ރެއާލް މެޑްރިޑް އާއި ސެވިއްޔާއާ ކުޅުނު މެޗު 4-2 އިން ރެއާލް ކާމިޔާބުކޮށް، ވާދަވެރި ބާސެލޯނާ ފަހަތަށް ޖައްސާލައި ލަ ލީގާގެ ޕޮއިންޓް ތާވަލުގެ ދެވަނައަށް ރެއާލް ޖެހިލައިފި އެވެ.
މެޑްރިޑްގެ ބަރުނަބިއު ސްޓޭޑިއަމްގައި ރޭ ކުޅުނު މި މެޗުގެ ފުރަތަމަ 34 މިނެޓުގެ ތެރޭގައި ރިއަލް މެޑްރިޑް ވަނީ 3-0 އިން ލީޑު ނަގާފަ އެވެ.
ރެއާލްއަށް ގޯލުތައް ކާމިޔާބުކޮށްދިނީ ކައިލިއަން އެމްބާޕޭ، ފެޑެރިކޯ ވަލްވަރްޑޭ އަދި ރޮޑްރިގޯ އެވެ. ފުރަތަމަ ހާފު ނިމުމުގެ ކުރިން ސެވިއްޔާގެ އިސާކް ރޮމޭރޯ ވަނީ އެއް ގޯލު ކާމިޔާބުކޮށްފަ އެވެ.
ދެވަނަ ހާފު ފެށިތާ 8 މިނެޓުގެ ތެރޭގައި ބްރަހިމް ޑިއާޒް ވަނީ ރެއާލް މެޑްރިޑްގެ ހަތަރުވަނަ ގޯލު ޖަހައިދީފަ އެވެ. މެޗުގެ ފަހު މިނެޓުތަކުގައި ސެވިއްޔާގެ ޑޯޑި ލުކެބަކިއޯ ވަނީ އިތުރު އެއް ގޯލު ކާމިޔާބުކޮށްފަ އެވެ. ނަމަވެސް މެޗު ނިމުނީ 4-2 އިން ރިއަލް މެޑްރިޑް ކުރީގައި އޮވެގެންނެވެ.
މި މޮޅާއެކު ރެއާލް މެޑްރިޑް ވަނީ ލަލީގާގެ ޕޮއިންޓް ތާވަލުގައި ދެވަނައަށް ޖެހިލާފަ އެވެ. މި ނަތީޖާއާއެކު މިހާރު ރެއާލް މެޑްރިޑް ދެވަނަ އަށް ޖެހިލީ 18 މެޗުން 40 ޕޮއިންޓް ހޯދައިގެންނެވެ. ބާސެލޯނާ މި ވަގުތު ތިން ވަނައިގައި އޮތީ 19 މެޗުން 38 ޕޮއިންޓާ އެކު އެވެ.
އެއްވަނައިގައި މިވަގުތު އެޓްލެޓިކޯ މެޑްރިޑް އޮތީ 18 މެޗުން 41 ޕޮއިންޓް ހޯދައިގެންނެވެ.