ޔޫރަޕިއަން ޔޫނިއަން ނުވަތަ ވިލާތުގެ އިއްތިހާދުން އިނގިރޭސި ވިލާތް ވަކިވާން ނަގާ ފެންނަ ނުފެންނަ ވޯޓްގައި، އީޔޫއިން ވަކިވާން ތާއީދު ނުކުރުމަށް އެގައުމުގެ ބޮޑު ވަޒީރު ޑޭވިޑް ކެމެރަން ގޮވާލައްވައިފި އެވެ.
އިނގިރޭސި ވިލާތް އީޔޫއިން ވަކިވާން ނަގާ ފެންނަ ނުފެންނަ ވޯޓް ނަގަން ހަމަޖެހިފައިވަނީ މަދަމާ އެވެ.
ލަންޑަންގައި ހުންނަ ރަސްމީ ގެކޮޅުގެ ބޭރުގައި ހުންނަވާ ވާހަކަފުޅު ދައްކަވަމުން ކެމަރަން ވިދާޅުވީ ކޮންމެ ގޮތަކަށް ވޯޓް ދިން ކަމުގައި ވިޔަސް، އަންނަން އޮތް ޖީލުގެ މުސްތަގުބަލަށް ވެސް ވިސްނައިގެން ވޯޓް ދިނުމަށް ގޮވާލައްވާ ކަމަށެވެ.
"ހަނދާން ކުރަން ޖެހޭ ކަމަކީ ވޯޓްގެ ނަތީޖާ އަންނަ ގޮތަކީ އަލުން ބަދަލު ކުރެވޭނެ ކަމެއް ނޫންކަން،" ކެމަރަން ވިދާޅުވިއެވެ.
ކެމަރަން ވިދާޅުވީ އަވަށްޓެރިންގެ ލީޑަރަކަށް ވގެން އޮންނަން އިނގިރޭސި ވިލާތް ބޭނުންވާ ކަމަށާއި، އަދި އިނގިރޭސި ވިލާތް ނުހިމެނޭ ގޮތަކަށް އެހެން ބަޔަކު އިނގިރޭސި ވިލާތާމެދު ގޮތް ނިންމަން ބޭނުން ނުވާ ކަމަށެވެ.
"އިނގިރޭސި ވިލާތް އީޔޫއިން ވަކި ނުވާންވީ. އަވަށްޓެރިންގެ ކަންކަމުގައި އަހަރެމެން ބައިވެރިވާންވީ، އިސްނަގަންވީ. އަހަރެމެންގެ ހިއްސާ ނެތި އަހަރެމެންގެ ކަންކަމުގެ އެހެން ބަޔަކަށް ގޮތް ނިންމަން ފުރުސަތު ނުދޭންވީ،" ކެމަރަން ވިދާޅުވިއެވެ.
އިނގިރޭސި ވިލާތުގެ ބޮޑުވަޒީރު ޑޭވިޑް ކެމަރަން. އީޔޫއިން އިނގިރޭސި ވިލާތް ވަކިނުވުމަށް އޭނާ ވަނީ ގޮވާލާފަ --- ފޮޓޯ: އަނަޑަލޫ