އެމްޑީޕީއާއި ޖޭޕީ ގުޅިގެން ފަށާފައިވާ ސިލްސިލާ މުޒާހަރާތަކުގެ ރޭގެ މުޒާހަރާގައި 10 މީހަކު ހައްޔަރުކޮށް ދެ މީހަކު ދޫކޮށްލައިފި އެވެ.
ފުލުހުން ބުނީ ރޭ 10 މީހަކު ހައްޔަރުކޮށްފައި ވަނީ މުޒާހަރާ ކުރަމުންދިޔައިރު އެ ސަރަހައްދު ބަލަހައްޓަމުންދިޔަ ފުލުހުންނަށް ހުރަސް އަޅައި އަމުރަށް ނުކިޔަމަންތެރިވުމުން ކަމަށާއި އޭގެ ތެރޭގައި ހިމެނުނުނު 18 އަހަރު ނުވާ ކުޑަކުއްޖަކާއި އަންހެނަކަށް ނަސޭހަތް ދިނުމަށްފަހު ދޫކޮށްލާފައިވާ ކަމަށެވެ.
ޖޭޕީއާއި އެމްޑީޕީން މާލޭގައި ރޭގަނޑުގެ ސިލްސިލާ މުޒާހަރާތަކެއް ފަށާފައި ވަނީ ގާނޫނު އަސާސީ ހިމާޔަތް ކުރުމުގެ ނަމުގަ އެވެ. ނަމަވެސް ރޭ މުޒާހަރާގައި ގާނޫނު އަސާސީ ހިމާޔަތް ކުރުމަށް ގޮވާލުމުގެ ބަދަލުގައި ގޮވާލާފައި ވަނީ އިއްޔެ ހައްޔަރުކޮށްފައިވާ ކުރީގެ ރައީސް މުހައްމަދު ނަޝީދު މިނިވަން ކުރުމަށެވެ.