މިދިޔަ އަހަރު ވިލިމާލޭގައި ހުންނަ ކުޑަކުދިންގެ ހިޔާގެ ހުރިހާ މުވައްޒަފުންނަށް ރިސްކް އެލަވަންސް ދީފައިވަނީ ގަވާއިދާ ހިލާފަށް ކަމަށް އޮޑިޓާ ޖެނަރަލްގެ އޮފީހުން ނެރުނު ޖެންޑަ މިނިސްޓްރީގެ މިދިޔަ އަހަރުގެ އޮޑިޓް ރިޕޯޓުން ހާމަވެއްޖެ އެވެ.
ޖެންޑަ މިނިސްޓްރީގެ މިދިޔަ އަހަރުގެ މާލީ މުއާމަލާތްތަކުގެ ތަފްސީލުތަކުގެ މައްޗަށް އޮޑިޓާ ޖެނަރަލްގެ އޮފީހުން އެކުލަވާލައި ނެރުނު އޮޑިޓުގައި ގިނަ މައްސަލަތަކެއް ފާހަގަކޮށްފައިވެ އެވެ. އެގޮތުން މިދިޔަ އަހަރު ޖެންޑަ މިނިސްޓްރީން ސިވިލްސާވިސްގެ ގަވާއިދާ ހިލާފަށް އެ ކޮމިޝަނަށް އެންގުމެއް ނެތި، ކުޑަކުދިންގެ ހިޔާގައި މަސައްކަތްކުރާ ހުރިހާ މުވައްޒަފުންނަށް ރިސްކް އެލަވަންސް ދީފައިވާ މައްސަލައެއް ފާހަގަ ކޮށްފަ އެވެ. ރިސްކް އެލަވަންސްގެ ގޮތުގައި ކުޑަކުދިންގެ ހިޔާގެ މުވައްޒަފުންނަށް މިދިޔަ އަހަރުގެ ޖޫން މަހުން ފެށިގެން އެއަހަރުގެ ޑިސެމްބަރު މަހުގެ ނިޔަލަށް ދެ މިލިއަނަށްވުރެ ގިނަ ރުފިޔާ ދީފައިވެ އެވެ.
އެ ރިޕޯޓުގައި ބުނީ، ސިވިލް ސާވިސްގެ މުވައްޒަފުންނަށް ދޭ ރިސްކް އެލަވަންސަކީ މުވައްޒަފާ ހަވާލުވެފައިވާ މަސައްކަތުގެ ބާވަތުން، އެ މަސައްކަތުގައި މުވައްޒަފަށް އޮތް ނުރައްކަލުގެ މިންވަރަށް ބެލުމަށްފަހު ދޭ އެލަވަންސެއް ކަމަށެވެ. އަދި މުސާރައިގެ އޮނިގަނޑަށް ބަދަލު ގެނެސް އެފަދަ އެލަވަންސެއް މުވައްޒަފުންނަށް ދެވޭނީ ސިވިލް ސާވިސްގެ ހުއްދަ ހޯދައިގެން ކަމަށެވެ.
"ކުޑަކުދިންގެ ހިޔާގައި ހުއްދައަކާ ނުލާ ހިޔާގައި މަސައްކަތްކުރާ ހުރިހާ މުވައްޒަފުންނަށް އެއް ހަމައަކުން މަތީ ފެންވަރުގެ ރިސްކް އެލަވަންސް ދިނުމަކީ ކޮމިޝަނުން ކަނޑައަޅާފައިވާ އުސޫލުތަކާ ހިލާފު ކަމެކެވެ،" ރިޕޯޓުގައި ބުނެފައިވެ އެވެ.
ސިވިލް ސާވިސްގެ ގަވާއިދުގައިވާ ގޮތުން ސިވިލްސާވިސްގެ މުވައްޒަފަކަށް އެލަވަންސް ދެވޭނީ މުވައްޒަފުގެ ވަޒީފާގެ ބަޔާން އެ ކޮމިޝަނަށް ހުށަހަޅައި، ކޮމިޝަންގެ ހުއްދަ ހޯދުމަށް ފަހު އެވެ. އެކޮމިޝަންގެ ގަވާއިދުގައި ރިސްކް އެލަވަންސް ދޭ މިންވަރު އޮންނަނީ މުވައްޒަފުގެ މަސައްކަތުގެ ނުރައްކަލުގެ މިންވަރަށް ބަލައި ދަރަޖަވެސް ކޮށްފަ އެވެ.
ނަމަވެސް ޖެންޑާއިން އެފަދަ ހުއްދައެއް ހޯދާފައި ނުވާއިރު، އެކަމުގައި ފިނޭންސް މިނިސްޓްރީގެ ހުއްދައެއް ހޯދާފައިވާކަން އެއްވެސް ލިޔެކިއުމަކުން ފެންނަން ނެތްކަން ރިޕޯޓުގައި ފާހަގަކޮށްފައިވެ އެވެ.
ކުޑަކުދިންގެ ހިޔާގެ ހުރިހާ މުވަޒަފުންނަށް މަސައްކަތަށް ނިކުންނަ ކޮންމެ ދުވަހަކު 100ރ. ދޭން ފަށާފައިވަނީ އެ މިނިސްޓްރީގެ އެޗްއާރްއެމްޑީ ކޮމިޓީގެ 10 ވަނަ ބައްދަލުވުމުގައި އެގޮތަށް ނިންމުމާ ގުޅިގެންނެވެ.
އެ އޮޑިޓް އޮފީހުން ވަނީ މިދިޔަ އަހަރު ޖެންޑަ މިނިސްޓްރީން ކޮންޓްރެކްޓް އުސޫލުން ކުރަންޖެހުނު ބައެއް މަސައްކަތް، މަސައްކަތުގެ އެއްބަސްވުމަކާ ނުލައި އެކި ފަރާތްތަކަށް ބޮޑު އަގުގައި މަސައްކަތް ހަވާލުކުރުމުގެ މައްސަލަތަކެއް ވެސް ފާހަގަކޮށްފައެވެ. އެގޮތުން މަސައްކަތުގެ އެއްބަސްވުމަކާ ނުލައި، ހަތަރު ލައްކަ އަށްވުރެ ގިނަ ރުފިޔާގެ މަސައްކަތް އެ މިނިސްޓްރީން ވަނީ މިދިޔަ އަހަރު އެކި ފަރާތްތަކަށް މިނިސްޓްރީން ހަރަދު ދީގެން ކޮށްފަ އެވެ.
ހިދުމަތާއި ތަކެތި ހޯދުމުގައި 25،000ރ އަށްވުރެ ދަށުގެ މަސައްކަތްތަކާއި 25،000ރ، އަށްވުރެ މަތީގެ ބައެއް ހިދުމަތާއި ތަކެތި ހޯދުމުގައި އެއްބަސްވުން ތައްޔާރުކުރުމަކީ މާލިއްޔަތު ގަވާއިދުގައި ސަރުކާރުގެ މުއައްސަސާތަކަށް ލާޒިމްކުރާ ކަމެކެވެ.
"ޖުމްލަ 412828ރ. ގެ ހަރަދުތައް ކޮށްފައިވަނީ މާލިއްޔަތު ގަވާއިދުގައި ބަޔާންކޮށްފައިވާ ގޮތުގެ މަތިން ފެންވަރއި އަގާމެދު ދެފަރާތުން އެއްބަސްވާ އެއްބަސްވުމެއްގައި ސޮއިކުރުމަށްފަހު ނޫން ކަން ފާހަގަކުރަމެވެ،" ރިޕޯޓުގައި ބުނެފައިވެ އެވެ.
މީގެ އިތުރުން ބައެއް ފަރާތްތަކަށް މަސައްކަތް ހަވާލުކުރުމުގައި ރިޓެންޝަން ފައިސާއާ ބެހޭ މާއްދާއެއް ހިމަނާފައި ނުވުމާއި އެ މިނިސްޓްރީގެ މާލީ ބަޔާންތައް އުސޫލާ އެއްގޮތަށް އޮޑިޓް ކުރުމަށް ހުށަހަޅާފައި ނުވުންފަދަ މައްސަލަތައް ވެސް އެ ރިޕޯޓުގައި ފާހަގަކޮށްފައިވެ އެވެ.