މެދުކެނޑުމެއް ނެތި ސަރުކާރާ ދެކޮޅަށް އިތިއޮޕިއާގައި ކުރިއަށް ގެންދާ ސިލްސިލާ މުޒާހަރާތަކާ ގުޅިގެން މައްސަލަ ހޫނުވެ ސަރުކާރުން އެންމެ ފަހުން ގައުމުގައި ކުއްލި ނުރައްކަލުގެ ހާލަތު އިއްޔެ އިއުލާނުކޮށްފި އެވެ.
އިތިއޮޕިއާގެ ވެރިކަމުގައި މިހާރު އޮތް ޕީޕަލްސް ރިވޮލިއުޝަނަރީ ޑިމޮކްރެޓިކް ފްރޮންޓްގެ ވެރިކަމަށް 25 އަހަރު ފުރިފައިވާއިރު މީއީ އެމީހުންގެ ވެރިކަމުގައި ކުއްލި ނުރައްކަލުގެ ހާލަތު އިއުލާނުކުރި ފުރަތަމަ ފަހަރެވެ. ކުއްލި ނުރައްކަލުގެ ހާލަތު އިއުލާނުކޮށްފައި ވަނީ ހަ މަސް ދުވަހުގެ ދިގު މުއްދަތަކަށެވެ.
އެގައުމުގެ ބޮޑުވަޒީރު، ހެއިލްމޭރިއަމް ޑެސަލެން ނެރުއްވި ބަޔާނެއްގައި ވިދާޅުވެފައި ވަނީ މިފަދަ ފިޔަވަޅެއް އަޅަން ޖެހުނީ ގައުމުގެ ހާލަތު ރަނގަޅުކޮށް ސުލްހަޔަށް ފުރުސަތު ހޯދައިދިނުމުގެ ބޭނުމުގައި ކަމަށެވެ. އިތިއޮޕިއާގެ ސަރުކާރާ ދެކޮޅަށް ކުރިއަށް ގެންދާ ސިލްސިލާ މުޒާހަރާތަކުގައި އިސްކޮށް ހަރަކާތްތެރިވަނީ އެގައުމުގެ އާބާދީ ބޮޑު އޮރޯމޯސް ދަރިކޮޅުގެ މީހުންނެވެ.
ފާއިތުވި ހަ މަސް ދުވަހުގެ ވަރުގަދަ މުޒާހަރާތަކުގައި އިތިއޮޕިއާއިން މަދުވެގެން 52 މީހަކު މަރުވެފައިވާ ކަމަށް ރަސްމީ ހިސާބުތައް ދެއްކިޔަސް އިދިކޮޅު ފަރާތްތަކުން ބުނަނީ މުޒާހަރާކުރާ އާންމުންގެ ތެރެއަށް ސަލާމަތީ ބާރުތަކުން ބަޑިޖެހުމުގެ ސަބަބުން މިހާތަނަށް 500 އަށް ވުރެ ގިނަ މީހުން މަރުވެފައިވާ ކަމަށެވެ.
ގައުމުގައި ކުއްލި ނުރައްކަލުގެ ހާލަތު އިއުލާނުކޮށްފައިވާއިރު ވަރަށް ބޮޑު ސަރަހައްދަކުން މުވާސަލާތީހިދުމަތް ވެސް ވަނީ ކަނޑާލައިފަ އެވެ. އަދި އިތިއޮޕިއާގެ ގިނަ ސްޓޭޓްތަކުގައި ވަނީ ފޭސްބުކް ފަދަ ބޮޑެތި ސޯޝަލް މީޑިއާތައް ވެސް ބްލޮކްކޮށްފަ އެވެ.
އެގައުމުގައި ސަރުކާރާ ދެކޮޅު މުޒާހަރާތައް ފެށީ މިދިޔަ އަހަރުގެ ނޮވެމްބަރު މަހު އެވެ. މުޒާހަރާތަކުގެ އަސްލު ގުޅިފައި ވަނީ އާބާދީ ބޮޑު ދަރިކޮޅުތަކުގެ މީހުންނަށް ގައުމުގެ ސިޔާސީ އަދި އިގްތިސާދީ މައިދާނުން ފުރުސަތު ނުދޭ ކަމަށާއި ތަފާތުކުރުން ގެންގުޅޭ ކަމަށް ބުނާ މައްސަލައާ އެވެ.
މުޒާހަރާތަކުގައި އިސްކޮށް ހަރަކާތްތެރިވާ އޮރޯމޯ ދަރިކޮޅުގެ މީހުންނަކީ ނައިޖީރިއާގެ އާބާދީގެ 34 ޕަސެންޓެވެ. އަދި އަމްހާރާ އަކީ 27 ޕަސެންޓެވެ.
ނައިޖީރިއާގެ ވެރިރަށް އާޑިސް އަބާބާގައި ކުރިއަށް ދިޔަ މުޒާހަރާއަކަށް ކަރުނަ ގޭސްޖަހައިގެން ރޫޅާލަނީ: ހަމަނުޖެހުންތަކާ ގުޅިގެން އެގައުމުގައި ވަނީ ކުއްލި ނުރައްކަލުގެ ހާލަތު އިއުލާނުކޮށްފައި.