އޭޝިއަން ކަޕް ކޮލިފައިން ބުރުން ޖާގަ ހޯދުމަށް ރާއްޖެއާ ދެކޮޅަށް ކުޅޭ މެޗަށް ތައްޔާރުވުމުގެ ގޮތުން ގަތަރުގައި ކުރިއަށް ގެންދިޔަ ޓްރެއިނިން ކޭމްޕަށްފަހު ލާއޯސް ޓީމު މިއަދު މާލެ އަތުވެއްޖެ އެވެ.
ޔުނައިޓަޑް އަރަބް އެމިރޭޓްސްގައި 2019 ވަނަ އަހަރު ބާއްވާ އޭޝިއަން ކަޕް ކޮލިފައިން އިން ޖާގަ ހޯދުމަށް ކުޅޭ ޕްލޭ އޮފްގައި ރާއްޖެއާ ލާއޯސް ބައްދަލު ކުރާ ފުރަތަމަ ލެގް މެޗް އޮންނާނީ މި އަންނަ އަންގާރަ ދުވަހުގެ ރޭ ގައުމީ ފުޓްބޯޅަ ދަނޑުގަ އެވެ.
ގަތަރުގެ ވެރިރަށް ދޯހާގައި ގާތްގަނޑަކަށް 14 ދުވަސް ވަންދެން ކުރިއަށް ގެންދިޔަ ޓްރެއިން ކޭމްޕްގައި ލާއޯސް ވަނީ ސައުދީ އަރަބިއްޔާއާ ދެކޮޅަށް ބައިނަލްއަގްވާމީ ރަހުމަތްތެރިކަމުގެ މެޗެއް ކުޅެފަ އެވެ. މީގެ އިތުރުން، ގަތަރު ލީގްގައި ވާދަ ކުރާ، އަލް އަރާޔަން އެފްސީ އާ ދެކޮޅަށްވެސް ވަނީ މެޗެއް ކުޅެފައެވެ.
ސައުދީ އަރަބިއްޔާއާ ދެކޮޅަށް ކުޅުނު މެޗުން ލާއޯސް ބަލިވީ 4-0 އިންނެވެ. އަދި އަލްއަރާޔަންއާ ދެކޮޅަށް ކުޅުނު މެޗުން ބަލިވީ 1-0 ގެ ނަތީޖާއިންނެވެ.
ރާއްޖޭގައި 2014 ވަނަ އަހަރު ބޭއްވި އޭއެފްސީ ޗެލެންޖް ކަޕްގައި ރާއްޖެއާ ލާއޯސް ވަނީ މީގެ ކުރިން ބައްދަލުކޮށްފައެވެ. އެ މެޗް 7-1 ތަފާތު ބޮޑު ނަތީޖާ އަކުން ކާމިޔާބު ކުރީ ރާއްޖެއިންނެވެ.
ކޮލިފައިންގެ ޕްރިލިމިނަރީ ބުރުގައި ރާއްޖެއާ ލާއޯސްއާ ބައްދަލު ކުރާ ދެ ވަނަ ލެގް މެޗް އޮންނާނީ އަންނަ މަހުގެ 11 ވަނަ ދުވަހު ލާއޯސްގައެވެ.