ކާރިސާތަކުން ލިބޭ ގެއްލުން ކުޑަކުރުމާމެދު ގައުމީ ފެންވަރުގައި ވިސްނަންޖެހޭ ކަމަށް ޑިފެންސް މިނިސްޓަރު އާދަމް ޝަރީފް އުމަރު މިއަދު ވިދާޅުވެއްޖެ އެވެ. މިއަދަކީ ބައިނަލްއަގްވާމީ ފެންވަރުގައި ފާހަގަކުރާ، ކާރިސާތަކުން ލިބޭ ގެއްލުން ކުޑަ ކުރުމުގެ ދުވަހެވެ.
ދުވަހާ ގުޅޭ ގޮތުން މިނިސްޓަރު ދެއްވި ހިތާބުގައި ވިދާޅުވީ، ރައްކާތެރި މުޖުތަމައެއް ބިނާ ކުރެވޭނީ ކާރިސާތަކަށް އިޖާބަދިނުމާއި ކާރިސާތަކުން ލިބޭ ގެއްލުން ކުޑަކުރުމުގެ އަސާސްތައް، ތަރައްގީއަށްޓަކައި ހިންގާ މަޝްރޫއުތަކުގައި ހިމަނައިގެން ކަމަށެވެ.
މިނިސްޓަރު ވިދާޅުވީ، ކާރިސާތަކުން ލިބޭ ގެއްލުން ކުޑަކުރުމުގެގޮތުން ގައުމީ ފެންވަރުގައި ސަރުކާރުން ގެންދަނީ ގިނަގުނަ މަސައްކަތްތަކެއް ކުރަމުން ކަމަށެވެ. އެގޮތުން، ވޭތުވެދިޔަ އަހަރު ނޭޝަނަލް ޑިޒާސްޓާ މެނޭޖްމަންޓް ސެންޓަރުން ވަނީ ފެންބޮޑުވުމުގެ ކާރިސާތަކަށް ވިލުންވެރިކަން އިތުރުކުރުމުގެ މަޝްރޫއެއް ފަށާފައި ކަމަށެވެ. އަދި، ރާއްޖޭގައި އާންމުކޮށް ފެންބޮޑުވާ 31 ރަށަކަށް، ފެންހިންދާ ވަސީލަތްތައް ފޯރުކޮށްދީފައި ކަމަށެވެ.
"ކުރިމަގުގައި އިތުރު 80 ރަށުގައި މި މަޝްރޫއު ކުރިއަށްގެންދިއުމަށް މިހާރުވަނީ އަމާޒު ހިފާފަ، ކާރިސާތަކަށް އިޖާބަދިނުމުގެ ގާބިލުކަން އިތުރުކުރުމަށް ސަރަހައްދީ ފެންވަރުގައި ރާވައި، އެކަމަށް ބޭނުންވާ ވަސީލަތްތައް ބޭރުގެ ހިލޭ އެހީގައި މިހާރުވަނީ ހޯދާފަ،" މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވި ގޮތުގައި މާލޭގައި ހިނގާ އަލިފާނުގެ ކާރިސާތަކުން މީހުންގެ ފުރާނަ ސަލާމަތްކުރުމާއި މުދަލަށް ލިބޭ ގެއްލުން ކުޑަކުރުމުގެ މަގުސަދުގައި، މާލޭގެ އެކި ހިސާބުތަކަށް ފަސޭހަކަމާއެކު ފެނާއި ލޮނު ލިބޭނެ، މަޝްރޫއެއް ސަރުކާރުން ވަނީ ފަށާފައެވެ. މިއީ 8 މިލިއަން ރުފިޔާގެ މަޝްރޫއެކެވެ.
"ކާރިސާތަކުގައި ހާލުގައިޖެހޭ ފަރުދުންގެ ހާލުއަހުވާލު ގާތުން ބަލައި، ރައްޔިތުންގެ އިހުސާސްތައް ދެނެގަތުމާއި، ހާލުގައިޖެހޭ އަފުރާދުންގެ
އަސާސީ އަދި ޒަރޫރީ ބޭނުންތައް ފުއްދައިދެވޭނެ ހަރުދަނާ ނިޒާމެއް ސަރުކާރުން މިހާރު ވަނީ ގާއިމުކޮށްފަ، މިދެންނެވި ނިޒާމުގެތެރެއިން، 2015 ވަނަ އަހަރުން ފެށިގެން މިއަދާއި ހަމައަށް ކާރިސާތަކުގައި ހާލުގައިޖެހުނު ފަރުދުންގެ ޒަރޫރީ ކަންކަމަށާއި ގެދޮރު މަރާމާތުކުރުމާއި ބޯހިޔާވަހިކަން ފޯރުކޮށްދިނުމަށް 24.8 މިލިއަން ރުފިޔާ ސަރުކާރުން ހޭދަކޮށްފައިވޭ، އަދި ކާރިސާތަކުގައި ހާލުގައިޖެހޭ ފަރުދުންނަށް އެހީވުމަށް ބޭންކް އޮފް މޯލްޑިވްސްގައި މިހާރު ވަނީ "ޑިޒާސްޓަރ ރިލީފް ލޯނު" އެއް ތައާރަފުކޮށްފަ،" މިިސްޓަރު ވިދާޅުވި އެވެ.
ރައީސް އަބްދުﷲ ޔާމީންގެ ސަރުކާރުން ކުރިމަގުގައިވެސް ކާރިސާތަކުގައި ހާލުގައިޖެހޭ ފަރުދުންގެ ހާލުއަހުވާލު ބަލައި، ފުރިހަމަ އަޅާލުމާއި އޯގާތެރިކަމާއި އެހީތެރިކަން ފޯރުކޮށްދޭނެކަމުގެ ޔަގީންކަން ދެއްވާ ކަމަށް މިނިސްޓަރު ވިދާޅުވި އެވެ.