ފަޔަށް ލިބުނު އަނިޔާ ރަނގަޅުވެގެން ކުޅުނު ފުރަތަމަ މެޗުގައި އެއަނިޔާ ތަކުރާރުވެ، މަދުވެގެން ހަ ހަފުތާ އަށް އާޔެން ރޮބެން ކުޅުމާ ދުރަށް ދާން ޖެހިއްޖެ އެވެ.
ޖަރުމަނުގެ ބަޔާން މިއުނިކަށް ކުޅޭ ނެދަލޭންޑްސްގެ މިޑްފީލްޑަރަށް އަނިޔާވީ އާ ސީޒަނަށް ތައްޔާރުވާން ކުޅުނު އެކުވެރިކަމުގެ މެޗުގައި ބޯޅަހިފައިގެން ދުއްވައިގަތުމުންނެވެ. އެއިރު މެޗުގައެި ކުޅެވުނީ އެންމެ 34 މިނިޓެވެ.
މިއަދު ހެނދުނު ކުރި ޓެސްޓްތަކުން ދެއްކި ގޮތުގައި އަނިޔާ މުޅިން ރަނގަޅުވެގެން ރޮބެން އަށް ނުކުމެވޭއިރު ޖަރުމަނު ސުޕަ ކަޕް ފައިނަލާއި ސީޒަނުގެ ފުރަތަމަ ދެ މެޗު ނިމޭނެ އެވެ.
އުމުރުން މިހާރު 32 އަހަރުގެ ރޮބެން އަކީ ޗެލްްސީ އާއި ރެއާލް މެޑްރިޑުގައި މޮޅަށް ކުޅުނު ކުޅުންތެރިއެކެވެ. ނަމަވެސް އަނިޔާގެ ސަބަބުން މިދިޔަ ސީޒަނުގެ ގިނަ މެޗުތަކެއް އޭނާ އަށް ވަނީ ގެެއްލިފަ އެވެ.
