ރާއްޖެ އާއި ޗައިނާއާ ދެމެދު ސޮއިކޮށްފައިވާ މިނިވަން ވިޔަފާރީގެ އެއްބަސްވުމަށް އަންނަ ބުދަ ދުވަހު އަމަލުކުރަން ނިންމައިފި އެވެ.
ދެ ސަރުކާރުގެ ފަރާތުން މިކަން އިއުލާން ކުރީ ޗައިނާގެ ކޮމާސް މިނިސްޓަރު ވަންގް ވެންޓާއޯ އާއި ރާއްޖޭގެ އިކޮނޮމިކް މިނިސްޓަރު މުހައްމަދު ސައީދު މިއަދު އޮންލައިންކޮށް ބޭއްވެވި ބައްދަލުކުރެއްވުމެއްގައެވެ.
މި އެއްބަސްވުމުގައި ދިވެހި ސަރުކާރާއި ޗައިނާ ސަރުކާރުން ސޮއި ކުރީ ރައީސް އަބްދުﷲ ޔާމީންގެ ވެރިކަމުގައި 2014 ވަނަ އަހަރު އެވެ. ނަމަވެސް އޭގެފަހުން އެމްޑީޕީގެ ސަރުކާރުން މި އެއްބަސްވުމަށް އަމަލުކުރުމަށް މަސައްކަތް ކޮށްފައެއް ނުވެ އެވެ.
ޗައިނާގެ މިނިސްޓަރު ވަންގް ވެންޓާއޯ މިއަދު ވިދާޅުވީ މިނިވަން ވިޔަފާރީގެ އެއްބަސްވުމަށް އަމަލުކުރުމަށް ދެ ގައުމުވެސް މިހާރު ތައްޔާރުވެފައިވާ ކަމަށެވެ.
މިރަސްމިއްޔާތުގައި މިނިސްޓަރު ސައީދު ވިދާޅުވީ މިއެއްބަސްވުމަށް އަމަލުކުރަން ފެށުމުން ރާއްޖޭގެ އިގްތިސާދަށް ރަނގަޅު ފައިދާތަކެއް ލިބޭނެ ކަމަށެވެ. އަދި މިއެއްބަސްވުމާ އެކު ވަޒީފާގެ ފުރުސަތުތައް ހުޅުވިގެންދާނެ ކަމުގެ ޔަގީންކަންވެސް ދެއްވި އެވެ.