރުގެ ހުކުމް ތަންފީޒުކުރުމާ ގުޅިގެންނެވެ. އެ މައްސަލާގައި، ޝިއައީންގެ ބާރުގަދަ އީރާނުގައި މުޒާހަރާކޮށް، އެގައުމުގައި ހުންނަ ސައޫދީގެ އެމްބަސީ އާންމުން ހަމަލާ ދީފައިވާއިރު ސައޫދީން ވަނީ އެންމެފަހުން އީރާނާ ސިޔާސީ ގުޅުން ކަނޑާލައިފަ އެވެ.
އީރާނުގެ ހައްޖުވެރިންނަށް ސައޫދީ އަށް ދެވޭނެ އެންމެ ރައްކާތެރި މަގެއް ކޮށުމަށް ސައޫދީގެ އޮފިޝަލުންނާ އެކު ކުރިއަށް ގެންދެވި މަޝްވަރާތަކަށް ފަހު އީރާނުގެ ހައްޖު އޯގަނައިޒޭޝަނުން ބުނެފައި ވަނީ އީރާނުގައި ތިބި މީހުންނަށް ވިސާ ދިނުމަށް ވެސް ސައޫދީން އެއްބަސްނުވާ ކަމަށާއި ހައްޖުވެރިން މައްކާ އަށް ގެންދިއުމަށް އީރާނުގެ ފްލައިޓްތައް ބޭނުންކުރެވޭނެ ގޮތެއް ވެސް ނެތް ކަމަށެވެ.
މި މައްސަލާގައި ސައޫދީ ވެސް އޮތީ ވަރަށް ރުޅިގަދަވެފަ އެވެ. އީރާނުގެ ވާހަކަތަކަށް ރައްދު ދެމުން ސައޫދީން ބުނެފައި ވަނީ އީރާނުން އުޅެނީ މުޅި މައްސަލަ ސިޔާސީކޮށްލައިގެން ކަމަށެވެ.
އީރާނާއި ސައޫދީގެ ކޯޅުންތައް ކޮންމެ ހައްޖު މޫސުމަކާ ދިމާކޮށް އަބަދުވެސް ހޫނުވެ އެވެ. އަދި ހައްޖުގެ އަޅުކަމުގައި ބައިވެރިވާ އީރާނުގެ ޝިއައީ މުސްލިމުންނަށް ކުރިމަތިވާ އެކްސިޑެންޓްތައް ވެސް އާންމުކަން ފާހަގަކޮށްލެވެ އެވެ.
މިދިޔަ އަހަރު ވެސް މީހުން ތޮއްޖެހި ފިތުމުގެ ހާދިސާއެއްގައި 769 މީހަކު މަރުވިއިރު އޭގެ ތެރޭގައި އީރާނުގެ 464 މީހަކު ހިމެނެ އެވެ.
މި އަހަރު ހައްޖަށް މީހުން ނުފޮނުވާނެ ކަމަށް އީރާނުން އިއުލާނުކޮށްފައިވާއިރު މިއީ އިގްތިސާދީ ގޮތުން ސައުދީ އަށް އޭގެ ނޭދެވޭ އަސަރުކުރާނެ ކަމެކެވެ. ކޮންމެ އަހަރަކު ސައޫދީ އަށް އިސްލާމީ ޓޫރިޒަމް އިން 18 ބިލިއަން ޑޮލަރަށް ވުރެ ފައިސާ ވަންނައިރު އޭގެ ތެރެއިން ވަރަށް ބޮޑުބަޔަކީ އީރާނެވެ.
އީރާނުން 600،000 މީހުން ހައްޖަ ދެ އެވެ.
އީރާނާއި ސައޫދީއާ ދެމެދު މައްސަލަ ހޫނުވެފައިވާއިރު ހައްޖަށް ދާ އީރާނުގެ ޝިއައީންނާއި ސުންނީ މުސްލިމުންނާ ދެމެދު މައްސަލަ ހޫނުވެ ހަމަނުޖެހުން ހިނގުމަކީ ވެސް އާންމު ކަމެކެވެ. އެގޮތުން އެފަދަ ބޮޑު ކުރިމަތިލުމެއްގައި 400 އަށް ވުރެ ގިނަ މީހުން މަރުވެފައިވާކަން ވެސް ފާހަގަކޮށްލަން ޖެހެ އެވެ.
