ކުރީގެ ރައީސް މުހައްމަދު ނަޝީދުގެ މައްސަލަ ބަލާ ހުޅުމާލޭގެ ކޯޓްގެ ފަނޑިޔާރުންގެ ބެންޗްގެ މައްސަލައިގައި ރައީސް ނަޝީދުގެ ފަރާތްޕުޅުން ސިވިލް ކޯޓަށް ހުށަހެޅި މައްސަލާގައި އަނެއްކާވެސް ވަގުތީ އަމުރަކަށް އެދި ވަޑައިގެންނެވުމާ އެކު އަމުރާމެދު އަންނަ ހޮނިހިރު ދުވަހު ސިވިލް ކޯޓުން ގޮތެއް ނިންމާނެ ކަމަށް އެ ކޯޓުން ބުނެފިއެވެ.
ހުޅުމާލޭ ކޯޓްގެ ބެންޗްގެ މައްސަލައި ނަޝީދުގެ ފަރާތްޕުޅުން ސިވިލް ކޯޓަށް ހުށަހެޅި މައްސަލައިގައި ބުނެފައި ވަނީ ޖޭއެއްސީން ހުޅުމާލޭ ކޯޓްގެ ބެންޗު ޖޭއެސްސީން އެކުލަވައިލަން އުޅޭ ކަމަށާއި އެކަން ހުއްޓުވައި ދިނުމުގެ އަމުރަކަށް އެދިވަޑައިގަންނަވާ ކަމަށެވެ. މިފަދަ އަމުރަކަށް އެދި ހައި ކޯޓަށް ވެސް ނަޝީދުގެ ފަރާތުން ހުށަހެޅުއްވި އެވެ. ނަޝީދުގެ ވަކީލުން ވިދާޅުވީ ޖޭއެސްސީ އަށް ކޯޓެއްގެ ބެންޗު ކަނޑަނޭޅޭނެ ކަމަށާއި އެއީ ގާނޫނާ ހިލާފަށް ކުރާ ކަމެއް ކަމަށެވެ. އެހެންވެ އެކަން ހުއްޓާލުމުގެ އަމުރަކަށް އެދޭ ކަމަށް ވަކީލުން ވިދާޅުވި އެވެ.
ޖޭއެސްސީން ބުނީ އެފަދަ މަސައްކަތެއް ޖޭއެސްސީން އަދި ނުކުރާ ކަމަށާއި ނަމަވެސް އެ ބެންޗުގައި ހިމެނި ވަޑައިގެންނެވި ދެ ފަނޑިޔާރަކު އެހެން ދެކޯޓެއްގެ ފަނޑިޔާރު ކަމަށް ވަޑައިގެންފައިވާތީ އެ މަސައްކަތް ކުރަންޖެހިފައިވާ ކަމަށެވެ.
ފަނޑިޔާރު ވިދާޅުވީ އަންނަ ހޮނިހިރު ދުވަހު ބާއްވާ ޝަރީއަތުގައި، ނަޝީދު އެދިވަޑައިގެންފައިވާ ގޮތަށް ވަގުތީ އަމުރެއް ނެރުމާ މެދު ގޮތެއް ނިންމަވާނެ ކަމަށާއި މައްސަލަ ކުރިއަށް ގެންދެވޭނެތޯ ވެސް ކަނޑައަޅުއްވާނެ ކަމަށެވެ. ޖޭއެސްސީން ބުނަމުން ދަނީ ފަނޑިޔާރުންގެ ބެންޗް އެކުލަވާލީ ސުޕްރީމް ކޯޓުގެ ލަފާގެ މަތިން ކަމަށާއި އެހެންވެ އެކަމާ މެދު ސުޕްރީމް ކޯޓަށް ވުރެ ދަށު ކޯޓަކުން ގޮތެއް ނުނިންމޭނެ ކަމަށެވެ.
ބެންޗު އެކުލަވައިލުމުގެ މަސައްކަތް ހުއްޓުވުމުގެ އަމުރަކަށް ހައި ކޯޓުގައި އެދުނު ނަމަވެސް އެ ކޯޓުން ނިންމާފައި ވަނީ އެއީ އެ ކޯޓަށް ބެލުމުގެ އިހްތިސާސް ނެތް މައްސަލައެއް ކަމަށެވެ.
ނަަޝީދުގެ މައްޗަށް ދައުވާ ކުރަނީ ވެރިކަމުގައި ހުންނެވި އިރު ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ހައްޔަރުކުރި މައްސަލައިގަ އެވެ. ނަމަވެސް މައްސަލަ ބަލާ ބެންޗުގެ ސައްހަކަމާ މެދު ހުށަހަޅާފައިވާ އިޖުރާއީ މައްސަލަ ނުނިމޭތީ ޝަރީއަތް އޮންނަނީ މެދުކަނޑާލައިފަ އެވެ. ގާޒީ ހައްޔަރުކުރި މައްސަލާގައި ނަޝީދުގެ މައްޗަށް ކުރަނީ ކުށް ނުކުރާ މީހަކު ގާނޫނާ ހިލާފަށް ހައްޔަރުކުރުމުގެ ދައުވާ އެވެ.