އެމެރިކާގެ ރިޕަބްލިކަން ޕާޓީ އިން ކުރިއަށް އޮތް ރިއާސީ އިންތިހާބަށް ނެރެފައިވާ ކެންޑިޑޭޓް، ޑޮނަލްޑް ޓްރަމްޕަށް ރިޕަބްލިކަން ޕާޓީގެ އިސް މެމްބަރުން ތާއީދުނުކުރެއްވުމަށާއި ވޯޓް ދޭން ނިންމަވާފައިވާ ފަރާތްތައް ވެސް އެ ހިޔާލު ދޫކޮށްލެއްވުމަށް އެމެރިކާގެ ރައީސް ބަރަކް އޮބާމާ އެބޭފުޅުންނަށް ގޮވާލައްވައިފި އެވެ.
އޮބާމާ މިގޮތަށް ގޮވާލައްވާފައި މި ވަނީ ޓްރަމްޕަށް ވޯޓު ދެއްވުމަށް ރިޕަބްލިކަން ޕާޓީގެ އިސް ގިނަ މެމްބަރުންތަކެއް މިހާރު ވެސް ދެކޮޅުހައްދަވައި ޓްރަމްޕާ ދެކޮޅަށް ދައްކަވަމުން ގެންދަވާ ވާހަކަތަކާ ގުޅިގެން ރިޕަބްލިކަން ޕާޓީ ވަރަށް ބޮޑަށް ބައިބައިވެ ޓްރަމްޕްގެ ފާޑުކިޔުން ޕާޓީގެ އިސް މެމްބަރުންނަށް އަމާޒުވެފައި ވަނިކޮށެވެ.
ޓްރަމްޕަށް އޮތް ތާއީދާއި އޭނާގެ ޕާޓީގެ ތެރޭގައި އޮތް ތާއީދު ވެސް މިހާ ބޮޑަށް ދަށްވެފައި ވަނީ އަންހެނުންނަށް އިހްތިރާމްކުޑަކޮށް ޓްރަމްޕް ދައްކަވާފައިވާ ވާހަކަތަކެއްގެ ވީޑިއޯ އާންމުވެ ބޭޒާރުވިފަހުންނެވެ.
މި ވީޑިއޯއަކާ ގުޅިގެން ޓްރަމްޕް ހޫނުފެނަށް ވެއްޓިފައި ވަނިކޮށް އެ ބޭފުޅާ އަށް ތާއީދުނުކުރެއްވުމަށް އޮބާމާ، ރިޕަބްލިކަން ޕާޓީގެ އިސް މެމްބަރުންނަށް ގޮވާލާއްވާފައި ވަނީ ނޯތު ކެރޮލައިނާގައި އިއްޔެ ބޭއްވި ކެމްޕޭން އެއްވުމެއްގަ އެވެ. އެ އެއްވުމުގައި އޮބާމާ ވިދާޅުވެފައި ވަނީ ހަމައެކަނި ޓްރަމްޕްގެ ވާހަކަތައް ކުށްވެރިކުރެއްވުމަކުން ނުފުދޭނެ ކަމަށާއި އެންމެ ރަނގަޅު ގޮތަކީ ރިޕަބްލިކަން ޕާޓީގެ އިސްވެރިން ވެސް ޓްރަމްޕަށް ވޯޓް ނުދެއްވުން ކަމަށެވެ.
ޓްރަމްޕަށް ފާޑުވިދާޅުވަމުން އޮބާމާ ވިދާޅުވެފައި ވަނީ އެ ބޭފުޅާ އަންހެނުންނާ ބެހޭ ގޮތުން އެގޮތަށް ވާހަކަ ދެއްކެވުމަކީ ފިހާރައެއްގައި މަސައްކަތްކުރުމަށް ވެސް ކުފޫހަމަނުވާ ވަރުގެ ކަމެއް ކަމަށެވެ.
އެމެރިކާގެ ރިއާސީ އިންތިހާބުގެ ފޯރި ގަދަވެ ވޯޓު ބޯމަތިވެފައިވާއިރު ހިޔާލު ހޯދުމުގެ ވޯޓުގެ ކުރީގައި އުޅުއްވަނީ ޑިމޮކްރެޓިކް ޕާޓީގެ ރިއާސީ ކެންޑިޑޭޓް ހިލަރީ ކްލިންޓަނެވެ. ހިލަރީ އަށް 49 ޕަސެންޓް ލިބިވަޑައިގެންފައިވާއިރު ޓްރަމްޕަށް މި ވޯޓުގައި ލިބިވަޑައިގަންނަވަނީ 43 ޕަސެންޓެވެ.
ޑޮނަލްޑް ޓްރަމްޕް (ކ) އާއި އެމެރިކާގެ ރައީސް ބަރަކް އޮބާމާ: ޓްރަމްޕަށް ވޯޓު ދޭން ރިޕަބްލިކަން ޕާޓީގެ މެމްބަރުން ވެސް ދެކޮޅު ހައްދަވާ.