- އައިޖީއެމްއެޗަށް ގެނައި ބަދަލަކީ މިސާލެއް
- މޮޅު ޑޮކްޓަރުންގެ ނިސްބަތް އިތުރުވެގެންދާނެ
- ސިއްހީ ދާއިރާގައި މި ސަރުކާރު ކުރިއެރުން ހޯދި
މި ސަރުކާރުން ސިއްހީ ދާއިރާގެ ތަރައްގީއަށް ކަނޑައެޅި ލަނޑުދަނޑުދަނޑިތަކުގެ 90 ޕަސެންޓް ކާމިޔާބުކުރެވިއްޖެ ކަމަށާއި ފާއިތުވި ތިން އަހަރުގެ ތެރޭ ރާއްޖޭގެ ސިއްހީ ދާއިރާއަށް މި ސަރުކާރުން ފާހަގަކޮށްލެވޭ ވަރުގެ ކުރިއެރުން ގެނެސްފައިވާ ކަމަށް ހެލްތު މިނިސްްރީން ބުނެފި އެވެ.
މިސަރުކާރުގައި ސިއްހީ ދާއިރާއިން ހޯދާފައިވާ ކާމިޔާބީތައް ފާހަގަކުރަން "ސިއްހަތުގެ ހިޔާ" ނަމުގައި ފެކަލްޓީ އޮފް ހެލްތު ސައިންސަސް ގައި ހެލްތު މިނިސްޓްރީން މިއަދު ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން ސްޓޭޓް މިނިސްޓަރު ހުސައިން ރަޝީދު ވިދާޅުވީ، ފާއިތުވި ދެތިން އަހަރުގެ ތެރޭގައި އާބާދީގެ ބޮޑު ކުޑަމިނަށް ބެލުމެއް ނެތި މީހުން ދިރިއުޅޭ ހުރިހާ ރަށެއްގައި ޑޮކްޓަރުންގެ ހިދުމަތް ތައާރަފްކޮށްފައިވާ ކަމަށެވެ.
އަދި ސަރުކާރުގެ ވައުދުތަކުގެ ތެރޭގައި ހިމެނުނު ގޮތަށް ތިން އަތޮޅެއްގައި ތާޝަރީ ހޮސްޕިޓަލް ގާއިމްކުރުމާބެހޭ މަސައްކަތުގެ ދަށުން އައްޑޫގައި ގާއިމްކުރާ ހޮސްޕިޓަލަށް ގެންނަންޖެހޭ ބަދަލުތައް ވެސް ގެނެސްފައިވާ ކަމަށާއި، ކުޅުދުއްފުށީ ހޮސްޕިޓަލަށް އުމްރާނީ ތަރައްގީ ވެސް ގެނެސްފައިވާ ކަމަށެވެ.
އެ މިނިސްޓްރީން ބުނި ގޮތުގައި 2014 ވަނަ އަހަރުން ފެށިގެން މިހާތަނަށް ރާއްޖެއަށް ބޭނުންވާ ސުޕާ ސްޕެޝަލިސްޓުން އިތުރު ކުރުމަށް ފެށި މަސައްކަތުގެ ދަށުން 38 ޑޮކްޓަރުން ތަމްރީނަށް ފޮނުވާފައިވެ އެވެ. އަދި އެއިން ކޮންމެ ޑޮކްޓަރަކަށް ގާތްގަނޑަކަށް 20،000 ޑޮލަރު ހަރަދުވާއިރު، އެއީ ސިއްހީ ދާއިރާގެ ހިދުމަތް ފުޅާކުރުމަށް ސަރުކާރުން ކުރި ބޮޑު ހޭދައެކެވެ.
"އަޅުގަނޑުމެން ތައްޔާރުވަމުން މިދަނީ ކުރިއަށް އޮތް މަހުގެ ތެރޭގައި ވެސް ސުޕާސްޕެޝަލިސްޓުން ތަމްރީން ކުރުމަށް ފޮނުވަން، އިރާދަކުރެއްވިއްޔާ ކުރިއަށް އޮތްތަނުގައި ރާއްޖޭގައި މޮޅު ޑޮކްޓަރުންގެ ނިސްބަތް އިތުރުވެގެންދާނެ،" ހެލްތު މިނިސްޓްރީން ބުންޏެވެ.
މި ސަރުކާރުން ސިއްހީ ދާއިރާއަށް މުޅިން އަލަށް ތައާރަފްކުރި ބައެއް ހިދުމަތްތަކާ ބެހޭގޮތުން ވާހަކަ ދައްކަވަމުން ހުސައިން ރަޝީދު ވިދާޅުވީ، މައި ހޮސްޕިޓަލް އައިޖީއެމްއެޗަށް އައިސްފައިވާ ތަރައްގީއަކީ މިސާލެއް ކަމަށެވެ. ރާއްޖޭގައި މިހާތަނަށް އައި އެއްވެސް ސަރުކާރަކުން ނުކުރެވި އޮތް ކެތު ލެބްގެ މަސައްކަތް ފުރިހަމަކޮށް އެކަން ވުޖޫދަށް ގެނެސްފައިވަނީ މި ސަރުކާރުން ކަމަށާއި ކެތު ލެބްގެ ސަބަބުން ރައްޔިތުންނަށް ބޮޑު ފަސޭހައެއް ލިބިގެން ގޮސްފައިވާ ކަމަށެވެ.
"ފާއިތުވި 3 ވަރަކަށް މަހުގެ ތެރޭގައި ހިތުގެ ބަލިތަކަށް ހާއްސަ ސެންޓަރުން 200 އަށްވުރެ ގިނަ މީހުން ވަނީ ފަރުވާ ހޯދާފައި. ތެލަސީމިއާ ދާއިރާއަށް ބަލާނަމަ، މި އަހަރުގެ ޖުލައި މަހާ ހަމަޔަށް 13 އަތޮޅެއްގައި ތެލަސީމިއާ ސްކްރީނިން ވަނީ ތައާރަފްކޮށްފައި، މުޅި ރާއްޖެއަށް އެ ހިދުމަތް މިއަހަރުގެ ނިޔަލަށް ދެވޭތޯ މަސައްކަތް ކުރަމުން މިދަނީ،" އޭނާ ވިދާޅުވި އެވެ.