ސައިކަލެއްގައި ދިޔަ އަންހެނެއްގެ ކަރުގައި އޮތް ފަށް ފޭރެން އުޅުނު މައްސަލައިގައި ހައްޔަރުކުރި މީހާ ކުށަށް އިއުތިރާފުވެ ގެއްލުން ލިބުނު މީހާއަށް ބަދަލު ދޭން ތައްޔާރަށް ހުރި ކަމަށް ބުނެފި އެވެ.
މާލޭގެ އަލިކިލެގެފާނު މަގުގައި މިމަހުގެ 19 ވަނަ ދުވަހު ފޭރެން އުޅުމުގެ މި މައްސަލައިގައި ހައްޔަރުކޮށްފައިވަނީ ވިލިމާލެ، ފިޔަބަރި، ހަސަން އިސާމް (30އ) އެވެ.
އޭނާ ހައްޔަރުކުރީ މިމަހުގެ 20 ވަނަ ދުވަހު އެވެ.
އޭނާގެ ބަންދުގެ މުއްދަތު ހަމަވާތީ ބަންދާމެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރުކުރުމުން ވަނީ ބަންދަށް 15 ދުވަސް ދީފަ އެވެ.
ކްރިމިނަލް ކޯޓުގެ ބަންދު އަމުރުގައިވާ ގޮތުން އޭނާ ވަނީ ކުށަށް އިއުތިރާފުވާ ކަމަށް ބުނެފަ އެވެ.
ރަން ފަށް ފޭރުނު ކަމަށް ބުނި ނަމަވެސް އޭނާ އަތުގައި އެ ފަށް ނެތް ކަމަށާއި މައްސަލައިގައި އައިއޯއަށް ފުރިހަމަ އެއްބާރުލުން ދޭނެ ކަމަށްވެސް ވަނީ ބުނެފަ އެވެ. މީގެ އިތުރުން ގެއްލުން ލިބުނު މީހާއަށް ބަދަލުދޭން ތައްޔާރަށް ހުރި ކަމަށްވެސް އޭނާ ވަނީ ބުނެފަ އެވެ.
ހަސަން އިސާމްއަކީ ގިނަ އަދަދެއްގެ ކުށުގެ ރެކޯޑް އޮތް މީހެއްކަން ބަންދު އަމުރުގައި ފާހަގަކޮށްފައިވެ އެވެ.