މިއަހަރުގެ ފެބްރުއަރީ މަހުގެ ތެރޭގައި ރާއްޖެއަށް އައި ޓޫރިސްޓު ޔޮޓެއް ކަސްޓަމްސްގެ ހުއްދަ ހޯދުމަކާ ނުލައި ރަސްމީ ބަނދަރު ދޫކޮށް އެހެން ތަނަކަށް ދަތުރުކުރުމުން 30،000 ރުފިޔާއިން ޖޫރިމަނާ ކޮށްފި އެވެ.
ރާއްޖެއިން ބޭރުން އަންނަ އުޅަނދުތަކަށް ކަސްޓަމްސްގެ ހުއްދަ ހޯދުމެއްނެތި ރަސްމީ ބަނދަރުތައް ނޫން ބަނދަރުތަކަށް ދަތުރުކުރުމަކީ މަނާ ކަމެކެވެ. އެ ގަވާއިދާ ހިލާފުވާ އުޅަނދުތަކަށް، ކަސްޓަމްސްގެ އާންމު ގަވާއިދުގެ 550 ވަނަ މާއްދާގައި ކަނޑައަޅާފައިވާ އަދަބަކީ 30،000ރ. އިން ޖޫރިމަނާ ކުރުމެވެ.
ރަސްމީ ބަދަރުތަކުގެ ގޮތުގައި ހިމެނެނީ މާލޭ ކޮމާޝަލް ހާބަރ، އިބުރާހިމް ނާސިރު އިންޓަރނޭޝަނަލް އެއާޕޯޓް، ހަނިމާދޫ އިންޓަނޭޝަނަލް އެއާޕޯޓް، ކުޅުދުއްފުށީ ސަރަހައްދީ ބަނދަރު، ގަން އިންޓަނޭޝަނަލް އެއާޕޯޓް އަދި ހިތަދޫ ސަރަހައްދީ ބަނދަރެވެ
ކަސްޓަމްސްއިން މިއަދު ނެރުނު ބަޔާނެއްގައި ބުނީ، ފެބްރުއަރީ 15 ވަނަ ދުވަހު ރާއްޖެ އައި ޓޫރިސްޓް ޔޮޓެއް ކަސްޓަމްސްގެ ހުއްދަ ނުހޯދާ ވ. ރަކީދޫ އަށް ދަތުރުކޮށްފައިވާތީ، ކަސްޓަމްސް ގާނޫނުގެ 60 ވަނަ މާއްދާގެ (ހ) އަށް ރިއާޔަތްކޮށް ކަސްޓަމްސް އާންމު ގަވާއިދުގެ 550 ވަނަ މާއްދާގެ (ރ) ގެ 12 ވަނަ ނަމްބަރުގެ ދަށުން އެއުޅަނދުގެ އެޖެންޓް ޖޫރިމަނާކޮށްފައިވާ ކަމަށެވެ.
ކަސްޓަމްސް އިން ވަނީ އެ އުޅަނދުގެ ޖޫރިމަނާ ފައިސާ ކުރިއަށް އޮތް ތިން ދުވަހުގެ ތެރޭގައި ދިނުމަށް އަންގާފައެވެ.