ރާއްޖޭގެ މަޝްހޫރު އޮޑިޓް ފާމެއް ކަމަށްވާ އޭއެޗް އެންޑް އެސޯސިއޭޓްސް އިން، އިންޓަނޭޝަނަލް އެކައުންޓިން ނެޓްވޯކެއް ކަމަށްވާ "ކްރޯ ހޯވަތް" ރާއްޖެއަށް ތައާރަފްކޮށް، ފުލް މެންބަޝިޕާއެކު އެ ކުންފުނީގެ ނަން "ކްރޯ ހޯވަތް މޯލްޑިވްސް"ގެ ނަމަށް ބަދަލުކޮށްފި އެވެ. މިއީ އޮޑިޓްކުރުމާއި، ޓެކްސްގެ ހިދުމަތް ދިނުމާއި އެނޫންވެސް ކަމާ ބެހޭ ދާއިރާތަކުން ލަފައާ އިރުޝާދު ދޭ ދުނިޔޭގެ ފެންވަރުގެ އެކައުންޓިން ފާމެކެވެ.
އޭއެޗް އެންޑް އެސޯސިއޭޓްސް ކްރޯ ހޯވަތް މޯލްޑިވްސް އަށް ރީ ބްރޭންޑް ކުރީ ރޭ ބޭއްވި ރަސްމިއްޔާތެއްގަ އެވެ. ރަސްމިއްޔާތު ޝަރަފުވެރިކޮށްދެއްވީ، މޯލްޑިވްސް ޕެންޝަން އެޑްމިނިސްޓްރޭޝަން އޮފީހުގެ ސީއީއޯ މުހައްމަދު ހުސައިން މަނިކެވެ.
ރޭގެ ރަސްމިއްޔާތުގައި ކްރޯ ހޯވަތް ގެ ފަރާތުން ވާހަކަފުޅު ދައްކަވަމުން މެނޭޖިން ޕާޓްނާ ހަސަން މުހައްމަދު ވިދާޅުވީ، ރާއްޖޭގެ ދެ ސަރަހައްދެއްގައި އެކުންފުނީގެ އޮފީސް ގާއިމްކުރާއިރު، އެ އޮފީސްތަކުން ހުރިހާ ފަންތިއެއްގެ އޮފީސްތަކަށް ހިދުމަތްދޭނެ ކަމަށެވެ.
އެ ކުންފުންޏަކީ އޮޑިޓާ ޖެނަރަލްގެ އޮފީހުން ލައިސަންސް ދޫކޮށް، މީރާއިން އެޕްރޫވްކޮށްފައިވާ "އޭ" ކެޓަގަރީގެ އޮޑިޓް ފާމެކެވެ.
ކްރޯ ހޯވަތު އިންޓަނޭޝަނަލް އަކީ ދުނިޔޭގެ އެންމެ ބޮޑު ދިހަ އެކައުންޓިން ނެޓްވޯކްތަކުގެ ތެރޭގައި ހިމެނޭ ކުންފުންޏެކެވެ. ޖުމްލަ 200 އަށްވުރެ ގިނަ މެންބަރުންނާއެކު 130 ގައުމެއްގައި 700 އެއްހާ އޮފީސް ގާއިމްކޮށްފައިވާ އެ ކުންފުނި ވެގެންދާނީީ ރާއްޖެއަށް މުހިއްމު އަދި ހައި ކޮލިޓީގެ ހިދުމަތް ދޭ ތަނަކަށް ކަމަށް ކްރޯ ހޯވަތް އިން ބުންޏެވެ.