އަންނަ އަހަރުގެ ޖެނުއަރީމަހު ބާއްވަން ނިންމާފައިވާ ލޯކަލް ކައުންސިލް އިންތިހާބުގައި ރާއްޖޭން ބޭރު އެއްވެސް ގައުމެއްގައި ވޯޓު ފޮއްޓެއް ނުބަހައްޓަން އިލެކްޝަން ކޮމިޝަން (އީސީ)ން ނިންމައިފި އެވެ. އިލެކްކްޝަން ކޮމިޝަނުން އެގޮތަށް ނިންމީ މިއަދު އެވެ.
މީގެ ކުރިން ބޭއްވި ލޯކަލް ކައުންސިލް އިންތިހާބުގައި ވެސް 300 ދިވެހިން ރަޖިސްޓްރީ ކުރި ގައުމުތަކުގައި ވޯޓްފޮށި ބެހެއްޓި އެވެ.
އީސީގެ މެންބަރު އަހުމަދު އަކްރަމް މިއަދު އަވަސް އަށް ވިދާޅުވީ، ކުރިއަށް އޮތް ލޯކަލް ކައުންސިލް އިންތިހާބުގައި ރާއްޖޭން ބޭރުގެ އެއްވެސް ގައުމެއްގައި ވޯޓު ފޮށި ނުބަހައްޓާގޮތަށް އެ ކޮމިޝަނުން ނިންމާފައިވާ ކަމަށެވެ. އެގޮތަށް ނިންމީ ކަމާ ބެހޭ ފަރާތްތަކާ ވާހަކަ ދެއްކުމަށްފަހު، އެ ގޮތަކީ އެންމެ ރަނގަޅު ގޮތް ކަމުގައި ފެނުމުން ކަމަށް އަކްރަމް ވިދާޅުވި އެވެ.
"މިހާރު ކޮމިޝަނުން ނިންމާފައިމިވަނީ ލޯކަލް ކައުންސިލްގެ ވޯޓު ފޮށި ރާއްޖޭން ބޭރުގައި ނުބެހެއްޓުމަށް. އެގޮތަށް ނިންމާފައިވަނީ ކަމާބެހޭ ފަރާތްތަކާ ވާހަކަދެއްކުމަށްފަހު. ދުނިޔޭގެ އެހެން ގައުމުތަކގައި ވެސް ލޯކަލް ކައުންސިލް އިންތިހާބަކީ ގައުމުގެ އެތެރޭގައި ބާއްވާ އިންތިހާބެއް،" އަކްރަމް ވިދާޅުވި އެވެ.
ލޯކަލް ކައުންސިލް އިންތިހާބުގައި ވާދަކުރުމަށް ޕާޓީތަކަށް އީސީން މިހާރު ފުރުސަތު ހުޅުވާލާފައިވާއިރު ސިޔާސީ ޕާޓީތަކުން މިހާރު ދަނީ އެ އިންތިހާބައް ތައްޔާރުވަމުންނެވެ. ލޯކަލް ކައުންސިލް އިންތިހާބު ބޭއްވުމަށް ނިންމާފައިވަނީ އަންނަ ޖެނުއަރީ މަހުގެ 14 ވަނަ ދުވަހު އެވެ.