މެރީޑިއަމް ސާވިސަސްގެ އަގު ވައްޓާލިކަމުގެ ތުހުމަތުގައި އެމްޕީއެލް އަދި އެމްޕީއެލްގެ ސީއީއޯ މުހައްމަދު ޖުނައިދުގެ މައްޗަށް އަބުރުގެ ދައުވާކުރަން މެރީޑިއަމް ކުންފުނީގެ ހިއްސާދާރު ރިޔާޒު ރަޝީދު ނިންމަވައިފި އެވެ. އެމްޕީއެލް އަދި ޖުނައިދުގެ އިތުރުން އެމްޕީއެލްގެ ހަބަރު ގެނެސްދިން ނޫސްތަކާ ދެކޮޅަށް ވެސް އަބުރުގެ ދައުވާ ކުރަން ރިޔާޒު ވަނީ ނިންމަވާފަ އެވެ.
އެމްޕީއެލްއިން މިއަދު ހެނދުނު ބޭއްވި ނޫސްވެރިންގެ ބައްދަލުވުމުގައި މެރީޑިއަމްގެ މައްޗަށް ބޮޑެތި ތުހުމަތުތަކެއް ވަނީ ކޮށްފަ އެވެ. އެގޮތުން ނުވިއްކާ ތެލަށް ވެސް މެރީޑިއަމްއިން ބިލްކުރާ ކަމަށެވެ. އަދި މާލެ ވިޔަފާރި ބަނދަރުގައި ބޭނުންކުރާ އުޅަނދު ފަހަރަށް މިހާރު ތެޔޮ އަޅާ ގޮތުން އަހަރަކު 10 މިލިއަން ރުފިޔާ ކުންފުންޏަށް ގެންލުންވާ ކަމަށް އެމްޕީއެލްގެ ސީއީއޯ ޖުނައިދު ވިދާޅުވި އެވެ. ޖުނައިދު ވިދާޅުވީ އެ ކުންފުންޏަށް ބޭނުންވަނީ 60،000 ލިޓަރުގެ ތެޔޮ ކަމަށާއި، ނަމަވެސް މަހަކު 16000 ލިޓަރުގެ ތެޔޮ އަޅާ ކަމަށެވެ.
މިކަމާ ގުޅިގެން "އަވަސް"އާ ވާހަކަ ދައްކަވަމުން ވިލުފުށީ ދާއިރާގެ މެންބަރު ރިޔާޒު ރަޝީދު ވިދާޅުވީ، ޖުނައިދު ނޫސްވެރިންނަށް ދިން މައުލޫމާތަކީ ވަރަށް ޒާތީ މައުލޫމާތުތަކެއް ކަމަށާއި އެ ވާހަކަތަކުގެ ސަބަބުން މެރީޑިއަމްއަށް ބޮޑެތި ގެއްލުންތަކެއްވާނެ ކަމަށެވެ. އަދި ކުންފުންޏާ މެދޮ އޮންނަ އިތުބާރު ގެއްލޭނެ ކަމަށެވެ.
"ޖުނައިދު މުޅިން ވެސް ހެދީ ދޮގު، އެ ވާހަކަތައް ނޫސްތަކުގައި ޖެހުމުގެ ކުރިން މެރީޑިއަމްގެ ބަހެއް ހޯދާފައެއް ނެތް، ބުއްދި ވެސް ގަބޫލުކުރާނެ ޖުނައިދު ދެއްކި ވާހަކަތަކަކީ ދޮގެއްކަން،" ރިޔާޒު ވިދާޅުވި އެވެ.
ރިޔާޒު ވިދާޅުވީ، ތެޔޮ ވިއްކަނީ ވަކި އުސޫލެއްގެ މަތިން ކަމަށާއި، ތެޔޮ ފޯރުކޮށްދެނީ އެމްޕީއެލްއިން ފޮނުވާ ޕާޖޭސް އޯޑަރާ އެއްގޮތަށް ކަމަށެވެ. އެހެންކަމުން އިތުރަށް ތެޔޮ ވިއްކުމުގެ އެއްވެސް ފުރުސަތެއް ނޯންނާނެ ކަމަށް ވިދާޅުވި އެވެ.
މެރީޑިއަމްއަށް މަސައްކަތް ހަވާލުކޮށްފައިވަނީ ބިޑްނުކޮށް ކަމަށް ޖުނައިދު ވިދާޅުވުމުން ރިޔާޒު މިއަދު ވިދާޅުވީ، އެއީ ދޮގެއް ކަމަށާއި އެ މަސައްކަތް މެރީޑިއަމްއަށް ހަވާލުކޮށްފައިވަނީ ބިޑްކޮށްގެން ކަމަށެވެ. އަދި އެ މަސައްކަތް މެރީޑިއަމްއަށް ލިބުނީ އެންމެ ކުޑަ އަގެއް ހުށަހެޅުމުން ކަމަށް ރިޔާޒު ވިދާޅުވި އެވެ.
މެރީޑިއަމްއަށް ގެއްލުންވާ ގޮތަށް ޖުނައިދު ވާހަކަ ދައްކަވާފައިވާތީ، އެ ކުންފުންޏަށް އެ ވާހަކަތަކުގެ ސަބަބުން ލިބުނު ގެއްލުންތަކުގެ ބަދަލު ހޯދުމަށް މަދަނީ މައްސަލަ މާދަމާ ސިިވިލް ކޯޓަށް ވައްދާނެ ކަމަށް ރިޔާޒު ވިދާޅުވި އެވެ. އަދި އެމްޕީއެލްއާއި ޖުނައިދުގެ މައްޗަށް އަބުރުގެ ދައުވާކުރުމަށް ފުލުހަށް މައްސަލައެއް ވައްދާނެ ކަމަށް ރިޔާޒު ވިދާޅުވި އެވެ.
ރިޔާޒު ވިދާޅުވީ، ޖުނައިދުގެ ވާހަކަތައް ނޫސްތަކުން ގެނެސްދިންއިރު، މެރީޑިއަމްގެ ބަހެއް ހޯދާފައިނެތުމުން ނޫސްތަކާ ދެކޮޅަށް ވެސް އަބުރުގެ ދައުވާކުރަން ނިންމާފައިވާ ކަމަށެވެ.
"އެ ވާހަކަތައް ގެނެސްދިނުމުގައި ތެދެއް ދޮގެއް ނުބަލާ، މެރީޑިއަމްގެ ބަހެއް ހޯދާފައެއް ނެތް، ކުންފުންޏަށް ގެއްލުންވާ ވާހަކަތަކެއް ގެނެސްދޭއިރު މެރީޑިއަމްގެ ބަހެއް ވެސް ހޯދަން ޖެހޭނެ، އެ ހަބަރު ގެނެސްދިން ހުރިހާ ނޫހެއްގެ މައްޗަށް ވެސް ދައުވާކުރާނަން،" ރިޔާޒު ވިދާޅުވި އެވެ.
އިއްޔެ ސިވިލް ކޯޓުން ވަނީ މެރީޑިއަމް ނޫން އެހެން ކުންފުންޏަކަށް އެމްޕީއެލްއަށް ތެޔޮ ފޯރުކޮށްދިނުމަށް ހަވާލުނުކުރުމަށް އަންގާ ވަގުތީ އަމުރެއް ނެރަފަ އެވެ.