އެއްގަމު ދަތުރުފަތުރާ ބެހޭ ގާނޫނުގެ ދަށުން ކައިކަލު ޓެކްސީގެ ހިދުމަތް ފެށުމަށް އިކޮނޮމިކް މިނިސްޓްރީން އެކުލަވާލާފައިވާ ގަވާއިދު ގެޒެޓްކޮށްފި އެވެ. އެ ގަވާއިދު ގެޒެޓް ކުރުމާއެކު ސައިކަލް ޓެކްސީގެ ހިދުމަތް ފަށައިގަންނާނެ އެވެ.
މިދޔަ ބުރާސްފަތި ދުވަހު ގެޒެޓް ކުރި ސައިކަލް ޓެކްސީ ކުރުމުގެ ގަވާއިދުގައި ބުނެފައިވަނީ، ސައިކަލް ޓެކްސީގެ ގޮތުގައި ބޭނުން ކުރެވޭނީ، އޮކޮނޮމިކް މިނިސްޓްރީން ލައިސަންސް ދޫކޮށްފައިވާ ޓެކްސީ ސެންޓަރުތަކުގައި ރަޖިސްޓްރީކޮށްފައިވާ ސައިކަލު ތަކަށް އެކަނި ކަމަށެވެ. އަދި ސައިކަލް ޓެކްސީ ދުއްވޭނީ އެ ގަވާއިދުގެ ދަށުން ލައިސަންސް ދޫކޮށްފައިވާ ފަރާތްތަކަށް އެކަނި ކަމަށެވެ.
އިކޮނޮމިކް މިނިސްޓްރީން ބުނީ، ސައިކަލު ޓެކްސީގެ ހިދުމަތްދޭ ސެންޓަރުތަކަށް ލައިސަންސް ދޫކޮށްފައިވަނީ، އެ ތަނަކީ، ވިޔަފާރި ރަޖިސްޓްރީ ކުރުމުގެ ގާނޫނާ އެއްގޮތަށް ރަޖިސްޓްރީކޮށްފައިވާ ތަނަށްކަށް ވެފައި، ލައިސަންސް ލިބިއްޖެނަމަ މަދުވެގެން 20 ސައިކަލު ހިދުމަތްދޭން ގެންގުޅެވޭނެކަން ސާބިތުކޮށްދީފައިވާ ފަރާތްތަކަށް ބެލުމަށްފަހު ކަމަށެވެ.
ސައިކަލް ޓެކްސީ ސެންޓަރުތަކަށް އިކޮނޮމިކް މިނިސްޓްރީން ލައިސަންސް ދޫކުރަނީ ފަސް އަހަރުގެ މުއްދަތަކަށެވެ. ފަސް އަހަރުގެ ލައިސަންސް ހަމަވުމުން ތިން މަސްދުވަހުގެ ތެރޭގައި ލައިސަންސް އާކުރަން ޖހޭނެ ކަމަށް ގެޒެޓްކޮށްފައިވާ ގަވާއިދުގައި ބުނެފައިވެ އެވެ. މުއްދަތު ހަމަވާއިރު ލައިސަންސް އާ ކުރަން ކުށަނާޅާ ފަރާތްތަކަށް ލައިސަންސް އާކޮށްދެނީ 100ރ. އަށެވެ.
ސައިކަލް ޓެކްސީގެ ހިދުމަތް ދިނުމުގެ މިންގަނޑުތަކުގެ ތެރޭގައި ސައިކަލު ދުއްވާއިރު ހެލްމެޓާއި އެނޫންވެސް ސަލާމަތީ ވަސީލަތް ބޭނުންކުރުމާއި، އިހުތިރާމާއެކު ފަސިންޖަރުންނާއި މުއާމަލާތުކުރުމާއި އެއްވެސް ދަތުރެއްގެ ކުރިން ސެންޓަރަށް އެންގުން ހިމެނެ އެވެ. އަދި އެކަށީގެންވާ ސަބަބެއް ނެތި އެއްވެސް ފަރާތަކަށް ދަތުރެއް ކޮށްދިނުމަށް ދެކޮޅު ހަދައިގެން ނުވާނެ ކަމަށް ވެސް އެ ގަވާއިދުގައި ބުނެފައިވެ އެވެ.