އިލެކްޝަން ކޮމިޝަނުން މިދިޔަ މަހު ގެޒެޓްކުރި ލޯކަލް ކައުންސިލް އިންތިހާބުގައި ވޯޓްލުމުގެ ހައްގު ލިބިފައިވާ މީހުންގެ ލިސްޓަށް އަނެއްކާ ވެސް ޝަކުވާ ހުށަހެޅުމުގެ ފުރުސަތު އެ ކޮމިޝަނުން ހުޅުވާލައިފި އެވެ.
އަންނަ ޖެނުއަރީ މަހުގެ 14 ވަނަ ދުވަހު ބާއްވާ އެ އިންތިހާބުގެ ވޯޓާޒް ރަޖިސްޓްރީ، އިލެކްޝަން ކޮމިޝަންގެ ވެބްސައިޓާއި، ގެޒެޓް އަދި ރަށު ކައުންސިލުތަކުން ވަނީ އާންމުކޮށްފަ އެވެ.
އީސީން މިއަދު ކުރި އިއުލާނެއްގައި ބުނީ، އޮކްޓޯބަރު ނުވަވަނަ ދުވަހު އާންމު ކުރި ލޯކަލް ކައުންސިލްތަކުގެ އިންތިހާބަށް ވޯޓު ދިނުމުގެ ހައްގު ލިބިފައިވާ މީހުންގެ ރަޖިސްޓަރީއަށް ހުށަހެޅުނު ޝަކުވާތަކާ ގުޅިގެން ގެނެވުނު ބަދަލުތައް މިހާރު ގެޒެޓްކޮށްފައިވާ ކަމަށެވެ. އެހެންކަމުން އެ ލިސްޓަށް އިތުރު ޝަކުވާއެއް ހުށަހަޅަން ބޭނުންވާ ނަމަ އެ ފުރުސަތު މިހާރު ހުޅުވާލާފައިވާ ކަމަށް ވެސް އިއުލާންގައި ބުންޏެވެ.
ލިސްޓަށް ޝަކުވާ ހުށަހެޅުމުގެ ފަހު ދުވަހަކީ އަންނަ ބުރާސްފަތި ދުވަހެވެ. ޝަކުވާ ބަލައިގަތުމަށް ހަމަޖެހިފައިވަނީ، މާލެ ފިޔަވައި މީހުން ދިރިއުޅޭ އެހެން ހުރިހާ ރަށަކުން އެރަށެއްގެ ކައުންސިލް އިދާރާއިންނާއި، އައްޑޫ ސިޓީ އަދި ފުވައްމުލަކު ސިޓީގެ އަވަށްތަކުގެ އޮފީސްތަކުންނެވެ. މާލޭގައި ނަމަ، ބާ ޖަމާލުއްދީން އިންނެވެ. ޝަކުވާ ފޯމު ކޮމިޝަންގެ ވެބްސައިޓުންނާއި ކައުންސިލް އިދާރާތަކުން ލިބޭނެ އެވެ.