ސަދަގާތު ފައުންޑޭޝަނުން އަންނަ މަހުގެ 19 ގައި ފަށަން ނިންމާފައިވާ "ހިތާން މައިޒާން" އަށް ނަން ނޯޓްކުރާ ފޯމް މާދަމާ ދޫކުރަން ފަށާނެ ކަމަށް އެ ފައުންޑޭޝަނުން ބުނެފި އެވެ.
އަހަރުގެ ބޮޑު ޗުއްޓީއާ ދިމާކޮށް ސަދަގާތު ފައުންޑޭޝަނުން ބާއްވަން ނިންމާފައިވާ ހިތާން މައިޒާނަކީ އާންމުންނަށް ހުޅުވާލައިގެން އެ ޕްރޮގްރާމްގައި ހިތާނު ކުރާ ހުރިހާ ކުދިންގެ ހަރަދު އެ ފައުންޑޭޝަނުން ހަމަޖައްސައިދޭ ގޮތަށް ބާއްވާ ޕްރޮގްރާމެކެވެ.
ރައީސް ޔާމީންގެ ކެމްޕެއިން އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގެ އެ ފައުންޑޭޝަނުގެ ފަރާތުން ޒީނާޒް އަދުނާން ވިދާޅުވީ، ބޮޑު ޗުއްޓީއާ ދިމާކޮށް ސަދަގާތު ފައުންޑޭޝަނުން ބާއްވަން ނިންމާފައިވާ ހިތާނު ކުރުމުގެ ހަރަކާތް ހިލޭ ސާބަހަށް ކުރިއަށް ގެންދިއުމުގެ އިތުރަށް އެ ހަރަކާތް ބާއްވަން ހަމަޖެހިފައިވަނީ ވަރަށް ދިވެހި ވަންތަ ގޮތެއްގައި ކަމަށެވެ.
މާދަމާއިން ފެށިގެން އެ ޕްރޮގްރާމްގައި ބައިވެރިވުމުގެ ފޯމް ދޫކުރަން ފަށާއިރު، ފޯމް ހުށަހަޅަން ކަނޑައެޅިފައިވާ މުއްދަތުގައި ފޯމް ލާ ހުރިހާ ކުދިންނަށް ފުރުސަތު ދޭނެ އެވެ.
ހިތާން މައިޒާނުގައި ހިތާނުކުރުމަށް އެދޭ ފަރާތްތަކަށް ފޯމް ދޫކުރުމާއި ބަލައިގަތުން އޮންނާނީ މާދަމާއިން އިން ފެށިގެން މިމަހުގެ 22 ވަނަ ދުވަހާ ހަމަޔަށެވެ. ފޯމް ދޫކުރުމާއި ބަލައިގަތުމުގެ ހިދުމަތް އެމްޓީސީސީ ފެރީ ޓާމިނަލްތަކުގެ ބޭރުގައި ބަހައްޓާފައިވާ އެ ފައުންޑޭޝަންގެ މޭޒުތަކުން ލިބޭނެ އެވެ. އެ މޭޒުތައް ބަހައްޓާފައި ހުންނާނީ މާދަމާއިން ފެށިގެން ކޮންމެ ދުވަހެއްގެ ވެސް މެންދުރު ފަހު 2:00 އިން ރޭގަނޑު 10:00 އަށެވެ.