ދުންފަތުގެ ވަގު ވިޔަފާރި ނައްތާލުމާ ބެހޭ ޕްރޮޓޮކޯލް ގައި ރާއްޖެއިން ބައިވެރިވުމާބެހޭ މަޝްވަރާ ބައްދަލުވުމެއް ރާއްޖޭގެ ސިއްހީ ދާއިރާގައި ހަރަކާތްތެރިވާ އިސްވެރިންގެ މެދުގައި ފަށައިފި އެވެ.
ދުންފަތް ހުއްޓުވުމާއި ދުންފަތުގެ ވަގު ވިޔަފާރިއާބެހޭ މައުލޫމާތާއި، ޕްރޮޓޮކޯލްގައި ބައިވެރިވުމާބެހޭ ގޮތުން މަޝްވަރާކުރުމަށް ކަމާބެހޭ މުއައްސަސާތަކުގެ މެދުގައި ފެށި ބައްދަލުވުމަކީ، ދުންފަތް ކޮންޓްރޯލް ކުރުމަށް 2005 އިން ފެށިގެން ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާގެ ދަށުން ކުރާ މަސައްކަތެކެވެ.
އެ މުއާހަދާގެ ބައިވެރިންގެ މެދުގައި ބަހުސްކުރުމަށްފަހު ވަނީ އެ މުއާހަދާގެ ތެރޭގައި ހިމަނާފައިވާ ދުންފަތުގެ ވަގު ވިޔަފާރި ހުއްޓުވުމާ ބެހޭ ބަޔަށް މަސައްކަތްކުރުމަށް ހާއްސަ ޕްރޮޓޮކޯލްއެއް މިދިޔަ އަހަރު އެކުލަވާލާފައެވެ. ނަމަވެސް އެ ޕްރޮޓޮކޯލް އެކްޓިވް ކުރުމަށް މަދުވެގެން 40 ގައުމެއްގެ ބައިވެރިވުން ބޭނުންވުމާއި، އެ އަދަދު ހަމަވެފައި ނުވާތީ، ރާއްޖެއިން މަސައްކަތްކުރަމުންދަނީ އެ ޕްރޮޓޮކޯލްގައި ބައިވެރިވުމަށް މަސައްކަތް ކުރަމުން ކަމަށް ހެލްތު މިނިސްޓްރީން ބުންޏެވެ.
މިއަދު ފެށި މަޝްވަރާ ބައްދަލުވުން ފައްޓަވައިދެއްވުމުގެ ގޮތުން ވާހަކަދައްކަވަމުން، ރާއްޖޭގައި ހުންނަވާ ޑަބްލިޔުއެޗްއޯ ރެޕްރެޒެންޓެޓިވް ޑރ. އަރްވިންދް މާތުރު ވިދާޅުވީ، ދުންފަތުގެ އިސްތިއުމާލު ކުރުމާއި ދުންފަތް ކޮންޓްރޯލްކުރުމުގެ މަސައްކަތްތަކާ ބެހޭ މުއާހަދާގައި ދުންފަތުގެ ވަގުވިޔަފާރު ހުއްޓުވުމާ ބެހޭ ބައެއް ހިމަނާފައިވީ ނަމަވެސް، އެ މަސައްކަތަކީ ވަކިން ވަކި ކަމެއްގެ ގޮތުގައި ކުރަންޖެހިފައިވާ ކަމެއް ކަމަށް ގަބޫލުކުރައްވާ ކަމަށެވެ. އެހެންކަމުން ރާއްޖޭގައި ދުންފަތް ކޮންޓްރޯލްކުރަން މިނިސްޓަރު އިރުތިޝާމްކުރައްވަމުން ގެންދަވާ މަސައްކަތްތަކަށް ޝުކުރު އަދާކުރައްވާ ކަމަށެވެ.
އަރްވިންދް ވިދާޅުވީ، ދުންފަތުގެ ވަގު ވިޔަފާރިއަކީ ގައުމެއްގެ އިގްތިސޯދަށްވެސް އޭގެ ސަބަބުން ނުރަނގަޅު އަސަރުތަކެއް ކުރާ ކަމެއް ކަމަށާއި، ދުންފަތުގެ ވަގު ވިޔަފާރީގެ ސަބަބުން ގައުމުގެ އާމްދަނީއަށް ހީނަރުކަން އަންނާނެ ކަމަށެވެ. އަދި އެއީ ދުންފަތް ކޮންޓްރޯލްކުރުމަށް ވެސް ގައުމުތަކަށް ދިމާވާ އެންމެ ބޮޑު ގޮންޖެހުން ކަމަށް ވުމުން އެކަމަށް އެކަށީގެންވާ ފިޔަވަޅުތަކެއް އަޅަންޖެހޭ ކަމަށެވެ.
ޑރ. އިރުތިޝާމް ވިދާޅުވީ، ހެލްތު މިނިސްޓްރީން މަސައްކަތްކުރަނީ ރާއްޖޭގައި ދުންފަތުގެ އިސްތިއުމާލުކުރުން މަދުކުރުމަށް ކަމަށެވެ. މިނިސްޓަރު ވިދާޅުވީ މުއާހަދާއެއްގައި ބައިވެރިވުމަށްފަހު މުއާހަދާއާ އެއްގޮތަށް އަމަލީ މަސައްކަތްކުރުމަށް ޕްރޮޓޮކޯލްއެއް އެކުލަވާލުމަކީ މުހިއްމު ކަމެއް ކަމަށެވެ. އެހެންކަމުން މިއަދުގެ ބައްދަލުވުމުގައި ޕްރޮޓޮކޯލްގައި ބައިވެރިވުމަށް ކުރަންޖެހޭ މަސައްކަތްތަކާ ބެހޭގޮތުން ފުޅާ ދާއިރާއެއްގައި މަޝްވަރާކުރާނެ ކަމަށް މިނިސްޓަރު ވިދާޅުވި އެވެ.
"އަޅުގަނޑުމެން މިކުރާ މަސައްކަތަކީ ދުންފަތުގެ ވަބާއިން ރާއްޖެ ސަލާމަތްކުރުމުގެ މަސައްކަތް. ހާއްސަކޮށް ޒުވާނުން މިކަމުން ސަލާމަތްކުރެވޭނެ ގޮތްތައް ހޯދަން ޖެހިފައި މިއޮތީ. ދުންފަތުގެ ވަގު ވިޔަފާރިއާ ބެހޭގޮތުން ވާހަކަ ދައްކާއިރު މިއީ ކޮންކަހަލަ ކަމެއްތޯ މީހުންނަށް އެނގެން އެބަ ޖެހޭ. އެހެންވީމަ މިކަމަށް ވިޔަފާރިވެރިންވެސް އެބަ ހޭލުންތެރިކުރަންޖެހޭ،" އިރުތިޝާމް ވިދާޅުވި އެވެ.
ދުންފަތުގެ ވަގުވިޔަފާރި ހުއްޓުވުމާ ބެހޭ ޕްރޮޓޮކޯލްއެއްގައި ރާއްޖެ ބައިވެރިކުރުމުގެ މަސައްކަތް ހެލްތުން ފަށާފައި ވާއިރު، މިއަހަރު ތެރޭގައި ވަނީ ދުންފަތުގެ އިސްތިއުމާލުކުރުން ހުއްޓުވުމާ ބެހޭ ބޯޑެއްވެސް އެކުލަވާލާފަ އެވެ.