އެކި ދާއިރާތަކުން ފާހަގަކޮށްލެވޭ ހިދުމަތްތައް ކުރާ ޒުވާނުންގެ އަގު ވަޒަން ކުރުމުގެ ގޮތުން ސަރުކާރުން ދޭ ޒުވާނުންގެ ގައުމީ އިނާމަށް ނަން ހުށަހެޅުމުގެ ފުރުސަތު ޔޫތު މިނިސްޓްރީން ހުޅުވާލައިފި އެވެ. ޒުވާނުންގެ އިނާމް ދިނުމަށް ހަމަޖެހިފައިވަނީ ޒުވާނުންގެ ދުވަހުގެ ގޮތުގައި ފާހަގަކުރާ ނޮވެންބަރު މަހުގެ 17 ވަނަ ދުވަހު އެވެ.
ޔޫތު މިނިސްޓްރީން ކުރި އިއުލާނެއްގައި ބުނީ، މިއަހަރު ޒުވާނުންގެ ގައުމީ އިނާމު ތަފާތު 10 ދާއިރާއަކުން ދިނުމަށް ހަމަޖެހިފައިވާ ކަމަށެވެ. އަދި އެހެން އަހަރުތަކެކޭ ވެސް އެއްގޮތަށް މި އަހަރުވެސް ޝަހީދު ޖަވާދު އުމަރުގެ ހަނދާނީ ފިލާ ދިނުމަށް ހަމަޖެހިފައިވާ ކަމަށާއި، އިނާމް ލިބޭ ފަރާތްތަކަށް އެވޯޑާއި ސެޓްފިކްޓްގެ އިތުރުން ފައިސާގެ އިނާމެއް ވެސް ދޭނެ ކަމަށެވެ.
ޒުވާނުންގެ ގައުމީ އިނާމަކީ ގައުމުގެ ތަރައްގީގައި ޒުވާނުން އަދާކުރާ މުހިންމު ދައުރު ފާހަގަކޮށް ޒުވާނުންނަކީ މުޖުތަމައަށް ފައިދާހުރި، އުފެއްދުންތެރި ބަޔަކަށް ހެދުމަށް ބާރުއަޅައި، ވާގިދިނުމުގެ ގޮތުން ދެވޭ އިނާމެކެވެ. ޒުވާނުންގެ އިނާމް ލިބޭ ފަރާތްތަކަށް އެވޯޑާއި، ސެޓްފިކެޓްގެ އިތުރުން 25،000ރ. ރުފިޔާގެ ފައިސާގެ އިނާމެއް ދެ އެވެ.
އިނާމަށް ނަން ހުށަހެޅުމުގެ ފުރުސަތު ހުޅުވާލާފައިވަނީ، އަންނަ މަހުގެ 20 ވަނަ ދުވަހުގެ ނިޔަލަށެވެ. އެޕްލިކޭޝަން ފޯމް ހުށަހަޅަންޖެހޭނީ މާލޭގައި ނަމަ މާފަންނު ޔޫތު ސެންޓަރާއި، މިނިސްޓްރީ އޮފް ޔޫތު އެންޑް ސްޕޯޓްސް އަށެވެ. ރަށްރަށުން އެޕްލިކޭޝަން ހުށަހަޅާ ފަރާތްތަކުން ރަށު ކައުންސިލް މެދުވެރިކޮށް އެޕްލިކޭޝަން ހުށަހެޅޭނެ އެވެ.