ބައެއް އަތޮޅުތަކުގެ ރަށްތަކުގައި ޑެންގީ ހަލުވިކޮށް ފެތުރެމުންދާތީ އާއި، މިދުވަސްވަރަކީ ރާއްޖެއަށް ވާރޭވެހޭ ދުވަސްވަރަކަށް ވުމުން، މަދިރިން ރައްކާތެރިވާން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފި އެވެ.
ބައެއް ރަށްރަށުގައި ހަލުވިކަމާއެކު ޑެންގީ ފެތުރެމުންދާކަމުގެ ރިޕޯޓްތަކެއް ލިބެމުންދާއިރު، އެޗްޕީއޭއިން ބުނީ، މުޅި ރާއްޖެއަށް ބަލާއިރު ޑޭންގީ ފެތުރެމުންދާ މިންވަރު ދަށް ކަމަށެވެ. ނަމަވެސް ހއ. އާއި ލ. އަތޮޅުގެ އިތުރުން މާލެއިން ވަރަށް ބޮޑަށް ބަލި ފެތުރެމުންދާ ކަމުގެ ރިޕޯޓް ލިބިފައިވާ ކަމަށާއި އެ ދެ އަތޮޅުން ވެސް މި ދުވަސްވަރު ޑެންގީއަށް އެންމެ ގިނައިން ރިޕޯޓްކުރަނީ ހއ. އިހަވަންދޫ އާއި، ލ. އިސްދޫއިން ކަމަށެވެ.
ޑެންގީއަކީ އާންމުން އުޅޭ ތަންތަނާއި ފެނާ ރައްޓެހި މަދިރިއަކަށް ވާތީ، މިދުވަސްވަރު މަދިރިން ރައްކާތެރިވުމަށް އެ އެޖެންސީން ވަނީ އެދިފަ އެވެ.
އެޗްޕީއޭއިން މިއަދު އާންމުކުރި ތަފާސްހިސާބުތަކަށް ބަލާއިރު މިއަހަރުގެ މިހާތަނަށް ޑެންގީގެ 1294 ކޭސް ވަނީ ރިޕޯޓުކޮށްފައި ވެއެވެ. އޭގެ ތެރެއިން 868 މީހުން ރިޕޯޓުކޮށްފައިވަނީ އަތޮޅުތަކުންނެވެ. އޭޕްރިލް މަހުން ފެށިގެން މިހާތަނަށް ރިޕޯޓުކޮށްފައިވާ މިންވަރަށް ބަލާއިރު، އެންމެ ގިނަ އަދަދަކަށް ޑެންގީ ޖެހިގެން ރިޕޯޓުކުރީ މިދިޔަ މަހު އެވެ. އެއީ 354 މީހުންނެވެ.
މިއަހަރުގެ އޭޕްރިލް މަހު 168 މީހުންނަށް ޑެންގީ ޖެހިފައިވާއިރު، މޭ މަހު އެއަދަދު 329 އަށް އިތުރުވިއެވެ. މިމަހުގެ މިހާތަނަށް ޑެންގީ ޖެހިގެން ރިޕޯޓުކޮށްފައިވަނީ 129 މީހުންނެވެ.
ޑެންގީ ހުން ޖެހިގެން މި އަހަރު މިހާތަނަށް ހަތަރު މީހަކު ވަނީ މަރުވެފައެވެ.