ޕީޕީއެމްގެ ދަފްތަރުން ދިއްގަރު ދާއިރާގެ މެންބަރު އަހުމަދު ފާރިސް މައުމޫންގެ ނަން އުނިކޮށްފި އެވެ. އިކެލްޝަން ކޮމިޝަނުން ވަނީ މިރޭ އެކަން "އަވަސް"އަށް ކަށަވަރުކޮށްދީފަ އެވެ.
އިލެކްޝަން ކޮމިޝަނުން ބުނީ ފާރިސްގެ ނަން ޕީޕީއެމްގެ ދަފްތަރުން އުނިކޮށްފައިވަނީ އެ ޕާޓީގެ ކައުންސިލްގެ 20 މެންބަރަކު ސޮއިކުރައްވާ ހުށަހެޅި މައްސަލައަކާ ގުޅިގެން ކަމަށެވެ. ފާރިސް ޕާޓީގެ ދަފްތަރުން އުނިކުރީ މިއަދު އެވެ.
ފާރިސްގެ ނަން ޕީޕީއެމްގެ ދަފްތަރުން އުނިކޮށްފައިވާއިރު، ޕީޖީ ގުރޫޕްގެ ތްރީލައިން ވިޕާ ހިލާފުވި މައްސަލައެއްގައި އެ ޕާޓީގެ ސުލޫކީ ކޮމެޓީން ވަނީ ފާރިސް ޕާޓީން ވަކިކުރަން ނިންމާފަ އެވެ. ނަމަވެސް އެ ނިންމުން ގަބޫލުފުޅު ނުކުރައްވާ ކަމަށް ފާރިސްގެ ބައްޕާފުޅު އަދި ޕީޕީއެމްގެ ރައީސް މައުމޫން އަބްދުލް ގައްޔޫމް ވަނީ ވިދާޅުވެފަ އެވެ.
ފާރިސްގެ ނަން ދަފްތަރުން އުނިކޮށްފައިމިވަނީ ސިޔާސީ ޕާޓީތަކުގެ މަޝްވަރާއަށް ޕީޕީއެމްގެ ފަރާތުން ބައިވެރިވާނެ މަންދޫބެއްގެ ރައީސް މައުމޫން، ފާރިސްގެ ނަން ހުށަހެޅުމާއެކު ޕާޓީގެ އެތެރޭގައި ބޮޑު ހިޔާލު ތަފާތުވުންތަކެއް އުފެދިފައިވާ ދަނޑިވަޅެއްގަ އެވެ.