ރާއްޖޭގައި ޗުއްޓީ ހޭދަކުރުމަށް އަންނަ ޓޫރިސްޓުންނަށް ދަތުރުފަތުރު ކުރެވޭނެ ފެންވަރު ރަނގަޅު ވަސީލަތްތައް ފަހިކޮށްދީ، އެމީހުންނަށް ދަތިވާ ކަންކަން ފުރިހަމަކޮށްދިނުމަށް ޓޫރިޒަމް ދާއިރާގެ ފަރާތްތަކުގެ ކިބައިން ރައީސް އަބްދުﷲ ޔާމީން މިއަދު އެދިވަޑައިގެންފި އެވެ.
މިއަދު ފާހަގަކުރަމުންދާ ދުނިޔޭގެ ޓޫރިޒަމް ދުވަހާ ގުޅިގެން ރައީސް ޔާމީން ނެރުއްވި މެސެޖެއްގައި ވިދާޅުވީ، ރާއްޖެއަށް އަންނަ ޓޫރިސްޓުންގެ ބޭނުންތައް ފަސޭހަކޮށްދީ، ދަތުރުފަތުރު ކުރުމުގައި ޓޫރިސްޓުންނަށް މިހާރު ދިމާވަކުން އަންނަ ދަތިތައް ނައްތާލައި އެ ކަމަށް ހައްލުތަކެއް ގެންނަން ޖެހިފައިވާ ކަމަށެވެ. ރައީސް ވިދާޅުވީ، ދަތުރުފަތުރު ކުރުމުގެ ވަސީލަތް ތަރައްގީކުރުމަކީ ރާއްޖެއަށް އަންނަ ޓޫރިސްޓުންގެ އަދަދު އިތުރުކުރުމަށް ކުރަންޖެހޭ މުހިއްމު މަސައްކަތެއް ކަމަށެވެ. އެކަންކަން ފުރިހަމަކުރުމަށ ޓޫރިޒަމް ދާއިރާގައި މަސައްކަތްކުރާ ފަރާތްތަކަށް އިލްތިމާސް ކުރައްވާ ކަމަސް ރައީސް ވިދާޅުވި އެވެ.
"..މިފަދަ (ދަތުރުފަތުރު ކުރުމުގެ)ގެ ވަސީލަތްތައް ގާއިމުކުރެވުމުން، ދިވެހިރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިރާދަކުރެއްވިއްޔާ މިހާރަށްވުރެ އިތުރުވެ، އެކަމުގެ ފައިދާ ފެނިގެންދާނެކަމަށް އަޅުގަނޑު ޔަގީންކުރަމެވެ،" ރައީސްގެ ބަޔާނުގައި ވިދާޅުވި އެވެ.
ރާއްޖޭގެ ޓޫރިޒަމް ދާއިރާގައި މިހާރު ކުރިއަށްދާ ބައެއް ބޮޑެތި މަޝްރޫއުތަކަށް އިޝާރާތްކުރައްވަމުން ރައީސް ވިދާޅުވީ، ފަތުރުވެރިކަމުގެ ސިނާއަތުން ރާއްޖެއަށާއި ރައްޔިތުންނަށް ލާބައާއި މަންފާ ހޯދައިދިނުމަށް ސަރުކާރުން ފަހިކޮށްދެވެންހުރި ކަންކަން ފަހިކޮށްދެމުން ގެންދާ ކަމަށެވެ. އެގޮތުން، ޓޫރިޒަމުން ސީދާގޮތެއްގައި ފައިދާ ލިބޭ ފަރާތްތައް އިތުރުކުރުމުގެ ގޮތުން އަމިއްލަ ފަރުދުންނަށާއި، ކުދި އަދި މެދު ފަންތީގެ ވިޔަފާރިތަކަށް މިހާރު ވެސް ފުރުސަތުތަކެއް ހުޅުވައިލާފައިވާކަން ފާހަގަކުރެއްވި އެވެ.
މެދު ފަންތީގެ ޓޫރިޒަމަށް ހާއްސަކޮށް ސަރުކާރުގެ ކުންފުންޏެއް ކަމަށްވާ، "އިންޓަރގްރޭޓަޑް ޓޫރިޒަމް ޑިވެލޮޕްމަންޓް ޕްރޮޖެކްޓް" ރާއްޖެއަށް ތައާރުފުކޮށް ހިންގުމަށް، "މޯލްޑިވްސް އިންޓަގްރޭޓަޑް ޓޫރިޒަމް ޑިވެލޮޕްމަންޓް ކޯޕަރޭޝަން"ގެ ނަމުގައި ސަރުކާރު ކުންފުންޏެއް މިއަހަރުގެ އޮގަސްޓުމަހު އުފައްދާފައިވާކަން ވެސް ރައީސް ވަނީ ފާހަގަކުރައްވާފަ އެވެ.
ޓޫރިޒަމްގެ ދުވަސް މިއަދު މުޅި ދުނިޔޭގެ އެކި ކަންކޮޅުތަކުގައި ފާހަގަކުރަމުން ދާއިރު، މިއަހަރުގެ ޝިއާރަކީ، "ފަތުރުވެރިކަން - އެންމެނަށް ވާސިލުވެވޭ ގޮތަށް ކުރިއެރުވުން"މި އެވެ. ރައީސް ވިދާޅުވީ، އެ ޝިއާރަކީ، ފަތުރުވެރިކަން ތަރައްގީ ކުރުމަށް ސަރުކާރުން ކުރިއަށް ގެންދާ ސިޔާސަތާ ވަރަށް ގުޅުން ހުރި ޝިއާރެއް ކަމަށެވެ. ރާއްޖޭގެ ޓޫރިޒަމްގެ ސިޔާސަތަކީ ހަރުދަނާ ސިޔާސަތެއް ކަމުގައި ގަބޫލުކުރެވޭ ކަމަށް ވެސް ރައީސްގެ ބަޔާނުގައި ވަނީ ވިދާޅުވެފަ އެވެ.
"... މީގެ އިތުރުންވެސް ތަފާތު ގިނަ މަޝްރޫޢުތަކެއް މުސްތަޤްބަލުގައި ތައާރުފުކުރުމުގެ މަސައްކަތްތައް ސަރުކާރުން މިދަނީ ކުރަމުންނެވެ.
ރާއްޖޭގެ ފަތުރުވެރިކަން ދެމެހެއްޓެނިވި ގޮތެއްގައި ކުރިއަށް ގެންދެވޭނީ، ދިވެހި އެންމެހައި ރައްޔިތުން އެކުގައި އެއް އަޒުމެއްގައި މަސައްކަތް ކުރައްވައިގެންނެވެ. އަދި ޤައުމު ކުރިއެރުވުމުގައި ފަތުރުވެރިކަމުގެ ސިނާއަތުގެ ބޭނުން އެންމެ ފުރިހަމަގޮތުގައި ހިފައިގެންނެވެ." ރައީސް ވިދާޅުވި އެވެ.