ސްރީލަންކާގެ ވިޔަފާރީގެ ދާއިރާ އާއި ސިއްހަތާއި ތައުލީމީ ދާއިރާއިން ހުރި ފުރުސަތުތައް ރާއްޖެއަށް އިޝްތިހާރުކޮށްދީ ދެގައުމުގެ ގުޅުން ހަރުދަނާ ކުރުމަށް މި މަހު ރާއްޖޭގައި ބާއްވާ "ފީލް ސްރީލަންކާ، ސިންގަލް ކަންޓްރީ އެގްޒަބިޝަން" ގެ ބިޒްނަސް ފޯރަމްގައި ރާއްޖެއާއި ލަންކާގެ 100 އެއްހާ ބިޒްނަސް ޕާޓްނަރުން ބައިވެރިވާނެ ކަމަށް އެ އެގްޒިބިޝަންގެ އޮގަނައިޒިން ކޮމިޓީން ބުނެފި އެވެ.
ފީލް ސްރީލަންކާ، ސިންގަލް ކަންޓްރީ އެގްޒަބިޝަން ބާއްވަނީ އިކޮނޮމިކް މިނިސްޓްރީ އާއި ޓޫރިޒަމް މިނިސްޓްރީ އަދި ހައުސިން މިނިސްޓްރީގެ އިތުރުން ސްރީލަންކާ އެމްބަސީ އާއި ސްރީލަންކާ - ރާއްޖެ ބައިލެޓަރަލް ބިޒްނަސް ކައުންސިލް ގުޅިގެންނެވެ. މި އެގްޒިބިޝަންގައި ސްރީލަންކާގެ 40 އަށްވުރެ ގިނަ ކުންފުނިތަކުން ބައިވެރިވެ އެވެ.
ފީލް ސްރީލަންކާ އެގްޒިބިޝަން އޮތީ މިމަހުގެ 27-29 ގެ ނިޔަލަށް ދަރުބާރުގޭގަ އެވެ. އެގްޒިބިޝަންގެ ބިޒްނަސް ފޯރަމް އޮންނާނީ 27 ވަނަ ދުވަހުގެ މެންދުރު އެވެ. އެ ފޯރަމްގައި ރާއްޖޭގެ 60 ވިޔަފާރިވެރިން ބައިވެރިވާނެ އެވެ. އަދި އެގްޒިބިޝަންގައި ބައިވެރިވާ ކުންފުނިތަކުން ވެސް ފޯރަމްގައި ބައިވެރިވާނެ އެވެ.
މި އިވެންޓްގައި އިންތިޒާމްކުރުމުގައި ރާއްޖޭގައި އެންމެ އިސްކޮށް ހަރަކާތްތެރިވާ ސްރީލަންކަން އެއާލައިންސްގެ ރާއްޖޭގެ އެޖެންޓް، އިނަ މޯލްޑިވްސްގެ އެމްޑީ މުހައްމަދު ފިރާގު ވިދާޅުވީ، އުންމީދަކީ ވީހާވެސް ގިނަ ބަޔަކު އެގްޒިބިޝަނަށް ޒިޔާރަތްކުރުން ކަމަށާއި ލަންކާގެ ހިދުމަތްތައް ދިވެހިންނަށް ތަޖުރިބާކޮށްލުމަށް ފީލް ސްރީލަންކާ އެގްޒިބިޝަނަކީ ރަނުގެ ފުރުސަތަކަށް ވާނެ ކަމަށެވެ.
މިމަހުގެ 27 ގައި ފަށާ އެ އެގްޒިބިޝަންގައި މައިގަނޑުކޮށް އޮންނާނީ ތިން އެކްސްޕޯ އެކެވެ. އެއީ ވިޔަފާރިއާއި އިގްތިސޯދު އެކްސްޕޯއާއި ހެލްތު އެކްސްޕޯގެ އިތުރުން އެޑިއުކޭޝަން އެކްސްޕޯއެވެ. ދަރުބާރުގޭގެ އެކި މާލަންތަކުގައި މި ތިން އެކްސްޕޯ ކުރިއަށްދާއިރު، ސްރީލަންކާގެ ކާނާގެ ރަހަތައް ދައްކާލުންވެސް އެތަނުގައި ކުރިއަށްދާނެ އެވެ. 27 -29 އަށް ކޮންމެ ދުވަހެއްގެވެސް މެންދުރުފަހު 2:00 އިން ރޭގަނޑު 11:00 އަށް އެތިން އެކްސްޕޯ ވެސް ދަރުބާރުގޭގައި ކުރިއަށްދާނެ އެވެ.
ސްރީލަންކާއަކީ ގިނަ ދިވެހިން ބޭސް ފަރުވާއަށް ދާ ގައުމެކެވެ. އެހެންކަމުން މި އެގްޒިބިޝަންގެ ހެލްތު އެކްސްޕޯ ވެގެންދާނީ ދިވެހިންގެ ގިނަ ބަޔަކަށް ވަރަށް އަގުހުރި މައުލޫމާތުތަކެއް ލިބިގެންދާނެ އެކްސްޕޯއަކަށެވެ. އެގްޒިބިޝަންގައި ލަންކާގެ ނަވަލޯކާ ހޮސްޕިޓަލާއި، ލަންކާ ހޮސްޕިޓަލް ފަދަ ތަންތަނުގެ އެކި ޑިޕާޓްމަންޓްތަކުގެ ހިދުމަތް ޝޯކޭސް ކުރާއިރު، އާންމުންނަށް ހިލޭ ބައެއް ކަހަލަ ޗެކަޕް ހެއްދުމުގެ ހިދުމަތް ވެސް ލިބޭނެ އެވެ.
އެގްޒިބިޝަންގެ އެޑިއުކޭޝަން އެކްސްޕޯއަކީ ވެސް މުހިއްމު ބަޔަކަށް ވެގެންދާނެ އެވެ. ހާއްސަކޮށް ޒުވާނުންނަށް މިއީ ތައުލީމީ ކެރިއާ ބިނާކުރުމަށް ލިބޭ ރަނުގެ ފުރުސަތެކެވެ. އެ އެކްސްޕޯގައި ލަންކާގައި ދިވެހިންނަށް ހުރި އެންމެ ރަނގަޅު ތައުލީމީ ފުރުސަތު ތަކާއި ސްކޮލާޝިޕް ފުރުސަތުތަކާ ބެހޭ މައުލޫމާތު ދިނުން ފަދަ ހިދުމަތް ދޭނެ އެވެ.
މި އެގްޒިބިޝަންގެ ހާއްސަ ކަމަކީ ދެ ގައުމުގެ ވިޔަފާރީގެ ފުންނާބުއުސް ފަރާތްތައް ބައްދަލުވެސް ވިޔަފާރީގެ ގުޅުން ބަދަހިވެގެން ދިއުމެވެ. މިގޮތުން މި އެގްޒިބިޝަންގައި ސްރީލަންކާގެ މީރު ކާނާގެ ބާވަތްތަކުގެ ރަހަ އެނގިގެންދާނެ ތަފާތު ގިނަ ސްޓޯލްތަކެއް ހުންނާނެ އެވެ.
މި އެގްޒިބިޝަންގައި ހަމައެކަނި އޮތީ ވިޔަފާރީގެ އުފެއްދުންތައް ދައްކާލުމާއި ވިޔަފާރިވެރިން ބައްދަލުވުން އެކަންޏެއްވެސް ނޫނެވެ.
ފީލް ސްރީލަންކާ، ސިންގަލް ކަންޓްރީ އެގްޒަބިޝަންއަކީ މިއުޒިކް ފެސްޓިވަލް އެކޭވެސް ބުނެވިދާނެ އެވެ. މި ފެއާއާ ދިމާކޮށް ސްރީލަންކާގެ އެންމެ މަގުބޫލު ދެ ބޭންޑުގެ ފޯރިގަދަ ހުށަހެޅުންތައް އޮންނާނެ އެވެ. އެހެންވެ މިއީ މިއުޒިކީ ފަންނާނުންނާއި މިއުޒިކަށް ލޯބިކުރާ މީހުންނަށް ރަން ގަޑަކަށް ވާނެ އެވެ. މިވަރުން ނިމުނީއެއް ނޫނެވެ. ދިވެހިންނަށް ލަންކާގައި ޗުއްޓީ ހޭދަ ކޮށްލަން ހުރި ފުރުސަތު ތަކާއި ސްރީލަންކާގައި ހުރި ތައުލީމީ އެކި ފުރުސަތުތަކުގެ މައުލޫމާތު މި ފެއާއިން ލިބޭނެ އެވެ.
ފީލް ސްރީލަންކާ އެގްޒިބިޝަންގެ އޮގަނައިޒިން ކޮމެޓީން މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން -- އަވަސް ފޮޓޯ އަފްޝީން ނަސީރު