ރާއްޖޭގައި ގަވައިދާ ހިލާފަށް އުޅޭ ބިދޭސީން ހޯދުމަށް މޯލްޑިވްސް އިމިގްރޭޝަނުން ކުރިއަށް ގެންދާ އޮޕަރޭޝަންގައި މިއަދުވެސް 25 ބިދޭސީއަކު އަތުލައިގެންފި އެވެ.
ގަވައިދާ ހިލާފަށް އުޅޭ ބިދޭސީންގެ މައްސަލަތައް ރިޕޯޓް ކުރުމަށް ހަދާފައިވާ "އިމިގްރޭޝަން ވޮޗް"އަށް ލިބިފައިވާ މައުލޫމާތަކާ ގުޅިގެން މިއަދު މި އޮޕަރޭޝަން ކުރިއަށް ގެންދިޔައީ މާލޭގެ ލޯކަލް މާރުކޭޓް ސަރަހައްދާއި މަޖިދީ މަގަށްވާ ގޮތަށް ހުންނަ ހީނާމާގެ ޕާކިން ސަރަހައްދު ގައެވެ.
މިއަދުގެ އޮޕަރޭޝަންގައި 137 ބިދޭސީއަކު ބަލައި ފާސްކޮށް ގަވައިދާ ހިލާފަށް އުޅެމުން ދިޔަ 25 ބިދޭސީއަކު އަތުލައިގެންފައިވެ އެވެ.
މާލޭގެ ލޯކަލް މާރުކޭޓް ސަރަހައްދުގައި ކުރިއަށް ގެންދިޔަ އޮޕަރޭޝަންގައި އިއްޔެވެސް ވަނީ ޖުމްލަ 23 ބިދޭސީއަކު ހައްޔަރުކޮށްފަ އެވެ.
އިމިގްރޭޝަނުން މިއަދު ކުރިއަށް ގެންދިޔަ އޮޕަރޭޝަންގައި ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު އަދި ޑެޕިއުޓީ ކޮންޓްރޯލާ އަހްމަދު އަޝްފާންވެސް އަމަލީ ގޮތުން ބައިވެރިވި އެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން މިސަރުކާރަށް އެއް އަހަރުވީއިރު 5،000 އަށް ވުރެ ގިނަ ބިދޭސީން ވަނީ ޑިޕޯޓްކޮށްފަ އެވެ.
ރާއްޖޭގައި ގަވައިދާ ހިލާފަށް އުޅޭ ބިދޭސީންގެ މައްސަލަ ކުރިއަށް އޮތް ތިން އަހަރުގެ ތެރޭގައި ހައްލު ކުރާނެ ކަމަށް ސަރުކާރުން ގެންދަނީ ތަކުރާރުކޮށް ބުނަމުންނެވެ.