މިނިވަން ވިޔަފާރީގެ އެއްބަސްވުމުގައި ސޮއިކުރާ ތާރީހުން ފެށިގެން ސުން ޕަސެންޓްގައި ޗައިނާ އަށް މަހުގެ ބާވަތްތައް ރާއްޖެއިން އެކްސްޕޯޓްކުރުމާ ބެހޭ ގޮތުން ޗައިނާއާ ރާއްޖެއިން މަޝްވަރާކޮށްފި އެވެ. އެ މަޝްވަރާތައް ކޮށްފައިވަނީ، މި މަހުގެ 26 އިން މިއަދާ ހަމަޔަށް ހޮންކޮން ގައި ބޭއްވި ޗައިނާއާ ރާއްޖެއާ ދެމެދު އެކުލަވާލަން ނިންމާފައިވާ މިނިވަން ވިޔަފާރީގެ އެއްބަސްވުމާ ބެހޭގޮތުން މަޝްވަރާކުރުމަށް ބޭއްވި ހަތަރު ވަނަ ބުރުގެ މަޝްވަރާ ބައްދަލުވުމުގަ އެވެ. މިއީ މި އެއްބަސްވުމާ ގުޅިގެން ބާއްވާ އެންމެ ފަހުގެ މަޝްވަރާ ބައްދަލުމުމެވެ.
މިއަދު ނިންމާލި އެ މަޝްވަރާ ބައްދަލުވުމަކީ ރާއްޖެ- ޗައިނާ މިނިވަން ވިޔަފާރި އެއްބަސްވުމާ ބެހޭގޮތުން ބާއްވާ އެންމެ ފަހު ބުރުގެ މަޝްވަރާ ބައްދަލުވުން ވެސް މެ އެވެ. ޗައިނާއާ އެކު ރާއްޖެއިން މިނިވަން ވިޔަފާރީގެ އެއްބަސްވުމެއްގައި ސޮއިކުރަން ނިންމާފައިވަނީ އަންނަ އަހަރުގެ ފުރަތަމަ ހަމަސް ދުވަހުގެ ތެރޭގަ އެވެ.
އިކޮނޮމިކް މިނިސްޓްރީން މިއަދު ބުނީ، މިއަދުގެ ބައްދަލުވުމުގައި އެންމެ ބޮޑަށް މަޝްވަރާކޮށްފައިވަނީ، ރާއްޖޭގައި އުފައްދާ އަދި އެކްސްޕޯޓްކުރާ މަހުގެ ބާވަތްތަކަށް އެއްބަސްވުމުގައި ސޮއިކުރާ ތާރީހުން ފެށިގެން ސުން ޕަސެންޓްގައި ރާއްޖެއިން ޗައިނާއަށް މަސް އެކްސްޕޯޓް ކުރުމަށް މަގުފަހިކުރުމާ ގުޅޭ ގޮތުން ކަމަށެވެ. އަދި ދިވެހި ވިޔަފާރިތަކަށް ހުރި ހުރަސްތައް ނައްތާލައި، ހިދުމަތާ މުދަލުގެ ވިޔަފާރިން ރާއްޖެއަށް އެންމެ ފައިދާކުރާނެ އިންތިޒާމްތަކާ ބެހޭގޮތުން ކަމަށެވެ.
އެ މިނިސްޓްރީން ބުނީ، މިނިވަން ވިޔަފާރީގެ މަޝްވަރާތަކުގައި ހޮންކޮންގުން ބައިވެރިވާން ނިންމުމާ ގުޅިގެން އެ ގައުމާ އެކު މިނިވަން ވިޔަފާރީގައި ރާއްޖެއިން ބައިވެރިވުމާ ގުޅޭ މަޝަވަރާތައްވެސް މިހާރު ފަށާފައިވާ ކަމަށެވެ. އެ މަޝްވަރާތައް އަންނަ އަހަރުގެ މެދަކާ ހަމަޔަށް ކުރިއަށް ގެންދަން ނިންމާފައިވާ ކަމަށާއި، 2017 ނިމުމުގެ ކުރިން ހޮންކޮންގާ އެކު ވެސް ރާއްޖެއިން މިނިވަން ވިޔަފާރީގެ އެއްބަސްވުމުގައި ސޮއިކުރާނެ ކަމަށެވެ.
ޗައިނާގެ އިތުރަށް، ހޮންކޮން ފަދަ ގައުމަކާއެކު އެއްބަސްވުމަކަށް އާދެވިއްޖެ ނަމަ އޭގެ ސަބަބުން ރާއްޖޭގެ މާލީ ދާއިރާ ފުޅާކޮށް ހަރުދަނާ ކުރުމަށް އިތުރު އެއްބާރުލުމެއް ލިބިގެންދާނެ ކަމަށް އެ މިނިސްޓްރީން މިއަދު ނެރުނު ބަޔާނުގައި ވަނީ ބުނެފަ އެވެ.
މިނިސްޓަރު ސައީދު ޗައިނާ-ރާއްޖެ ވާހަކަތައް ފެށުމުގެ ގޮތުން މިއަދު ސަލާމް ކުރައްވަނީ.--