ޕީޕީއެމްގެ ރައީސް މައުމޫން އަބްދުލް ގައްޔޫމް އިސް ނަންގަވައިގެން ބޭއްވުމަށް ހަމަޖެހިފައިވާ ޕީޕީއެމްގެ އާންމު ޖަލްސާ ފަސްކޮށްފި އެވެ. ޖަލްސާ ކުރިން ބާއްވަން ހަމަޖެހިފައި އޮތީ، މި މަހުގެ 31 ވަނަ ދުވަހު އެވެ.
ޕީޕީއެމްގެ އެސްޖީގެ މަގާމަށް ރައީސް މައުމޫން އައްޔަން ކުރައްވާފައިވާ އަބްދުލް އަލީމް މިއަދު ވިދާޅުވީ، މި މަހުގެ 31 ވަނަ ދުވަހަށް ދަރުބާރުގެ ދެވެން ނެތްކަން މިނިސްޓްރީން އަންގާފައިވާ ކަމަށެވެ. މިނިސްޓްރީން އެގޮތަށް އެންގީ ކުރިން އެ ތާރީހަށް ދަރުބާރުގެ ލިބޭނެ ކަމަށް އަންގާފައިވަނިކޮށް ކަމަށެވެ.
އަލީމް ވިދާޅުވީ، އެ ތާރީހުގެ ކުރިން ދަރުބާރުގެ ހަމަޖެހި، މިދިޔަ ބުރާސްފަތި ދުވަހު ފައިސާ ވެސް ދައްކާފައިވާނެ ކަމަށެވެ.
ރައީސް މައުމޫން ބާއްވަވަން ނިންމެވި އާންމު ޖަލްސާ ދެން ބާއްވާނެ ދުވަހަކާއި ތަނެއް ފަހުން އިއުލާނު ކުރާނެ ކަމަށް އަލީމް ވިދާޅުވި އެވެ. މި އާންމު ޖަލްސާއަކީ ޕީޕީއެމްގެ ފަސް ވަނަ އަހަރީ ދުވަހުގެ މުނާސަބަތުގައި ރައީސް މައުމޫން ބޭއްވުމަށް ނިންމެވި ޖަލްސާއެކެވެ.