ވެލާނާގެ ކުރިމަތީގައި ހަދަމުންދާ އިމާރާތެއްގެ ހަތް ވަނަ ބުރީގައި މަސައްކަތް ކުރަން އުޅެނިކޮށް ވެއްޓި އަނިޔާވި ބިދޭސީ މީހާގެ ހާލު ވަރަށް ސީރިއަސް ކަމަށް އޭޑީކޭ ހޮސްޕިޓަލުން ބުނެފި އެވެ. އިމާރާތުގެ މަތިން ވެއްޓި އަނިޔާވެފައިވަނީ ބަނގްލަދޭޝްގެ މަސައްކަތު މީހަކަށެވެ.
އޭޑީކޭގެ މެނޭޖިން ޑިރެކްޓަރު އަހުމަދު އައްފާލް މިއަދު ވިދާޅުވީ، އަނިޔާވި ބިދޭސީ މީހާއަށް އައިސީޔޫގައި މިހާރުވެސް ފަރުވާދެމުންދާ ކަމަށެވެ. އޭނާ އަށް ސީރިއަސް އަނިޔާތަކެއް ލިބި، ހާލު ދަށްވުމާ ގުޅިގެން ފަރުވާދެމުންދަނީ ވެންޓިލޭޓަރުގައި ބާއްވައިގެން ކަމަށް ވެސް އައްފާލް ވިދާޅުވި އެވެ.
"ހޮސްޕިޓަލްގެ އުސޫލު އޮންނަ ގޮތުން ޕޭޝަންޓްގެ ބައްޔާބެހޭ މައުލޫމާތު ހާމަކުރެވޭކަށް ނޯވޭ. އެކަމަކު ވަރަށް ސީރިއަސް އަނިޔާތަކެއް ވެފައި އޮތުމުން އޭނާ ވަނީ ވެންޓިލޭޓަރާ ވެސް ގުޅާފައި،" އައްފާލް ވިދާޅުވި އެވެ.
ފުލުހުންގެ މީޑިއާ އޮފިޝަލް، ވިދާޅުވީ އެ ހާދިސާ ހިނގީ ވެލާނާގެ ކުރިމަތީގައި ހަދަމުން އަންނަ އިމާރާތުގައި ކަމަށެވެ. އަދި އެ ބިދޭސީ މީހާ އަކީ އެ އިމާރާތުގެ ހަތް ވަނަ ފްލޯގައި މަސައްކަތް ކުރަމުން އައި މީހަކު ކަމަށާއި އޭނާ ވެއްޓުނީ، އެ އިމާރާތުގެ ތިން ވަނަ ބުރިއަށް ކަމަށެވެ.