ކުޑަކަމުދާ ހޮޅީގައި ޖަރާސީމު އުފެދުމުން އެ އަޅާ ވޭން އެނގޭނީ އެކަން އެއްފަހަރު ނަމަވެސް ތަހައްމަލު ކުރި މީހަކަށެވެ. އާންމުކޮށް މި މައްސަލަ ޖެހޭ މީހުންގެ ނިސްބަތް ރާއްޖޭގައި ވެސް އިންތިހާއަށް އިތުރެވެ. މިއަކީ އުމުރުން ދޮށިވުމަކުން ނުވަތަ ހަގު ވުމަކުން ޖެހުމުގެ ޗާންސް ކުޑަވާ ކަމެއް ނޫނެވެ. ކުޑަ ކަމުދާ ހޮޅީގައި އިންފެކްޝަން އަށަގަތުމުން ދަށް ބަނޑުގައި ހޫނު ދިލައެއް ނަގައެވެ. ދަށް ބަނޑޭ ބުނުމަށްވުރެ ރަނގަޅުވާނީ ކުޑަކަމުދާ ހޮޅީގައި ދިލަ ނެގުމޭ ބުނުމެވެ. އެއާއެކު އަބަދު ފާހާނަ އަށް ދާން ބޭނުންވުމާއި، ކުޑަކަމުދާއިރު ހޫނު ދިލައެއް ނެގުން އަލާމާތްތަކުގެ ތެރޭގައި ހިމެނެ އެވެ.
ކުޑަކަމުދާ ހޮޅީގައި ޖަރާސީމް އަށަގަތުން، ނުވަތަ ޔޫރިން އިންފެކްޝަން ޖެހެން މެދުވެރިވަނީ ކޮން ސަބަބުތަކެއް ކަން ގިނަ ފަހަރަށް އޮންނަނީ އޮޅުން އަރާފަ އެވެ. ޔޫރިން އިންފެކްޝަން ޖެހެނީ ހަމައެކަނި ފެން ބޯ މިންވަރު މަދުވުމުން ބާވައެވެ. ނުވަތަ ލާ އަންނައުނާއި ބޮކްސާ ފަދަ ތަކެތި އެންމެ އެކަށީގެންވާ ވަރަށް ސާފުކޮށް ނުގެންގުޅެވޭތީ ބާވައެވެ. މި ދެ ކަމަކީ މިކަމެއް މެދުވެރިވުމުން ގިނަ ޒުވާން އަންހެންކުދިން ތަކުރާރު ކުރާ ސުވާލުތަކެކެވެ. މިފަދަ ސުވާލުތައް ކުރިމަތިވަނީ އާންމު ބަލިތަކާ ބެހޭ ގޮތުން ހޯދަންވާ ވަރަށް މައުލޫމާތު ނުހޯދޭތީ އެވެ.
ޔޫޓީއައި ޖެހިދާނެ ސަބަބުތައް ބައިވަރު!
ފެން ބޯ މިންވަރު މަދުވުމަކީ މައިގަނޑު ގޮތެއްގައި ޔޫޓީއައި އަށް މަގުފަހިކުރުވާ ކަންތަކެވެ. ފެނަކީ އިންސާނާގެ ހަށިގަނޑުގެ އެކި ގުނަންތަކުގެ ހިންގުމަށް ބޭނުންވާ ތެލެވެ. ޔޫޓީއައި އާއި އެނޫންވެސް ކުޑަކަމުދާ ނިޒާމަށް ޖެހޭ ބަލިތަކުގެ އެންމެ މައިގަނޑު ސަބަބަކީ ވެސް ފެން ބޯ މިންވަރު މަދު ވުމެވެ. ރާއްޖެއަށް ބަލާނަމަ ކުޑަކަމުދާ ނިޒާމަށް ޖެހޭ ބަލިތަކުގެ ވޭނުގައި އުޅެމުންދާ މީހުންގެ ނިސްބަތް މަދެއް ނޫނެވެ. ހޫނު ގައުމަކަށް ވާއިރު ކޮންމެ ދުވަހަކުވެސް ފެން ބޮވޭ ނިސްބަތާމެދު ދިވެހިން ވިސްނާލުން މުހިއްމެވެ.
އާންމުކޮށް ވިސްނާ ގޮތާ ހިލާފަށް ލާ ބޮކްސާ ނުވަތަ ޓައިޓް ފަދަ ތަކެތި ކިތަންމެ ސާފުކޮށް ގެންގުޅުނު ކަމުގައި ވީ ނަމަވެސް ޔޫރިން ޓްރެކް އިންފެކްޝަން ޖެހިދާނެ ކަމަށް ސިއްހީ މާހިރުން ވިދާޅުވެ އެވެ. އެހެންކަމުން މައިގަނޑު ސަބަބުތައް ހޯދާ ބައްޔަށް މަގުފަހި ވާގޮތަށް ކުރެވޭ ކަންކަން ހުއްޓާލަން ވީ އެވެ.
ސާފުތާހިރުކަން ބަހައްޓަންޖެހޭ މިންވަރަށް ސަމާލުނުވެ ޖިންސީ ގޮތުން ގައިގޯޅިވެ ވުމާއި، ކުޑަކަމުދާ ތަކެތި ހިފަހައްޓައިގެން ގިނަ އިރު ހޭދަކުރުމާއި ބަނޑު ހަރުވުން (ކޮންސްޓިޕޭޝަން) ފަދަ ކަންކަން ހުކުމަކީ ކުޑަކަމުދާ ހޮޅީގައި ބެކްޓީރިއާ އަށަގަތުމަށް މެދުވެރިވާ ކަންތައްތަކެވެ. މީގެ އިތުރުންވެސް ލޭގައި ހަކުރު ހުރުމާއި، ކިޑްނީގައި ހިލަ ހުރުމަކީވެސް ކުޑަކަމުދާ ހޮޅޫގައި ޖަރާސީމް އަށަގަންނަ ކަންކަމެވެ.
ފެމިނިން ޕްރޮޑަކްޓްސް ނުވަތަ ޕީރިއަޑް ދުވަސްތަކުގައި އަންހެންކުދިން ބޭނުންކުރާ ސެނިޓަރީ ޕެޑް ފަދަ ތަކެތި ބަދަލު ނުކޮށް ގިނަ ވަގުތު ހޭދަކުރުމަކީ ކުޑަކަމުދާ ހޮޅީގައި ވަރަށް ފަސޭހައިން ޖަރާސީމް އަށަގަންނަ ކަމެކެވެ. ބައެއް ސިއްހީ މާހިރުން ލަފާދޭގޮތުގައި މި މައްސަލަ ދިމާވާ ގިނަ އަންހެންކުދިންނަށް މައްސަލަ ދިމާވާ އެންމެ މައިގަނޑު ސަބަބަކީ އެއެވެ. އެހެންކަމުން އޮފީހުގައި އުޅޭ އިރު، ނުވަތަ ގިނަ ވަގުތު ގޭން ބޭރުގައި އުޅޭ އިރު މިފަދަ ކަންކަމަށް ސަމާލުކަން ދިނުމަކީ ބަލިން ރައްކާތެރިވުމަށް އެޅިދާނެ މުހިއްމު ފިޔަވަޅެކެވެ.