ހެލްތް މިނިސްޓްރީގެ ފްރޮންޓް އޮފީސް ތަރައްގީކުރުމަށް ޗައިނާ ސަރުކާރުން 80،000 ޑޮލަރުގެ އެހީއެއް މިއަދު ދީފި އެވެ. މިނިސްޓްރީގެ ފްރޮންޓް އޮފީސް ތަރައްގީ ކުރަނީ ކައުންޓަރުންދޭ ހިދުމަތްތަކުގެ ފެންވަރު ރަނގަޅުކުރުމަށެވެ.
މިއަދު ހެލްތް މިނިސްޓްރީގައި އޮތް ރަސްމިއްޔާތެއްގައި ޗައިނާގެ ފަރާތުން ފައިސާގެ އެހީ ހަވާލުކޮށްދެއްވާފައިވަނީ ޗައިނާއިން ރާއްޖެއަށް ކަނޑައަޅުއްވަވާފައި ހުންނަވާ ސަފީރު ވާން ފޫކަން އެވެ. ފައިސާއާ ހަވާލުވެލެއްވީ، ހެލްތް މިނިސްޓަރު އަބްދުﷲ ނާޒިމް އިބްރާހިމެވެ.
މިނިސްޓްރީގެ ފްރޮންޓް އޮފީސް ތަރައްގީކުރުމުގެ މަސައްކަތް 90 ދުވަހުގެ ތެރޭގައި ނިންމާލެވޭނެ ކަމަށް މިނިސްޓްރީން ބުންޏެވެ. ފްރޮންޓް އޮފީހަށް ގެނެވޭ ބަދަލާއެކު، މިނިސްޓްރީން ބުނީ ކައުންޓަރުން މިހާރު ދޭ ހިދުމަތްތައް އިތުރަށް ފަސޭހަވެ، ހިދުމަތް ހޯދާ ފަރާތްތަކަށް ފަސޭހަކަމާއެކު ހިދުމަތް ހޯދުމުގެ އިންތިޒާމް ހަމަޖެހިގެންދާނެ ކަމަށެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރު ނާޒިމް ވިދާޅުވީ، ޗައިނާއަކީ އަބަދުވެސް ރާއްޖެއަށް އެހީތައް ފޯރުކޮށްދެމުން އަންނަ ގައުމެއް ކަމަށާއި ޗައިނާއިން ރާއްޖެއަށް ދީފައިވާ އެހީތަކުގެ ލިސްޓް ވަރަށް ދިގު ކަމަށެވެ. ކުރިއަށް އޮތްތާ ވެސް ޗައިނާއިން ރާއްޖެއަށް އިތުރު އެހީތައް ދެއްވާނެ ކަމަށް އުއްމީދުކުރައްވާ ކަމަށެވެ. އަދި ޗައިނާއިން ރާއްޖެއާ މެދު ބަހައްޓާ ގާތް ކަމަށް ޝުކުރު އަދާކުރައްވާ ކަމަށް މިނިސްޓަރު ވިދާޅުވި އެވެ.
ސަފީރު ވިދާޅުވީ، ޗައިނާ އާއި ރާއްޖެ ގުޅުން މިހާރު އިތުރަށް ބަދަހިވެފައިވާއިރު ގިނަ ދާއިރާތަކެއްގައި އެއްބަސްވުންތަކެއް ދެ ގައުމުގެ ދެމެދުގައިވެފައިވާ ކަމަށެވެ. އެގޮތުން ސިއްހީ ދާއިރާއަށް މިހާރު ވެސް ޗައިނާއިން ގިނަ އެހީތަކެއް ފޯރުކޮށްދީފައިވާކަން ސަފީރު ފާހަގަކުރެއްވި އެވެ. އަދި ޗައިނާ އަބަދުވެސް ރާއްޖެ އިތުބާރުކުރާ ބައިވެރިއެއްގެ ގޮތުގައި އޮންނާނެކަމުގެ ޔަގީންކަން ސަފީރު ދެއްވި އެވެ. އިތުރު އެހީތައް ދެމުންގެންދާނެ ކަމަށް ވެސް ވިދާޅުވި އެވެ.
ޗައިނާ ސަރުކާރުން ދަނީ ރާއްޖޭގެ ސިއްހީ ދާއިރާ ހަރުދަނާކުރުމަށް ވަރަށް ގިނަ އެހީތަކެއް ދެމުންނެވެ. އެގޮތުން މިދިޔަ އަހަރުގެ ތެރޭގައި ޗައިނާ ސަރުކާރުގެ ހިލޭ އެހީގައި ހުޅުމާލެ ހޮސްޕިޓަލްގައި ބޭއްވި "ބްރައިޓް ޖާނީ" އައި ކޭމްޕް ފާހަގަކޮށްލެވެ އެވެ. އެ ކޭމްޕްގައި 107 ދިވެހިން ވަނީ ކެޓަރެކްޓް ސާޖަރީ ހަދާފަ އެވެ. އަދި މީގެ އިތުރުން ކޭމްޕްގައި ބޭނުންކުރި 370،000 ޑޮލަރުގެ އަގުހުރި އިކުއިޕްމެންޓްތައް ވަނީ ހެލްތް މިނިސްޓްރީއަށް ހަދިޔާކޮށްފަ އެވެ.