ދީނީ ކަންކަމާމެދު ރައްޔިތުން ހޭލުންތެރިކޮށް އިސްލާމީ ހުދޫދުގެ ތެރެއިން މުނިފޫހިފިލުވުމުގެ ކަންކަން ހުޅުވާލުމުގެ ގޮތުން އިސްލާމިކް މިނިސްޓްރީން ބާއްވާ "އިސްލާމިކް ފެއާ" މިއަދު ހަވީރު ފަށައިފި އެވެ.
އިސްލާމިކް ފެއާއަކީ އިސްލާމިކް މިނިސްޓްރީގެ ކަންކަން ހާމަކުރުމަށް އެމިނިސްޓްރީން ކޮންމެ އަހަރަކުވެސް ބާއްވަމުން އަންނަ ފެއާއެކެވެ. ނަމަވެސް އެހެން އަހަރުތަކާ ހިލާފަށް މިއަހަރުގެ ފެއާ ބާއްވަނީ ވަރަށް ގިނަ މުއައްސަސާތަކާއި ދީނީ ކަންކަން ކުރިއެރުވުމަށް މަސައްކަތްކުރާ ޖަމިއްޔާތައް ވެސް ހިމަނައިގެންނެވެ.
އިސްލާމިކް މިނިސްޓްރީ ހުންނަ ސަރަހައްދުގައި މިއަދު ފެށި އެ ފެއާ ހުޅުވައިދެއްވީ ޑިފެންސް މިނިސްޓަރު އާދަމް ޝަރީފެވެ. މިމަހުގެ 31 އާ ހަމަޔަށް ކުރިއަށްގެންދިޔުމަށް ނިންމާފައިވާ އެ ފެއާގެ ޝިއާރަކަށް ކަނޑައަޅާފައިވަނީ "އުހުއްވަތްތެރިކަން – މުޖުތަމައުގެ ބަދަހިން" އެވެ. ފެއާގެ މެއިން ސްޕޮންސަރަކީ މޯލްޑިވްސް ހައްޖު ކޯޕަރޭޝަންއެވެ. ކޯ ސްޕޮންސަރ އަކީ އުރީދޫ މޯލްޑިވްސް އެވެ.
އިސްލާމިކް މިނިސްޓްރީން ބުނީ، މިއަދު ފެށި ފެއާގައި ސަރުކާރު ކުންފުނިތަކާއި ޔުނިވަސިޓީތަކާއި އަމިއްލަ ޖަމިއްޔާތަކާއި ބުކްޝޮޕްތަކުން ބައިވެރިވެފައިވާ ކަމަށެވެ. އަދި ހައްޖު ކޯޕަރޭޝަނާއި މެސެޖް އޮފް އިސްލާމުން ފަދަ ތަންތަނުން ވެސް ފެއާގައި ބައިވެރިވެފައިވާ ކަމަށާއި، އެ މިނިސްޓްރީން ބަލަހައްޓާ ދީނީ ފަންޑާއި، ވަގުފް ފަންޑުގެ ފަންޑު ފޮށިތަށް މި ފެއާގައި ބެހެއްޓިފައި ހުންނާނެކަމަށެވެ.
ފެއާގައި އިސްލާމީ ތާރީހް ދައްކުވައިދޭ އާރޓް ގެލެރީއެއް ވަނީ ހިމަނާފަ އެވެ. އަދި ފެއަރ ހިނގަމުންދާއިރު ކުޑަކުދިންނަށް ހާއްސަކޮށްގެން ސްޓޭޖް ހަރަކާތްތަކެއް ކުރިއަށްގެންދިއުމާއި، އެ ކުދިން ޝައުގުވެރިވާ ކަހަލަ ގޭމް ހަރަކާތްތައްވެސް ވަނީ ކުރިއަށްގެންގޮސްފަ އެވެ. ފެއާ ކުރިއަށްދާނީ ތިން ދުވަހުގެވެސް ހަވީރު ހަތަރަކުން ހަޔަކަށް އަދި ރޭގަނޑު އަށަކުން ދިހަޔަކަށެވެ.
މިނިސްޓަރު އާދަމް ޝަރީފް އިސްލާމިކް ފެއާ ބައްލަވައިލައްވަނީ": މިއަހަރުގެ އިސްލާމިކް ފެއާ ބާއްވާފައިވަނީ ވަރަށް ފުޅާކޮށް -- އަވަސް ފޮޓޯ އަހުމަދު ޝުރާއު