ކުރިއަށް އޮތް ލޯކަލް ކައުންސިލްތަކުގެ އިންތިހާބަށް ބޭނުންވާ މޮނިޓަރުންނާއި އޮބްޒާވަރުން ހޯދުމަށް މިމަހުގެ 10 ވަނަ ދުވަހު ފުރުސަތު ހުޅުވާލާނެ ކަމަށް އިލެކްޝަން ކޮމިޝަނުން ބުނެފި އެވެ.
ކޮންމެ އިންތިހާބަކާ ދިމާކޮށް، އިންތިހާބުގެ ވޯޓުލުން އޮބްޒާވްކޮށް ކުރިއަށްދާ ގޮތް މޮނިޓާ ކުރުމަށް ބޭނުންވާ ފަރާތްތަކަށް އީސީން އެފުރުސަތު ހުޅުވައިލާއިރު، އީސީން ބުނީ، ލޯކަލް ކައުންސިލް އިންތިހާބަށް ބޭނުންވާ އޮބްޒާވަރުން ހޯދުމަށް މިވަގުތު ޕްލޭންކޮށްފައި އޮތީ 10 ވަނަ ދުވަހު އެ ފުރުސަތު އިއުލާންކުރާ ގޮތަށް ކަމަށެވެ. އަދި އެހެން އަހަރުތަކާ ހިލާފަށް މިއަހަރު އޮބްޒާވަރުންނާއި މޮނީޓަރުންނަށް ކުރިމަތިލާ ފަރާތްތަކަށް ފޯމް ހުށަހެޅުމުގެ ކަންކަން ވަރަށް ފަސޭހަ ގޮތަކަށް އިންތިޒާމްކުރަމުންދާ ކަމަށް ވެސް އެ ކޮމިޝަނުން ބުންޏެވެ.
އީސީން ބުނީ، އޮބްޒާވަރުންނާއި މޮނިޓަރުންނާއި ކެންޑިޑޭޓުންގެ މަންދޫބުންނަށް ފޯމް ހުށަހަޅަން ހުޅުވައިލާއިރު، އެކަމާ ގުޅޭ ތަފްސީލު އެ ކޮމިޝަނުން ފަހުން ހާމަކުރާނެ ކަމަށެވެ. ފޯމް ހުށަހެޅުމުގައި ކުރިން އޮންނަ އުސޫލާ ހިލާފަށް، ފޯމު ލާން ބޭނުންވާ ފަރާތުން ފޯމް ހިފައިގެން އެ ހިދުމަތެއްދޭ މަރުކަޒަށް ދާން ނުޖެހޭނެ ކަމަށާއި، މި ފަހަރުގެ އިންތިހާބަށް އޮބްޒާވަރުން ހޯދުމަށް ދޫކުރާ ފޯމް އޮންލައިންކޮށް ފިލްކުރެވޭނެ އިންތިޒާމް އީސީން ހަމަޖައްސައިދޭނެ ކަމަށް ވެސް އެ ކޮމިޝަނުން ވަނީ ބުނެފަ އެވެ.
ކެންޑިޑޭޓުންގެ މަންދޫބުންގެ ރަޖިސްޓްރޭޝަނަށް ހުޅުވައިލާނީ މި މަހުގެ 20 ވަނަ ދުވަހު އެވެ.